काठमाडौं । विश्व फुटबलको सबैभन्दा ठूलो प्रतियोगिता विश्वकप २०२६ नजिकिदै गर्दा सबै चासो अब फुटबलको यस महाकुम्भतर्फ भएको छ । संयुक्त राज्य अमेरिका, मेक्सिको र क्यानडामा आयोजना हुन लागेको यो संस्करण अहिलेसम्मकै ठूलो मानिएको छ । यसपटक ४८ टोली सहभागी हुँदैछन्, जसले गर्दा पहिलो पटक धेरै नयाँ र चर्चित खेलाडीहरू विश्व मञ्चमा देखिन लागेका छन् ।
लामो समयदेखि प्रतीक्षा गरिरहेका केही खेलाडी उमेर वा चोटका कारण पहिलेका विश्वकप गुमाएका थिए भने केही आफ्नो देशले छनोट नपाउँदा बाहिर थिए । अब उनीहरू पहिलो पटक विश्वकपको दबाब र चमकबीच मैदानमा उत्रिँदैछन् ।
इर्लिङ हालान्ड (नर्वे)
नर्वेले सन् १९९८ पछि पहिलो पटक विश्वकपमा स्थान बनाएको हो । टोलीमा मार्टिन ओडेगार्ड, एन्टोनियो नुसा र अलेक्जेन्डर सर्लोथजस्ता नाम भए पनि सबैभन्दा ठूलो आकर्षण स्ट्राइकर इर्लिङ हालान्ड रहनेछन् । हालान्डको अन्तर्राष्ट्रिय रेकर्ड निकै रोचक छ, ४९ खेलमा ५५ गोल । तर यो उनको पहिलो विश्वकप मात्र होइन, अहिलेसम्म कुनै ठूलो अन्तर्राष्ट्रिय प्रतियोगितामा नखेलेको पनि पहिलो अवसर हो । नर्वे समूह चरणमा इराक, सेनेगल र फ्रान्ससँग खेल्नेछ। विशेषगरी फ्रान्ससँगको खेलमा उनीमाथि ठूलो नजर रहनेछ ।
लामिन यमल (स्पेन)
१८ वर्षका यामल अहिले स्पेनको भविष्य मात्र होइन, वर्तमानका पनि निर्णायक खेलाडी बनिसकेका छन् । बार्सिलोनाबाट १५ वर्षमै डेब्यु गरेर चर्चामा आएका उनले युरो २०२४ मा स्पेनलाई उपाधि जिताउन निर्णायक भूमिका खेलेका थिए । सेमिफाइनलमा फ्रान्सविरुद्ध गरेको शानदार गोल र निर्णायक पासहरूले उनलाई विश्व फुटबलको केन्द्रमा ल्याएको थियो । अब विश्वकपमा पनि स्पेनको मुख्य आक्रमण यिनै युवा खेलाडीमा निर्भर रहनेछ ।
फ्लोरियन भिर्ट्ज (जर्मनी)
लिभरपुलले भारी रकममा अनुबन्ध गरेका भिर्ट्ज जर्मनीको आक्रमणको मुख्य मस्तिष्क हुन् । चोटका कारण उनले सन् २०२२ विश्वकप गुमाएका थिए । युरो २०२४ मा उनले दुई गोल गर्दै आफ्नो क्षमता देखाइसकेका छन् । अहिले उनी जर्मनीका लागि खेल सिर्जना गर्ने मुख्य खेलाडी मानिन्छन् । जामाल मुसियालासँगको उनको जोडीले जर्मनीको आक्रमणलाई नयाँ स्वरूप दिने अपेक्षा गरिएको छ ।
लुइस डियाज (कोलम्बिया)
२९ वर्षका डियाजले पहिलो पटक विश्वकप खेल्दैछन् । अचम्मको कुरा के हो भने यति अनुभवी खेलाडीले अहिलेसम्म विश्वकप खेल्न पाएनन्, किनभने कोलम्बिया सन् २०२२ मा छनोट हुन सकेको थिएन । लिभरपुल र बायर्न म्युनिख दुवै क्लबमा उनले उच्च स्तरको प्रदर्शन गरिसकेका छन् । पछिल्लो सिजन उनले २६ गोल र १९ असिस्ट गरेका थिए । यदि उनले यही लय कायम राखे भने कोलम्बियालाई गहिरो चरणसम्म पुर्याउने प्रमुख आधार बन्न सक्छन् ।
माइकल ओलिस (फ्रान्स)
बायर्न म्युनिखका ओलिसे पछिल्लो सिजन युरोपको सबैभन्दा प्रभावशाली खेलाडीमध्ये एक बने । २५ गोल र २८ असिस्टसहित उनले आफ्नो नाम विश्व फुटबलको शीर्ष सूचीमा लेखाइसकेका छन् । फ्रान्स टोलीमा उनी अब पहिलो रोजाइको हिस्सा बन्ने सम्भावना बलियो छ । डिजिरे डुएजस्ता प्रतिभालाई समेत पछि पार्दै उनले आफ्नो स्थान मजबुत बनाएका छन् ।
जोआओ नेभेस (पोर्चुगल)
२१ वर्षमै युरोपका उत्कृष्ट मिडफिल्डरमध्ये एक बनेका नेभेस पिएसजीसँग दुई पटक च्याम्पियन्स लिग जितिसकेका छन् । पोर्चुगल टोलीमा धेरै मिडफिल्ड विकल्प भए पनि उनले आफ्नो मेहनत र लगातार प्रदर्शनबाट स्थान बनाइरहेका छन् । कहिलेकाहीँ राइट ब्याकमा पनि खेल्न बाध्य भए पनि अब उनी मिडफिल्डमा पूर्ण रूपमा स्थापित हुने अपेक्षा गरिएको छ ।
निको पास (अर्जेन्टिना)
अर्जेन्टिनाका लागि नयाँ र महत्वपूर्ण नाम बनेका निको पास अहिले युरोपमा सबैभन्दा खोजिने प्लेमेकरमध्ये एक हुन् । कोमो क्लबबाट उत्कृष्ट प्रदर्शन गर्दै उनले इटालियन लिगमा उत्कृष्ट मिडफिल्डरको उपाधि समेत जितेका छन् । रियल मड्रिडले उनलाई पुनः फर्काउने तयारी गरिरहेको छ । लियोनेल मेसी नेतृत्वको अर्जेन्टिनालाई लगातार दोस्रो विश्वकप जिताउने योजनामा उनी महत्त्वपूर्ण हिस्सा बन्न सक्छन् ।
फोलारिन बालोगुन (संयुक्त राज्य अमेरिका)
अमेरिकाको आक्रमणमा लामो समयदेखि समस्या रहँदै आएको थियो । त्यही खाली ठाउँ पूरा गर्न बालोगुनलाई मुख्य आशा मानिएको छ । मोनााकोबाट खेल्ने उनले यस सिजन १९ गोल गरेका छन् र लगातार गोल गर्ने क्षमताका कारण चर्चामा छन् । इंग्ल्यान्डबाट राष्ट्रियता परिवर्तन गरेर अमेरिकी टोलीमा आएका उनले कोपा अमेरिकामा पनि आफ्नो क्षमता देखाइसकेका छन् ।
आर्दा ग्युलर (टर्की)
रियल मड्रिडका २१ वर्षीय ग्युलर टर्कीका लागि सबैभन्दा ठूलो आशा हुन्। युरो २०२४ मा उनले गोल, असिस्ट र सिर्जनात्मक खेलबाट सबैको ध्यान तानेका थिए । क्लब स्तरमा उनले किलियन एमबाप्पेसँग राम्रो समझदारी बनाउँदै १६ असिस्ट र ७ गोल गरेका छन्। टर्कीको आक्रमण यिनै युवा खेलाडीको वरिपरि घुम्नेछ ।
यान डियोमान्डे (आइभोरी कोस्ट)
१९ वर्षका डियोमान्डे अहिले युरोपका सबैभन्दा चर्को रूपमा हेरिएका युवा विङ्गर हुन् । लिभरपुल र पिएसजीले उनलाई पछ्याइरहेका छन् । अफ्रिका कप अफ नेसन्समा राम्रो प्रदर्शन गरेका उनी अब विश्वकपमा आफ्नो क्षमता प्रमाणित गर्न तयार छन् । गति, ड्रिब्लिङ र आक्रमणमा उनको प्रभाव टोलीका लागि निर्णायक हुन सक्छ ।
