काठमाडौं । नुवाकोटको बेत्रावतीमा भोटेकोसी नदीको बाढीले पुरिएको एउटा घरबाट २३ वटा शव निकालिएको छ । मंगलबार खोज तथा उद्धारका क्रममा सुरक्षाकर्मीले घरको एउटै कोठाबाट २१ वटा र घरबाहिरबाट थप दुई वटा शव फेला पारेका हुन् ।
उद्धारमा खटिएका एक प्रहरी अधिकारीका अनुसार तीनतले घरको माथिल्लो भागमा रहेका कोठाबाट ती शव फेला परेका हुन् । बाढीले घर पुरिएपछि ठूलो मात्रामा माटो तथा लेदो जमेको स्थानमा सुरक्षाकर्मीले खोजी गर्ने क्रममा शवहरू भेटिएका हुन् ।
फेला परेका शवमध्ये हालसम्म कसैको पनि पहिचान खुल्न सकेको छैन । घटनास्थलमा थप व्यक्ति पुरिएको हुन सक्ने आशंकामा प्रहरीले खोज तथा उद्धार कार्यलाई निरन्तरता दिएको जनाएको छ ।
बाढीबाट प्रभावित बेत्रावती क्षेत्रमा सुरक्षाकर्मी तथा उद्धार टोलीले जोखिमपूर्ण अवस्थामा समेत खोजी कार्य जारी राखेका छन् । फेला परेका शवको पहिचान तथा घटनाको थप विवरण संकलन गर्ने कामसमेत भइरहेको प्रहरीले जनाएको छ ।
