काठमाडौं । प्रधानमन्त्री बालेन्द्र (बालेन) शाहको शुक्रबार तय भएको आकस्मिक मुस्ताङ भ्रमणले राजनीतिक तथा प्रशासनिक वृत्तमा चासो बढाएको छ। प्रधानमन्त्री पोखरा हुँदै मुस्ताङ जाने तयारीमा रहँदा सोही दिन प्रधानन्यायाधीश डा. मनोजकुमार शर्माको पनि पोखरा आगमन हुने भएपछि भ्रमणलाई अर्थपूर्ण रूपमा हेरिएको छ।
प्रधानमन्त्रीको सचिवालयले भ्रमणको उद्देश्य, भेटघाट र कार्यसूचीबारे औपचारिक जानकारी सार्वजनिक गरेको छैन। सुरक्षा निकाय र स्थानीय प्रशासनलाई भने अन्तिम समयमा भ्रमणबारे जानकारी गराइएको बताइएको छ।
मुस्ताङ सामरिक, वातावरणीय र जलस्रोतका दृष्टिले संवेदनशील क्षेत्र भएकाले प्रधानमन्त्रीको भ्रमणलाई विभिन्न कोणबाट हेरिएको छ। हिमाली क्षेत्रमा जलवायु परिवर्तनको प्रभाव, सीमावर्ती सुरक्षा तथा विकास आयोजनाको अवस्थाबारे स्थलगत जानकारी लिन भ्रमण भएको हुनसक्ने अनुमान गरिएको छ।
यद्यपि, भ्रमणको वास्तविक उद्देश्यबारे प्रधानमन्त्री सचिवालयबाट आधिकारिक जानकारी नआएसम्म विभिन्न अड्कलबाजी मात्रै हुने देखिन्छ।
