काठमाडौं। कालीकोटमा निर्माण हुने ४२० मेगावाट क्षमताको तिला–२ जलविद्युत् आयोजनाका लागि एभरेस्ट बैंकको अगुवाइमा विभिन्न बैंक तथा वित्तीय संस्थासँग लगानी सम्झौता भएको छ।
मातिला पावर कम्पनीद्वारा प्रवर्द्धित आयोजनामा सानिमा बैंक सहअगुवा तथा प्राइम कमर्सियल, एनआईसी एसिया र ग्लोबल आईएमई बैंक लिड बैंकका रूपमा सहभागी छन्। सिद्धार्थ, नबिल, नेपाल इन्फ्रास्ट्रक्चर, कृषि विकास, मुक्तिनाथ विकास र कामना सेवा विकास बैंक पनि लगानीकर्ताका रूपमा छन्।
आयोजनाको अनुमानित लागत ७० अर्ब ७ करोड रुपैयाँ रहेको छ। यसको ७५ प्रतिशत अर्थात् ५२ अर्ब ५५ करोड रुपैयाँ ऋण र बाँकी २५ प्रतिशत अर्थात् १७ अर्ब ५२ करोड रुपैयाँ स्वपूँजीबाट जुटाइनेछ।
तिलागुफा नगरपालिकामा बाँध र खाँडाचक्र नगरपालिकामा विद्युत्गृह निर्माण हुने आयोजना चार वर्षभित्र सम्पन्न गर्ने लक्ष्य छ। आयोजनाबाट वार्षिक २ हजार ३१८.७९ गिगावाट आवर विद्युत् उत्पादन गरी राष्ट्रिय प्रसारण प्रणालीमा जोडिनेछ।
आयोजनाले २०७५ भदौ ७ गते विद्युत् उत्पादन अनुमति पाएको थियो भने २०८१ कात्तिक ७ गते नेपाल विद्युत् प्राधिकरणसँग २९६.७४ मेगावाट क्षमताका लागि विद्युत् खरिद–बिक्री सम्झौता (पीपीए) गरेको छ।
आयोजनामा प्रभावित क्षेत्रका बासिन्दा तथा सर्वसाधारणका लागि २० प्रतिशत सेयर छुट्याइएको छ। वित्तीय व्यवस्थापन पूरा भएसँगै आयोजना निर्माणको महत्वपूर्ण चरण अघि बढेको कम्पनीले जनाएको छ।
