काठमाडौं । नेपाल राष्ट्र बैंकले पाँच सय रुपैयाँ दरका नयाँ नोट आजदेखि औपचारिक रूपमा बजारमा प्रचलनमा ल्याएको छ। नयाँ नोटमा राष्ट्र बैंकका गभर्नर प्रा. डा. विश्वनाथ पौडेलको दस्तखत समावेश गरिएको छ भने आकार, रंग र डिजाइन पुरानै संस्करणसँग मिल्दोजुल्दो राखिएको छ।
राष्ट्र बैंकका अनुसार झ३८ ०००००१ देखि ट८३ ९९९९९९ सम्मका संकेत नम्बर भएका नोटहरू क्रमशः बजारमा पठाइएका हुन्। नेपाली नोट छपाइ प्रणालीअनुसार प्रत्येक संकेत अक्षरअन्तर्गत करिब १० लाख थान नोट उत्पादन हुने भएकाले यसपटक करिब ३० लाख थान नयाँ पाँच सय रुपैयाँका नोट चलनचल्तीमा आउने अनुमान गरिएको छ।
यसअघि २०७८ पुस ९ गते २०२० सिरिजअन्तर्गत २ लाख ४८ हजार थान पाँच सय रुपैयाँका नोट जारी गरिएको थियो। हाल जारी गरिएको नयाँ श्रृंखला भने तुलनात्मक रूपमा ठूलो परिमाणमा बजार प्रवेश गरेको हो।
नयाँ नोटमा सगरमाथा र लालीगुराँसको चित्र समावेश गरिएको छ। अगाडिको भागमा बायाँतर्फ विश्वको सर्वोच्च शिखर सगरमाथा र दायाँतर्फ राष्ट्रिय फूल लालीगुराँसको पानी छाप राखिएको छ भने तल ‘सिरिज नम्बर २०८२’ उल्लेख गरिएको छ।
नोटलाई दृष्टिविहीन तथा फरक क्षमता भएका व्यक्तिले सजिलै पहिचान गर्न सकून् भन्ने उद्देश्यले पानी छापको बायाँतर्फ दुईवटा कालो थोप्ला राखिएको छ।
सुरक्षा पक्षलाई थप मजबुत बनाउन सगरमाथाको दायाँतर्फ अण्डाकार भित्र कुबेरको चित्र समावेश गरिएको छ, जसले प्रकाशअनुसार रंग परिवर्तन गर्ने विशेषता राख्छ। साथै, ३.५ मिलिमिटर चौडा सुरक्षण धागो प्रयोग गरिएको छ, जसले कोणअनुसार रातो र हरियो रङ देखाउँछ।
पछाडिको भागमा नेपालको राष्ट्रिय वन्यजन्तु पाटेबाघको चित्र राखिएको छ। त्यस भागमा ‘नेपाल राष्ट्र बैंक’ लेखिएको छ भने ‘रुपैयाँ पाँच सय’ र ‘२०२५ एडी’ उल्लेख गरिएको छ।
राष्ट्र बैंकले नयाँ नोट प्रयोग गर्दा सुरक्षा चिन्हहरूको जानकारी लिएर मात्र कारोबार गर्न सर्वसाधारणलाई आग्रह गरेको छ।
