काठमाडौं । रसुवास्थित भोटेकोशी नदीमा आएको बाढीपछि प्रभावित चिलिमे जलविद्युत् आयोजनाको टनेल क्षेत्रमा फसेकाहरूको खोजी तथा उद्धार कार्यलाई तीव्र पारिएको छ।
टनेलभित्र रहेका श्रमिक तथा अन्य व्यक्तिको अवस्थाबारे जानकारी लिन उद्धार टोलीले बिहानैदेखि एक्स्काभेटरको प्रयोग गरेर अवरुद्ध क्षेत्रमा जमेको लेदो, ढुंगा, माटो र कंक्रिट हटाइरहेको छ।
इन्जिनियर गोकर्ण चौधरीका अनुसार उद्धार टोली टनेलको प्रवेशद्वार नजिकसम्म पुगिसकेको छ। बाढीले थुपारेको बाक्लो लेदो र ठूलो परिमाणको भग्नावशेषका कारण टनेलभित्र प्रवेश गर्न अवरोध भइरहेको छ।
उद्धार टोलीले बाटोमा रहेका अवरोध हटाउँदै टनेलभित्र फसेका भनिएका श्रमिक तथा अन्य व्यक्तिको अवस्था पत्ता लगाउने प्रयास गरिरहेको छ। उनीहरूलाई सकुशल बाहिर निकाल्न उद्धार कार्यलाई तीव्र गतिमा अघि बढाइएको चौधरीले जानकारी दिए।
