काठमाडौं । अविरल वर्षापछि आएको बाढी, पहिरो र ढुङ्गा खस्दा हुम्लाका मुख्य तथा ग्रामीण सडक अवरुद्ध भएका छन्। सिमकोट–हिल्सा सडक, कर्णाली करिडोर र सातवटै गाउँपालिकाका ग्रामीण सडकमा क्षति पुगेपछि यातायात सेवा प्रभावित भएको हो।
जिल्ला प्रहरी कार्यालयका अनुसार विभिन्न स्थानमा पहिरो र ढुङ्गा खस्नुका साथै बाढीले कल्भर्टलगायतका संरचना बगाएको छ। कर्णाली करिडोरअन्तर्गत कवाडी–हिल्सा खण्डका केही स्थानमा सडक पूर्ण रूपमा अवरुद्ध भएकोमा कवाडी–गिउसी खण्ड भने पहिरो र ढुङ्गा हटाएर सञ्चालनमा ल्याइएको छ।
प्रमुख जिल्ला अधिकारी भोलानाथ गुरागाईंका अनुसार ग्रामीण सडकमा ७० भन्दा बढी स्थानमा पहिरो गएको छ। सडक खुलाउन जिल्ला प्रशासन कार्यालयले स्थानीय तह तथा सम्बन्धित निकायसँग समन्वय गरिरहेको जनाएको छ।
यस्तै, नाम्खा गाउँपालिकाको नारा लेक र लिमी जाने न्यालु लेकमा करिब साढे तीन फिट हिउँ जमेकाले ती सडक पनि बन्द भएका छन्।
सडक अवरुद्ध हुँदा खाद्यान्न तथा दैनिक उपभोग्य सामग्री ढुवानी, बिरामीको आवागमन र अन्य अत्यावश्यक सेवा प्रभावित भएका छन्।
