काठमाडौं । पृथ्वीराजमार्ग अवरुद्ध भएपछि साल्ट ट्रेडिङ कर्पोरेशन लिमिटेडले खाना पकाउने ग्यासको आपूर्ति सहज बनाउन निजी ग्यास कम्पनीसँग सहकार्य गर्दै आफ्ना ‘एसटिसी सिलिन्डर’ भर्न थालेको छ । धादिङको कृष्णभीरमा त्रिशूली नदीले सडक कटान गरेपछि कर्पोरेशनको जुगेखोलास्थित एलपीजी प्लान्टमा ग्यासका बुलेट पुग्न नसकेपछि वैकल्पिक व्यवस्थामार्फत ग्यास आपूर्ति गर्न थालिएको हो ।
कर्पोरेशनले मनोज र बाबा ग्यासका सहज स्थानमा रहेका प्लान्टसँग सहकार्य गरी आफ्ना खाली सिलिन्डरमा ग्यास भरेर वैकल्पिक मार्गबाट काठमाडौँ ल्याउने व्यवस्था मिलाएको छ । कर्पोरेशनका सहायक प्रमुख कार्यकारी अधिकृत बज्रेश झाले उपभोक्तालाई ग्यास अभाव हुन नदिन यस्तो व्यवस्था गरिएको बताए । उनका अनुसार पहिलो चरणमा शुक्रबारसम्म ती दुई निजी प्लान्टमा भरिएका एसटिसी सिलिन्डर काठमाडौँ आइपुग्नेछन् ।
कर्पोरेशनले आफ्नो प्लान्टका लागि आउन नसकेका केही ग्यास बुलेटसमेत निजी कम्पनीका प्लान्टतर्फ डाइभर्ट गरेको जनाएको छ । नेपाल आयल निगमबाट कर्पोरेशनले सीमित कोटा पाउँदै आएको छ । निगमले भारतीय आयल कर्पोरेशनबाट ३ हजार २५ ग्यास बुलेटका लागि सम्झौता गरेकोमा करिब २ प्रतिशत अर्थात् ५३ वटा बुलेट मात्र कर्पोरेशनको भागमा पर्ने जनाइएको छ ।
कर्पोरेशनका अनुसार हाल मासिक ५५ हजारदेखि ६० हजारको हाराहारीमा ‘एसटिसी सिलिन्डर’ खपत हुँदै आएको छ । ग्यास वितरणलाई सहज बनाउन कर्पोरेशनले कुपन प्रणाली लागू गरेको छ । कुपन वितरण गर्दा नै उपभोक्तालाई ग्यास प्राप्त गर्ने दिन सुनिश्चित गरिने झाले बताए ।
यस्तै, कर्पोरेशनले आयोडिनयुक्त नुनको आपूर्ति सहज राख्न ६ महिनालाई पुग्ने मौज्दात रहेको जनाएको छ । भदौ १७ गतेसम्म कर्पोरेशनका भण्डारणमा १ लाख २७ हजार ३६१ मेट्रिकटन नुन मौज्दात रहेको झाले जानकारी दिए । देशभर वार्षिक २ लाख टनभन्दा बढी आयोडिनयुक्त नुनको माग हुने गरेको छ भने कर्पोरेशनले गत आर्थिक वर्षमा करिब २ लाख १० हजार टन नुन बिक्री गरेको थियो ।
चिनीको मूल्य बढिरहेका बेला कर्पोरेशनले बजार हस्तक्षेप गर्दै प्रतिकिलो १०० रुपैयाँमा चिनी बिक्री गरिरहेको छ । निजी क्षेत्रबाट चिनी प्रतिकिलो १३५ रुपैयाँसम्म बिक्री भइरहेका बेला कर्पोरेशनले भदौ ९ गते ६०० टन चिनी आयात गरेको थियो । पछिल्लो समय कर्पोरेशनले ३ हजार टन चिनी बजारमा पठाइसकेको जनाएको छ ।
कर्पोरेशनले चामल, दाल, गेडागुडी र तेललगायत खाद्यान्नको मूल्य पनि स्थिर राख्न प्रयास गरिरहेको जनाएको छ । सहायक प्रमुख कार्यकारी अधिकृत झाले विपद् तथा असहज परिस्थितिमा दैनिक अत्यावश्यक वस्तुको सहज आपूर्ति सुनिश्चित गर्नु कर्पोरेशनको मुख्य उद्देश्य रहेको बताए ।
