काठमाडौं । नेकपा (एमाले) का महासचिव शंकर पोखरेलले दंगा तथा भीड नियन्त्रणमा सुरक्षाकर्मीको प्रभावकारितामाथि गम्भीर प्रश्न उठेको बताएका छन्।
राष्ट्रिय स्वतन्त्र पार्टीका सभापति रवि लामिछानेले आह्वान गरेको सर्वदलीय बैठकपछि सञ्चारकर्मीसँग कुरा गर्दै पोखरेलले मोरङ–सुनसरी क्षेत्रमा देखिएको अशान्त अवस्थालाई नियन्त्रण गर्न राज्यले प्रभावकारी भूमिका खेल्नुपर्ने बताए।
उनले प्रधानमन्त्री बालेन शाहले नै सर्वदलीय बैठक बोलाएर समाधान खोज्नुपर्ने अवस्था भए पनि रास्वपा सभापति लामिछानेले सक्रियता देखाउनु सकारात्मक रहेको उल्लेख गरे।
पोखरेलका अनुसार सर्वदलीय बैठकले सामाजिक शान्ति र सद्भाव कायम राख्न राजनीतिक दलहरूले आ–आफ्नो भूमिका निर्वाह गर्ने सहमति गरेको छ। उनले नागरिकको जिउधनको सुरक्षा सुनिश्चित गर्नु राज्य र सरकारको प्रमुख दायित्व भएको बताए।
उनले समाजमा शान्ति सुरक्षा कायम गर्न सरकार गम्भीर हुनुपर्ने र यस्ता घटनाको प्रभावकारी व्यवस्थापन आवश्यक रहेको धारणा व्यक्त गरे।
