काठमाडौँ । भोटेकोशी बाढीका कारण विद्युत् पूर्वाधारमा क्षति पुगेका क्षेत्रमा सरकारले विद्युत् सेवा पुनःस्थापनाको कामलाई तीव्रता दिएको छ। ऊर्जा, जलस्रोत तथा सिँचाइ मन्त्रालयले बाढीबाट प्रभावित रसुवा, नुवाकोट र धादिङमा विद्युत् अवरुद्ध भएपछि तत्कालै पुनःस्थापनाको काम अघि बढाएको जनाएको छ।
मन्त्रालयका प्रवक्ता मोहनकुमार शाक्यका अनुसार धादिङ र नुवाकोटका सबै क्षेत्रमा विद्युत् सेवा पुनः सञ्चालनमा आइसकेको छ। नुवाकोटमा भदौ २४ गतेसम्म सम्पूर्ण क्षेत्रमा विद्युत् सेवा पुनःस्थापित गरिएको थियो भने धादिङमा त्यसअघि नै विद्युत् आपूर्ति नियमित भइसकेको मन्त्रालयले जनाएको छ।
बाढीबाट सबैभन्दा बढी प्रभावित रसुवामा भने करिब ९० प्रतिशत क्षेत्रमा विद्युत् सेवा पुनः सञ्चालन गरिएको छ। प्रवक्ता शाक्यका अनुसार उत्तरगया गाउँपालिका–१ तथा गोसाइँकुण्ड गाउँपालिकाका वडा नं. १, २ र ३ बाहेक जिल्लाका अन्य अधिकांश क्षेत्रमा विद्युत् आपूर्ति सुचारु गरिएको छ।
राष्ट्रिय विद्युत् वितरण प्रणाली तत्काल पुग्न नसकेका क्षेत्रमा वैकल्पिक उपायमार्फत विद्युत् सेवा उपलब्ध गराउने काम भइरहेको मन्त्रालयले जनाएको छ। त्यस्ता क्षेत्रमा वैकल्पिक ऊर्जा प्रवद्र्धन केन्द्रको समन्वयमा संस्थागत तथा घरेलु सौर्य ऊर्जा प्रणाली जडान गरी क्रमशः विद्युत् सेवा पुनः सञ्चालन भइरहेको प्रवक्ता शाक्यले जानकारी दिए।
बाढीका कारण क्षतिग्रस्त विद्युत् संरचनाको मर्मत तथा पुनःनिर्माणसँगै बाँकी प्रभावित क्षेत्रमा पनि विद्युत् आपूर्ति नियमित गर्ने काम जारी रहेको मन्त्रालयले जनाएको छ।
