काठमाडौं । चितवनको भरतपुर महानगरपालिका–९ स्थित पूर्व–पश्चिम राजमार्गमा विद्युतीय कारमा आगलागी हुँदा चालकको मृत्यु भएको छ।
बा.प्र.०१–०३० च ५५७९ नम्बरको विद्युतीय कारमा शुक्रबार बिहान अचानक आगो लागेको जिल्ला प्रहरी कार्यालय चितवनले जनाएको छ। आगलागीपछि दमकलको सहयोगमा आगो नियन्त्रणमा लिइएको थियो।
आगलागीबाट कार पूर्ण रूपमा जलेर क्षतिग्रस्त भएको छ। घटनामा चालकको मृत्यु भए पनि शरीर जलेका कारण हालसम्म मृतकको पहिचान खुल्न नसकेको प्रहरीले जनाएको छ।
जिल्ला प्रहरी कार्यालय चितवनका प्रहरी उपरीक्षक रामेश्वर पौडेलका अनुसार घटनाबारे थप अनुसन्धान भइरहेको छ।
