काठमाडौं । कक्षा १२ को नतिजाप्रति असन्तुष्टि जनाउँदै विद्यार्थीहरूले काठमाडौंमा विरोध प्रदर्शन गरेका छन्। नतिजा प्रकाशन तथा मूल्याङ्कन प्रक्रियामा त्रुटि भएको र पुनर्मूल्याङ्कन तथा रिटोटलिङको प्रभावकारी व्यवस्था नभएको भन्दै उनीहरूले बिहीबार माइतीघरमा प्रदर्शन गरेका हुन्।
प्रदर्शनको नेतृत्व विभिन्न विद्यार्थी समूहका प्रतिनिधिहरूले गरेका थिए। सहभागीहरूले “१२ वर्षको मेहनत खेर गयो, जिम्मेवार को?”, “हाम्रो भविष्य बर्बाद भयो” र “हामी न्याय कहाँ खोज्ने?” जस्ता नारा लेखिएका प्लेकार्ड प्रदर्शन गरेका थिए।
विद्यार्थीहरूले छिटो नतिजा सार्वजनिक गर्ने क्रममा त्रुटि भएको र त्यसको प्रत्यक्ष असर आफूहरूमा परेको आरोप लगाएका छन्। उनीहरूले निष्पक्ष छानबिन, निःशुल्क रिटोटलिङ, उत्तरपुस्तिका पुनः परीक्षण तथा मूल्याङ्कन प्रक्रियामा पारदर्शिता सुनिश्चित गर्न माग गरेका छन्।
उनीहरूले माग सम्बोधन नभए थप आन्दोलनका कार्यक्रम घोषणा गर्ने चेतावनी दिएका छन्। यता शिक्षा मन्त्रालयले भने नतिजा प्रकाशनमा कुनै त्रुटि नभएको स्पष्ट पारेको छ।
