काठमाडौं । वाणिज्य, आपूर्ति तथा उपभोक्ता संरक्षण विभागले प्रतिबन्ध लगाइएका वस्तुको अनधिकृत बिक्रीवितरण नगर्न सम्बन्धित व्यवसायीलाई सचेत गराएको छ। निकासी पैठारी (नियन्त्रण) ऐन, २०१३ अनुसार कुनै वस्तुको निकासी वा पैठारीमा रोक लगाउन वा नियन्त्रण गर्न सक्ने कानुनी व्यवस्था रहेको स्मरण गराउँदै विभागले कानुनविपरीतका गतिविधि नगर्न आग्रह गरेको हो।
विभागले पैठारीकर्ता, सञ्चयकर्ता तथा बिक्रेतालाई प्रचलित कानुनले तोकेका दायित्व र सर्तहरूको पालना गर्दै व्यापार व्यवसाय सञ्चालन गर्न निर्देशन दिएको छ। प्रतिबन्धित वस्तुको कारोबार वा अन्य कानुनविपरीतका कार्य भएको पाइएमा निकासी पैठारी (नियन्त्रण) ऐन, २०१३, उपभोक्ता संरक्षण ऐन, २०७५ तथा अन्य प्रचलित कानुनअनुसार कारबाही गरिने विभागले जनाएको छ।
बजारमा स्वच्छता कायम गर्न विभागले अनुगमन तथा निरीक्षणलाई समेत तीव्र बनाएको छ। उपभोक्ता संरक्षण ऐन, २०७५ र उपभोक्ता संरक्षण नियमावली, २०७६ अनुसार बजार अनुगमन गरी आवश्यक निर्देशन तथा कारबाही प्रक्रिया अघि बढाइएको विभागले जनाएको छ।
विभागका अनुसार सोमबार काठमाडौंका विभिन्न नौ वटा व्यावसायिक फर्मको अनुगमन गरिएको थियो। अनुगमनका क्रममा ती फर्मलाई सुधारात्मक निर्देशन दिइएको छ। उपभोक्ता अधिकारकर्मी तथा स्थानीय सरोकारवालाको सहभागितामा नियमित बजार अनुगमन भइरहेको विभागले स्पष्ट पारेको छ।
