काठमाडौं । चितवनको नारायणगढस्थित नारायणी नदीको पुलको पिलरमा अड्किएको ‘राइनो क्रुज’ निकाल्न थालिएको छ।
नदीमा पानीको बहाव घटेपछि क्रुजलाई सुरक्षित रूपमा हटाउन यान्त्रिक उपकरणसहित उद्धार टोली परिचालन गरिएको हो।
अविरल वर्षापछि आएको भीषण बाढीले किनारमा बाँधेर राखिएको साढे दुई तले क्रुजलाई बगाएर पुलको पिलरसम्म पुर्याएको थियो। क्रुज पिलरमा अड्किएपछि पुलमा समेत क्षति पुग्ने जोखिम बढेको थियो।
स्थानीय प्रशासनले आइतबार साँझदेखि नारायणी पुलमा सवारीसाधन र पैदलयात्रामा रोक लगाएको थियो। अहिले भने पुलबाट सवारीसाधनको आवतजावत खुला गरिएको छ।
नवलपुरको गैँडाकोटस्थित नारायणी नदीमा ‘राइनो क्रुज’ गत माघ १८ गतेदेखि सञ्चालनमा आएको थियो।
