काठमाडौं । गत एक वर्षमा मधेस प्रदेशबाट वैदेशिक रोजगारीमा गएका १४४ जनाको मृत्यु भएको छ। सो अवधिमा प्रदेशका आठ जिल्लाबाट एक लाख ७९ हजार ३९ जना वैदेशिक रोजगारीका लागि विभिन्न मुलुक पुगेका थिए।
सुरक्षित आप्रवासन (सामी) कार्यक्रमले जनकपुरधाममा आयोजना गरेको समीक्षा कार्यक्रममा वरिष्ठ कार्यक्रम अधिकृत देवनारायण मण्डलले उक्त तथ्यांक सार्वजनिक गरेका हुन्।
तथ्यांकअनुसार धनुषाबाट ३८ हजार ५५३, महोत्तरीबाट २८ हजार २२९, सर्लाहीबाट २३ हजार २७३, सिरहाबाट ३० हजार २११, सप्तरीबाट २० हजार ५५९, बाराबाट १५ हजार ५५५, रौतहटबाट १४ हजार ६८२ र पर्साबाट सात हजार ९७७ जना वैदेशिक रोजगारीमा गएका थिए।
वैदेशिक रोजगारीमा जाने महिलाको संख्या सर्लाहीमा सबैभन्दा बढी एक हजार ३८९ रहेको छ। बाराबाट एक हजार ८८, महोत्तरीबाट ४४७, धनुषाबाट ४१३, सिरहाबाट ३०४, पर्साबाट ३३८, रौतहटबाट ५२५ र सप्तरीबाट २६९ जना महिला वैदेशिक रोजगारीमा गएको तथ्यांकमा उल्लेख छ।
सामी कार्यक्रमअन्तर्गत सञ्चालित आप्रवासी स्रोत केन्द्रबाट गत वर्ष ६३ हजार १४० जनाले सेवा तथा परामर्श लिएका छन्। तीमध्ये ५७ हजार २२५ पुरुष, पाँच हजार ९१४ महिला र एक जना अन्य लैङ्गिक समूहका व्यक्ति छन्।
श्रम तथा यातायात मन्त्रालयका शाखा अधिकृत नवीनकुमार शर्माका अनुसार आर्थिक वर्ष २०८२/८३ मा वैदेशिक रोजगारीसँग सम्बन्धित ६७५ वटा समस्या समाधान गरिएको छ। त्यस्तै, १५९ पीडितलाई पीडकबाट २२ करोड एक लाख ७८ हजार ४०३ रुपैयाँ फिर्ता गराइएको उनले जानकारी दिए।
वैदेशिक रोजगारीमा जान चाहनेलाई गन्तव्य मुलुक, रोजगारीको प्रक्रिया, श्रम स्वीकृति, आवश्यक सीप, लागत, बीमा तथा कानुनी अधिकारलगायत विषयमा सूचना र परामर्श उपलब्ध गराउँदै आएको कार्यक्रममा जानकारी दिइएको थियो।
श्रम तथा यातायातमन्त्री शारदा थापाले वैदेशिक रोजगारीलाई सुरक्षित, व्यवस्थित र मर्यादित बनाउन पूर्वसूचना तथा परामर्शको पहुँच विस्तार गर्नुपर्नेमा जोड दिइन्। रोजगारीमा जानुअघि सही सूचना प्राप्त गर्न सके ठगी, बढी लागत, अवैध बाटोबाट हुने प्रस्थान तथा अन्य जोखिम न्यूनीकरण गर्न सहयोग पुग्ने उनको भनाइ थियो।
कार्यक्रम श्रम तथा यातायात मन्त्रालयका वरिष्ठ उपसचिव धनञ्जयकुमार सिंहको अध्यक्षतामा सम्पन्न भएको थियो।
