काठमाडौं । कर्णाली प्रदेश सरकारमा नेपाली कम्युनिस्ट पार्टी (नेकपा)बाट सहभागी हुने तीन मन्त्रीको टुंगो लाग्न नसकेपछि पार्टीले सात जना सम्भावित उम्मेदवारको नाम केन्द्रमा पठाएको छ। अब मन्त्री छनोटको अन्तिम निर्णय पार्टी संयोजक पुष्पकमल दाहाल ‘प्रचण्ड’ र सहसंयोजक माधवकुमार नेपालले गर्ने भएका छन्।
नेकपा कर्णालीका प्रदेश इन्चार्ज चन्द्रबहादुर शाहीका अनुसार प्रदेश तहमा सोमबार बिहानसम्म सहमति बन्न नसकेपछि आकांक्षीहरूको नाम केन्द्रमा पठाइएको हो। केन्द्रबाट नाम निश्चित भएपछि मात्र मन्त्री नियुक्तिको प्रक्रिया अघि बढ्ने उनले बताएका छन्।
यसअघि सोमबार बिहान ११ बजे तीन मन्त्रीलाई पद तथा गोपनीयताको शपथ गराउने तयारी थियो। प्रदेश प्रमुखको कार्यालयले पनि कार्यक्रमको समय तय गरिसकेको थियो। तर मन्त्रीको नाम अन्तिम समयमा सिफारिस हुन नसकेपछि मुख्यमन्त्री मंगलबहादुर शाहीले शपथ कार्यक्रम रोक्न आग्रह गरेका थिए।
नेकपाभित्र विन्दमान विष्ट, मिलन खड्का र जुम्कित लामासहितका नेताहरू मन्त्रीका सम्भावित नामका रूपमा चर्चामा थिए। आकांक्षीको संख्या बढेपछि सहमति जुटाउन कठिन भएको हो। यही विवादले पार्टीभित्र रहेका साबिक माओवादी र साबिक नेकपा एकीकृत समाजवादी धारबीचको मतभेदसमेत बाहिर ल्याएको छ।
नेकपा र नेकपा एमालेबीचको सत्ता साझेदारीअनुसार कर्णालीमा नेकपाले मुख्यमन्त्रीसहित तीन मन्त्रालयको जिम्मेवारी पाएको छ। उसका लागि भौतिक पूर्वाधार तथा सहरी विकास, उद्योग–पर्यटन–वन तथा वातावरण र भूमि व्यवस्था, कृषि तथा सहकारी मन्त्रालय छुट्याइएको छ। एमालेको तर्फबाट भने तीन मन्त्री यसअघि नै नियुक्त भइसकेका छन्।
मन्त्री छनोटमा भइरहेको ढिलाइका कारण मुख्यमन्त्री मंगलबहादुर शाही नेतृत्वको प्रदेश सरकार गठन भएको झन्डै एक महिना पुग्न लाग्दा पनि पूर्णरूपमा सञ्चालनमा आउन सकेको छैन। मन्त्रिपरिषद् पूर्ण नहुँदा बजेट कार्यान्वयनदेखि सरकारका नियमित प्रशासनिक कामसम्म प्रभावित हुन सक्ने भन्दै सरकारमाथि आलोचना बढिरहेको छ।
