काठमाडौं । सुर्खेत र सल्यानको सिमानामा पर्ने बालुवासंग्रहीमा बोलेरो जीप भेरी नदीमा खस्दा दुईजना बेपत्ता भएका छन्।
लु १ ज ३०२२ नम्बरको बोलेरो जीप भेरी नदीमा डुबेको हो। कर्णाली प्रदेश प्रहरी प्रमुख डीआईजी जयराज सापकोटाका अनुसार दुर्घटनाका बेला जीपमा चारजना सवार थिए।
जीप नदीमा खसेपछि दुईजना पौडिएर सकुशल बाहिर निस्कन सफल भएका छन्। जीपमा सवार अन्य दुईजना भने अझै बेपत्ता रहेको प्रहरीले जनाएको छ।
बेपत्ताको खोजी तथा उद्धारका लागि प्रहरी टोली परिचालन गरिएको छ। प्रारम्भिक जानकारीअनुसार जीप सडकबाट अनियन्त्रित भई भेरी नदीमा खसेको प्रहरीले जनाएको छ। दुर्घटनाको वास्तविक कारण भने खुल्न बाँकी छ।
