काठमाडौँ । फुटबल विश्वकपको चर्चा गर्दा ब्राजिलको नाम सबै भन्दा पहिला आउने नाम हो । खेल्ने शैली र विश्वका उत्कृष्ट खेलाडीको भरपूर्ण ब्राजिल पछिल्ला विश्वकपमा आफ्नो नाम अनुसारको खेल खेल्न असफल भएको छ ।
२००२ मा जापान र दक्षिण कोरियामा भएको विश्वकपपछि ब्राजिल फाइनलमा पुग्न पनि सकेको छैन । पछिल्लो पटक आफ्नै देशमा आयोजित विश्वकपमा ब्राजिल २०१४ मा सेमिफाइनलमा नेदरल्याण्डससँग पराजित भएको थियो ।
समग्रमा ब्राजिल अहिले राम्रो अवस्थामा छैन । यसको प्रमाण नेइमारको फिटनेस पछिल्ला महिनामा अन्तर्राष्ट्रिय बहसको विषय बनेको छ । अझ अचम्म त के भने, केही ब्राजिली समर्थकहरू मान्छन्— यो ३४ वर्षे फरवार्ड बिना टोलीले आगामी विश्वकप जित्नै सक्दैन, यद्यपि उनी २०२३ यता लगातार फिट पनि छैनन् र उच्च स्तरको प्रदर्शन पनि देखाउन सकेका छैनन् । पूर्व मिडफिल्डर फेलिपे मेलोले त अझै अगाडि बढेर एक खुट्टा भए पनि नेइमार नै ब्राजिलका लागि उत्कृष्ट नम्बर १० भएको बताएर पनि उनको ब्राजिलको टिममा भूमिका स्पष्ट हुन्छ । यसले नै ब्राजिलको आक्रमण लाइनप्रति कति ठूलो अविश्वास छ भन्ने देखाउछ।
तर ब्राजिलको २०२६ विश्वकप अभियानको मुख्य कुरा नेइमारको उपस्थितिमा मात्र निर्भर छैन । धेरैको बुझाइमा यो जिम्मेवारी अब प्रशिक्षक कार्लो अन्सेलोटीको काँधमा पुगेको छ, जसलाई विश्व फुटबलका सबैभन्दा सफल प्रशिक्षकमध्ये एक मानिन्छ ।
अन्सेलोटीलाई ब्राजिलको प्रशिक्षक बनाउने चर्चा लामो समयदेखि चल्दै आएको थियो । ब्राजिल फुटबल महासंघका तत्कालीन अध्यक्ष एडनाल्डो रोड्रिगेजले २०२३ मै भनेका थिए । उनी खेलाडीहरूबीच अत्यन्त सम्मानित र रोनाल्डो नाजारियोदेखि भिनिसियस जुनियरसम्म सबैले उनलाई मन पराउँछन् । उनले अन्सेलोटीलाई इमानदार, स्थिर र अत्यन्त सफल प्रशिक्षक भन्दै उनको प्रशंसा गरेका थिए । ब्राजिलभरि समर्थकहरूले पनि उनको नाम बारम्बार लिने गरेको बताइएको थियो । खेलाडीहरू पनि उनको सम्भावित आगमनलाई लिएर उत्साहित थिए । म्यानचेस्टर सिटीका गोलकिपर एडरसनले त मजाक गर्दै भनेका थिए- रियल म्याड्रिड च्याम्पियन्स लिगबाट बाहिरियोस् ताकि अन्सेलोटी चाँडै ब्राजिल आउन सकून् ।
अन्सेलोटीले सुरुमा आफ्नो सम्झौता २०२४ सम्म रहेको भन्दै ब्राजिल जाने चर्चा अस्वीकार गरेका थिए । पछि उनले २०२६ सम्म सम्झौता थपे । तर फुटबलमा परिस्थिति छिटो बदलिन्छ । रियल म्याड्रिडले २०२४-२५ सिजन ट्रफीविहीन समाप्त गरेपछि क्लबमा ठूलो पुनर्संरचना भयो र अन्सेलोटीको युरोपेली यात्रा अन्त्यतिर पुग्यो । उनी आफैंले पनि म्याड्रिडमा बिताएको समयलाई सफल र अविस्मरणीय बताएका थिए, तर सबै कुराको अन्त्य हुन्छ भन्ने स्वीकार गरेका थिए ।
ब्राजिल पाँच पटकको विश्व च्याम्पियन हो, तर २००२ पछि उपाधि जित्न सकेको छैन। पछिल्ला वर्षहरूमा उनीहरूको समस्या केवल हार मात्र होइन, पहिचान गुमाउनु पनि हो ।
पहिलेको ‘सुन्दर फुटबल’ अहिले हराएको भन्दै धेरै समर्थक निराश छन् । यहाँसम्म कि ब्राजिलका महान खेलाडी रोनाल्डिन्होले २०२४ मा राष्ट्रिय टोलीको समर्थनबाट अलग भएको जस्तो घोषणा गरेका थिए । उनले टोलीलाई कमजोर, नेतृत्वविहीन र औसत खेलाडीहरूको समूह भनेका थिए ।
ब्राजिलले २०२४ को कोपा अमेरिका पनि निराशाजनक रूपमा समाप्त गर्यो । उरुग्वेसँग पेनाल्टीमा हारेर क्वार्टरफाइनलबाट बाहिरियो । पछि प्रशिक्षक डोरिभाललाई हटाइयो, विशेषगरी अर्जेन्टिनासँग ४–१ को लज्जास्पद हारपछि । यसपछि अन्सेलोटीको आगमनलाई ब्राजिल फुटबल पुनर्जीवनको संकेतका रूपमा हेरियो । अन्सेलोटीले अहिलेसम्म ११ खेल सम्हालेका छन्, जसमा ६ जित मात्र आएको छ । नतिजा र प्रदर्शन दुवै अस्थिर देखिएको छ । जापानसँगको ३–२ हार विशेष रूपमा आलोचित रह्यो, जहाँ ब्राजिल २–० ले अगाडि भएर पनि दोस्रो हाफमा तीन गोल खाँदै पराजित भयो । त्यस्तै फ्रान्ससँग २–१ को हार पनि चिन्ताजनक रह्यो, किनभने फ्रान्स १० खेलाडीमा सीमित हुँदा पनि ब्राजिलले राम्रो प्रदर्शन गर्न सकेन ।
तर अन्सेलोटीले भने टोलीले विश्वका उत्कृष्टसँग प्रतिस्पर्धा गर्न सक्छ भन्ने विश्वास व्यक्त गरे, जसलाई धेरैले यथार्थभन्दा टाढा भनेका छन् । ब्राजिल अहिले पूर्ण रूपमा स्थिर टोली देखिँदैन । डिफेन्स र मिडफिल्डमा अनुभव भए पनि गहिराइको अभाव छ ।
यसै कारण नेइमारलाई पुनः टोलीमा फर्काउने दबाब बढेको छ । उनी पूर्ण फिट नभए पनि ब्राजिलको इतिहासकै सबैभन्दा प्रभावशाली आक्रमणकारी मानिन्छन् । अन्सेलोटीले पनि समर्थकको चाहनालाई ध्यानमा राख्दै उनलाई २६ सदस्यीय टोलीमा समावेश गरेको चर्चा छ । ३४ वर्षका नेइमार ब्राजिलका सर्वाधिक गोलकर्ता हुन् । उनले १२८ खेलमा ७९ गोल गरेका छन् । उनी यसअघि सन् २०१४, २०१८ र २०२२ विश्वकपमा पनि खेलेका थिए, र यो उनको चौथो विश्वकप हुनेछ ।
अन्सेलोटीको मुख्य शक्ति केवल रणनीति होइन, खेलाडी व्यवस्थापन हो । उनले ठूलो नाम र ठूला अहंकार भएका खेलाडीहरूलाई एउटै लक्ष्यमा बाँध्न सक्छन् । तर समस्या ब्राजिलसँग अहिले पूर्ण विश्वस्तरीय टोली छैन । धेरै स्थानमा अनुभव र गहिराइको कमी देखिन्छ । यद्यपि अन्सेलोटी विश्वास गर्छन्, विश्वकपमा कुनै पनि टोली पूर्ण हुँदैन, तर सही नेतृत्वले फरक पार्न सक्छ । अब प्रश्न एउटै छ, के अन्सेलोटीले कमजोर देखिएको ब्राजिललाई फेरि विश्वकप जिताउने स्तरमा पुर्याउन सक्लान् ?
ब्राजिलको २६ सदस्यीय टोली
गोलरक्षक: अलिसन बेकर, एडरसन र वेभर्टन ।
डिफेन्डर: एलेक्स सान्द्रो, डानिलो, लिओ पेरेइरा, ब्रेमर, इबानेस, वेस्ली, मारक्विन्योस, गाब्रिएल र डग्लास सान्तोस ।
मिडफिल्डर: ब्रुनो गिमारेइस, कासेमिरो, डानिलो सान्तोस, फाबिन्हो र लुकास पाकेटा ।
फरवार्ड: एन्ड्रिक, गाब्रिएल मार्टिनेली, इगोर थियागो, माटेउस कुन्हा, राफिन्हा, भिनिसियस जुनियर, लुइज हेनरिक, नेइमार र रायन ।
संयुक्त राज्य अमेरिका, क्यानडा र मेक्सिकोमा आयोजना हुने यस विश्वकपमा ब्राजिलले आफ्नो पहिलो खेल जुन १३ मा मोरक्कोविरुद्ध खेलेर शुरु गर्दैछ । ब्राजिल समुह सी मा मोरक्को, हैटी र स्कटल्यान्डसँग रहेको छ ।
Read More
