काठमाडौं । नेपाल औषधि व्यवसायी संघ काठमाडौं शाखाले आधिकारिक थोक विक्रेता बाहेक अन्य कुनै व्यक्ति वा माध्यमबाट आएका औषधिहरू खरिद तथा बिक्री नगर्न खुद्रा औषधि व्यवसायीलाई आग्रह गरेको छ। औषधिको गुणस्तर, सुरक्षित आपूर्ति प्रणाली र सेवाग्राहीको स्वास्थ्य सुरक्षालाई ध्यानमा राख्दै संघले यस्तो निर्देशन जारी गरेको हो।
संघले जारी गरेको सूचनामा औषधि खरिद–बिक्री गर्दा अनिवार्य रूपमा आधिकारिक स्रोतबाट मात्र कारोबार गर्नुपर्ने, बिल जारी गर्दा ब्याच नम्बर, एक्सपायरी मिति, एमआरपी र परिमाण स्पष्ट उल्लेख गर्नुपर्ने व्यवस्था गरिएको छ। साथै, कुनै पनि फार्मेसीको नाम वा प्यान प्रयोग गरी अनधिकृत व्यक्तिबाट औषधि बिक्री वा बिलिङ नगर्न चेतावनी दिइएको छ।
संघले औषधि व्यवसायीहरूलाई सुरक्षित आपूर्ति प्रणाली सुनिश्चित गर्न, भण्डारण मापदण्ड पालना गर्न तथा ‘कोल्ड चेन’ आवश्यक पर्ने औषधिमा विशेष सावधानी अपनाउन पनि आग्रह गरेको छ। चिकित्सकको प्रेस्क्रिप्सनबिना औषधि बिक्री नगर्न समेत निर्देशन दिइएको छ।
त्यसैगरी खरिद, बिक्री, भण्डारण र वितरणका सम्पूर्ण प्रक्रियामा प्रचलित कानुन तथा मापदण्डको पूर्ण पालना गर्नुपर्ने संघले स्पष्ट पारेको छ। औषधि व्यवसाय केवल व्यापार नभई जनस्वास्थ्यसँग प्रत्यक्ष जोडिएको संवेदनशील सेवा भएकाले जिम्मेवार र नैतिक रूपमा सञ्चालन गर्नुपर्नेमा पनि संघले जोड दिएको छ।
