काठमाडौं । गत आइतबारदेखि चितवनमा जारी राष्ट्रिय स्वतन्त्र पार्टी (रास्वपा)को महाधिवेशनमा केन्द्रीय सदस्यको निर्वाचन सम्पन्न भएको छ। केन्द्रीय सदस्यको निर्वाचन सम्पन्न भएसँगै अब पदाधिकारी चयन प्रक्रियातर्फ ध्यान केन्द्रित भएको छ।
पार्टी संरचनाअनुसार दुईमध्ये एक महामन्त्री मनोनीत हुने व्यवस्था रहेकाले बाँकी एक महामन्त्री पदका लागि प्रतिस्पर्धा तीव्र बनेको छ। उक्त पदका लागि हाल पाँच जना नेताहरूले दाबी प्रस्तुत गरेका छन्।
महामन्त्री पदका दाबेदारहरूमा वर्तमान महामन्त्री कवीन्द्र बुर्लाकोटी, शिशिर खनाल, विपिन आचार्य, गणेश पराजुली र मनिष झा रहेका छन्, जसले आ–आफ्नो पक्षमा समर्थन जुटाउने प्रयास गरिरहेका छन्।
पार्टी पदाधिकारीलाई सहमतिमार्फत चयन गर्ने विषयमा नेतृत्व तहमा छलफल भइरहेको स्रोतले जनाएको छ। सहमति कायम हुन नसके मतदान प्रक्रियाबाट पदाधिकारी चयन गर्ने विकल्प अन्तिम उपायका रूपमा रहने नेताहरूले बताएका छन्।
