काठमाडौं । अमेरिकाको न्यूयोर्कमा रहेका उपल्लो मुस्ताङका नेपालीहरूले भोटेकोशी र त्रिशूली बाढीबाट प्रभावित परिवारका लागि १ लाख ४ हजार ६ सय ८८ अमेरिकी डलर, अर्थात् करिब १ करोड ६० लाख रुपैयाँ आर्थिक सहयोग गरेका छन्।
प्रधानमन्त्री दैवीप्रकोप उद्धार कोषमा रकम हस्तान्तरण
लो-न्यामशिप एशोसिएसन यूएसए इंकको पहलमा लोमान्थाङ तथा लो-घेकर दामोदरकुण्ड क्षेत्रका नेपाली र शुभेच्छुकबाट उक्त रकम संकलन गरिएको हो। संकलित सहयोग प्रधानमन्त्री दैवीप्रकोप उद्धार कोषमा हस्तान्तरण गरिएको संस्थाले जनाएको छ।
राहत तथा पुनरुत्थानमा सहयोग पुग्ने अपेक्षा
संस्थाका अनुसार संकलित रकम बाढीपहिरोबाट प्रभावित परिवारको राहत तथा पुनरुत्थानका कार्यमा उपयोग हुनेछ। विपद्बाट प्रभावित समुदायलाई आवश्यक सहयोग उपलब्ध गराउने उद्देश्यले आर्थिक सहयोग जुटाइएको जनाइएको छ।
सन् २०१४ मा स्थापना भएको लो-न्यामशिप एशोसिएसन यूएसए इंक न्यूयोर्कको क्वीन्समा सक्रिय संस्था हो। यसले उपल्लो मुस्ताङको संस्कृति, भाषा तथा बौद्ध परम्पराको संरक्षणसँगै समुदायबीच सामाजिक एकता कायम गर्न विभिन्न गतिविधि सञ्चालन गर्दै आएको छ।
