काठमाडौं । लगातारको वर्षासँगै आएको बाढीपहिरोका कारण देशका विभिन्न स्थानमा सडक तथा राजमार्ग अवरुद्ध भएका छन्। पहिरो, लेदो र ढुंगा खस्दा दर्जनौँ सडकखण्डमा यातायात प्रभावित भएको छ भने बागलुङमा पहिरोमा परी १० जनाको मृत्यु भएको छ। एकजना अझै बेपत्ता छन्।
प्रहरी प्रधान कार्यालयले सोमबार बिहान ७ बजे सार्वजनिक गरेको विवरणअनुसार देशका विभिन्न जिल्लामा मुख्य राजमार्गदेखि स्थानीय सडकसम्म पहिरोका कारण यातायात अवरुद्ध भएको छ। कतिपय सडकखण्ड पूर्ण रूपमा बन्द भएका छन् भने केही स्थानमा सडक खुलाउने प्रयास भइरहेको छ।
देशभरका विभिन्न सडकखण्ड अवरुद्ध
पाल्पाको तानसेन–१४ स्थित गाईघाट–तानसेन सडकखण्ड पहिरोका कारण पूर्ण रूपमा बन्द भएको छ। ललितपुरको टाकुर्चेमा लेदोसहित पहिरो खसेको तथा पाङदुरडोलमा भिरबाट ढुंगा खसेपछि कान्ति लोकपथसमेत अवरुद्ध भएको प्रहरीले जनाएको छ।
लमजुङमा खरखरे भीरमा पहिरो खसेपछि बेँसीसहर–मनाङ सडकखण्ड पूर्ण रूपमा बन्द छ। आँपचौर क्षेत्रमा पहिरोका कारण मध्यपहाडी लोकमार्ग सडक भासिएर यातायात ठप्प भएको छ।
स्याङ्जाको पुतलीबजार–१ स्थित तिनधारे, सार्वजनिक शौचालय र बसपार्क क्षेत्रमा लेदोसहितको पहिरो खसेपछि सिद्धार्थ राजमार्ग पनि अवरुद्ध भएको छ। तनहुँमा पृथ्वी राजमार्ग पूर्ण रूपमा बन्द रहेको प्रहरीले जनाएको छ।
हुम्लाको सर्केगार्ड–१ खच्चामा पहिरो गएपछि कर्णाली करिडोर अवरुद्ध भएको छ। नवलपरासी पूर्वमा कालीगण्डकी करिडोरमा पनि यातायात सञ्चालन हुन सकेको छैन। मुस्ताङको जोमसोम–कोरला सडकखण्ड र दार्चुलाको महाकाली राजमार्गसमेत अवरुद्ध छन्।
यसैगरी म्याग्दीको बेनी–जोमसोम सडक, मकवानपुरको हेटौँडा–भैँसे–भीमफेदी–फाखेल–काठमाडौं सडक, तुलसीपुर–घोराही सडक र जोमसोम–कोरला सडकमा समेत यातायात प्रभावित भएको छ।
काभ्रेको बीपी राजमार्ग र अरनिको राजमार्ग, ओखलढुंगाको सिद्धिचरण लोकमार्ग तथा मनाङको चामे–बेँसीसहर सडकखण्ड पनि पूर्ण रूपमा अवरुद्ध रहेको प्रहरीले जनाएको छ।
त्यस्तै, गुल्मीको सिस्नेभिर–रुद्रबिनी–वामीटक्सार सडक, बागलुङको मध्यपहाडी लोकमार्ग, रोल्पाको घोराही–थवाङ–रुकुम सहिदमार्ग र कालिकोटको कर्णाली राजमार्गमा पनि पहिरोका कारण यातायात प्रभावित भएको छ। गुल्मीका अन्य राजमार्गहरूमा समेत अवरोध रहेको प्रहरी प्रधान कार्यालयले जनाएको छ।
तनहुँमा पहिरोले पृथ्वी राजमार्ग पूर्ण रूपमा अवरुद्ध
पृथ्वी राजमार्गअन्तर्गत तनहुँको व्यास नगरपालिका–१२ घाँसीकुवामा सोमबार बिहान पहिरो खस्दा राजमार्ग पूर्ण रूपमा अवरुद्ध भएको छ।
लेदोसहितको पहिरो खसेपछि यातायात सेवा प्रभावित भएको जिल्ला प्रहरी कार्यालय तनहुँले जनाएको छ। पहिरोका कारण सडक अवरुद्ध भएको खबर प्राप्त हुनासाथ जिल्ला प्रहरी कार्यालयबाट प्रहरी टोली घटनास्थलमा खटिएको थियो।
पहिरो पन्छाएर सडक सञ्चालनमा ल्याउने पहल भइरहेको प्रहरी नायब उपरीक्षक द्वारिकाप्रसाद घिमिरेले बताए। रासस
बागलुङमा पहिरोमा परी १० जनाको मृत्यु, एक बेपत्ता
अविरल वर्षापछि आएको पहिरोमा परी बागलुङमा १० जनाको मृत्यु भएको छ भने एकजना बेपत्ता भएका छन्। वर्षाका कारण पछिल्लो दुई दिनमा जिल्लामा ठूलो मानवीय क्षति भएको हो।
आइतबार मात्रै नौजनाको मृत्यु भएको छ भने एकजना बेपत्ता छन्। शनिबार एकजनाको मृत्यु भएको थियो।
जिल्ला प्रहरी कार्यालय बागलुङका प्रहरी प्रमुख फणिन्द्र प्रसाईंका अनुसार आइतबार तमानखोला गाउँपालिकामा चारजनाको मृत्यु, एकजना बेपत्ता र निसीखोला गाउँपालिकामा पाँचजनाको मृत्यु भएको छ।
तमानखोलामा पहिरोले घर पुरिँदा चारजनाको मृत्यु
तमानखोला गाउँपालिका–३ धर्नासुकमा घर पुरिँदा ८० वर्षीय बुद्धिराज घर्ती र ६६ वर्षीया भीमदेवी घर्तीको मृत्यु भएको छ। सोही स्थानमा पहिरोले आठ घर बगाएको छ।
तमानखोला गाउँपालिका–४ सन्तरमा पहिरोले घर पुरिँदा ५० वर्षीय हस्तवीर श्रीपाली र ६५ वर्षीया उडिसरा श्रीपालीको मृत्यु भएको छ। हस्तवीरकी श्रीमती पहिरोमा परी बेपत्ता भएकी छन्।
निसीखोलामा एकै परिवारका चारजनाको मृत्यु
निसीखोला गाउँपालिका–३ जुग्जाखोलाको हदधारामा पहिरोले घर पुरिँदा एकै परिवारका चारजनाको मृत्यु भएको छ।
मृत्यु हुनेमा ३६ वर्षीया श्यामकुमारी विक, उनका छोरा १३ वर्षीय मनोज, आठ वर्षीय मुकेश र तीन वर्षीय निशान विक छन्।
यस्तै, निसीखोला गाउँपालिका–६ रंगिलमा पहिरोले गोठ पुरिँदा ५० वर्षीय सूर्यबहादुर घर्तीको मृत्यु भएको छ।
शनिबार पनि एकजनाको मृत्यु
शनिबार ताराखोला गाउँपालिका–५ धस्मरमा पहिरोले घर पुरिँदा ५९ वर्षीय मनबहादुर रोकाको मृत्यु भएको थियो। यससँगै पछिल्लो दुई दिनमा बागलुङमा पहिरोका कारण ज्यान गुमाउनेको संख्या १० पुगेको हो।
बागलुङका प्रमुख जिल्ला अधिकारी कृष्णप्रसाद आचार्यका अनुसार पूर्वसूचनाका कारण थप मानवीय क्षति हुनबाट जोगिएको छ। पहिरो प्रभावित क्षेत्रमा उद्धारका लागि नेपाली सेनाको हेलिकोप्टरसहित सुरक्षा अधिकारीको टोली पुगेको थियो।
लगातारको वर्षाका कारण सडक तथा राजमार्ग अवरुद्ध हुनुका साथै विभिन्न जिल्लामा बाढी र पहिरोको जोखिम बढेको छ। अवरुद्ध सडकमा सुरक्षाकर्मी परिचालन गरी पहिरो पन्छाउने तथा यातायात सञ्चालनमा ल्याउने प्रयास भइरहेको प्रहरीले जनाएको छ।
यात्रा गर्नुपर्ने सर्वसाधारणलाई सम्बन्धित सडक तथा राजमार्गको पछिल्लो अवस्था बुझेर मात्रै यात्रा गर्न तथा पहिरोको जोखिम रहेका क्षेत्रमा विशेष सावधानी अपनाउन आग्रह गरिएको छ।
