काठमाडौं । शिक्षामन्त्री सस्मित पोखरेलले राष्ट्रिय परीक्षा बोर्डको नतिजा प्रकाशन प्रक्रिया कानुनसम्मत तथा समयमै सम्पन्न भएको दाबी गरेका छन्। परीक्षाको नतिजालाई लिएर उठिरहेका प्रश्न तथा आन्दोलनका बीच उनले आफ्नो स्पष्ट धारणा सार्वजनिक गरेका हुन्।
मन्त्री पोखरेलले नतिजा प्रकाशनमा कुनै हतार नभएको उल्लेख गर्दै आवश्यक जनशक्ति थपेर तथा प्रशासनिक झन्झटहरू घटाएर तोकिएको समयमै नतिजा सार्वजनिक गरिएको बताएका छन्। उनले भने, “यस प्रक्रियाप्रति हामी स्पष्ट र विश्वस्त छौँ। नतिजा समयमै प्रकाशन गर्न कुनै हतार गरिएको होइन, बरु आवश्यक जनशक्ति थप गरी र अनावश्यक प्रशासनिक प्रक्रियाहरू छोट्याई तोकिएको समयमा नै प्रकाशित गरिएको हो।”
नतिजालाई लिएर भइरहेको शान्तिपूर्ण आन्दोलनप्रति मन्त्रालयको सम्मान रहेको उनले स्पष्ट पारे। लोकतान्त्रिक समाजमा शान्तिपूर्ण रूपमा आफ्ना विचार राख्ने अधिकार सबैलाई रहेको उनको भनाइ छ।
तर, आन्दोलनरत विद्यार्थीहरूलाई लक्षित गरी सामाजिक सञ्जालमा भइरहेका नकारात्मक टिप्पणीप्रति उनले गम्भीर आपत्ति जनाएका छन्। शान्तिपूर्ण आन्दोलनमा सहभागी कुनै पनि व्यक्ति वा समूहप्रति दुर्व्यवहार, गालीगलौज वा असम्मानजनक टिप्पणी नगर्न उनले सबैलाई आग्रह गरेका छन्।
मन्त्री पोखरेलका अनुसार नतिजा प्रक्रियालाई थप पारदर्शी र विश्वसनीय बनाउन उच्चस्तरीय समिति गठन गरिएको छ। उक्त समितिमा शिक्षा तथा खेलकुद मन्त्रालय र पाठ्यक्रम विकास केन्द्रका उपसचिवहरूको प्रतिनिधित्व रहनेछ।
समितिले उत्तरपुस्तिकाको स्याम्पलिङ परीक्षण, अंक तथा डेटा इन्ट्रीको प्रमाणीकरण लगायतका कार्यहरू गर्ने मन्त्रालयले जनाएको छ।
