काठमाडौं । राष्ट्रिय स्वतन्त्र पार्टी (रास्वपा) की सांसद ज्वाला संग्रौलाले पार्टीको प्रथम महाधिवेशनअन्तर्गत भएको निर्वाचन प्रक्रियाप्रति असन्तुष्टि व्यक्त गर्दै निर्वाचन आयोगमा उजुरी दर्ता गरेकी छन्।
संग्रौलाका अनुसार मतदान प्रणालीमा उनको नामबाट ‘ज्वाला’ शब्द हटाइएकाले मतदाताहरूलाई उम्मेदवार पहिचान गर्न कठिनाइ भएको थियो। उनले आफ्नो नामको पछाडि कोष्ठकमा उल्लेख गरिएको ‘ज्वाला’ मतदानका क्रममा प्रयोग गरिएको प्रणालीमा समावेश नगरिएको दाबी गरेकी छन्।
उनले यस विषयलाई सामान्य प्राविधिक त्रुटा नभई नामसँग जोडिएको राजनीतिक व्यवहारको रूपमा व्याख्या गरेकी छन्। सामाजिक सञ्जालमार्फत प्रतिक्रिया जनाउँदै उनले पार्टीको केन्द्रीय समिति, महाधिवेशन प्रतिनिधि तथा उम्मेदवार मनोनयनका सबै चरणमा आफ्नो नाम एउटै रहेको भए पनि मतदान मेसिनमा भने ‘ज्वाला’ उल्लेख नभएको बताएकी छन्।
उनले मतदाताहरूले ‘ज्वाला’ नाम खोजिरहँदा मतदानको समय सकिएको उल्लेख गर्दै उक्त विषयमा निष्पक्ष छानबिनको मागसहित निर्वाचन आयोगको ध्यानाकर्षण गराएको जानकारी दिएकी छन्।
संग्रौलाले नामसम्बन्धी यो विवादले निर्वाचन प्रक्रियाको पारदर्शिता र निष्पक्षतामाथि प्रश्न उठाएको भन्दै आवश्यक कारबाहीको अपेक्षा व्यक्त गरेकी छन्।
