काठमाडौँ । फिफा विश्वकप २०२६ जुन ११ देखि सुरु हुँदैछ । अमेरिका, क्यानडा र मेक्सिकोको संयुक्त आयोजनामा हुन लागेको यस संस्करणमा पहिलो पटक ४८ टोलीको सहभागिता रहनेछ । साविक विजेता अर्जेन्टिना पुनः कप्तान लियोनेल मेसीको नेतृत्वमा उपाधि रक्षा गर्ने लक्ष्यसहित मैदानमा उत्रने तयारीमा छ ।

जुन २४ मा ३९ वर्ष पुग्ने मेसीका लागि यो विश्वकप विशेष महत्वको हुन सक्छ । विश्व फुटबलका महानतम खेलाडीमध्ये एक मानिने मेसी सामु यसपटक विश्वकप इतिहासका थुप्रै कीर्तिमान तोड्ने अवसर छ ।

छैटौँ विश्वकप खेल्ने पहिलो खेलाडी बन्ने अवसर

मेसीले पहिलो विश्वकप सन् २००६ मा खेलेका थिए । त्यसपछि उनले २०१०, २०१४, २०१८ र २०२२ संस्करणमा अर्जेन्टिनाको प्रतिनिधित्व गरेका छन् । २०२६ को विश्वकपमा मैदान उत्रिएसँगै उनी आफ्नो छैटौँ विश्वकप खेल्ने खेलाडी बन्नेछन् ।

पोर्चुगलका क्रिस्टियानो रोनाल्डो र मेक्सिकोका गोलरक्षक गुइलेर्मो ओचोआ पनि यो उपलब्धिनजिक रहेका छन् । तर मेसी अर्जेन्टिनाबाट छैटौँ विश्वकप खेल्ने पहिलो खेलाडी बन्नेछन् ।

विश्वकप इतिहासकै सर्वाधिक गोलकर्ताको कीर्तिमान पछ्याउँदै मेसीले हालसम्म विश्वकपमा २६ खेल खेल्दै १३ गोल गरेका छन् । उनी अर्जेन्टिनाका लागि विश्वकप इतिहासमा सर्वाधिक गोल गर्ने खेलाडी हुन् । विश्वकपमा सबैभन्दा धेरै गोल गर्ने कीर्तिमान जर्मनीका मिरोस्लाभ क्लोजेको नाममा छ । उनले २४ खेलमा १६ गोल गरेका थिए ।

यदि मेसीले २०२६ विश्वकपमा चार वा सोभन्दा बढी गोल गर्न सके, उनले क्लोजेलाई उछिन्दै विश्वकप इतिहासकै सर्वाधिक गोलकर्ता बन्नेछन् । अर्जेन्टिनाको बलियो टोली र मेसीको अनुभवलाई हेर्दा यो उपलब्धि असम्भव मानिएको छैन ।

पाँच फरक विश्वकपमा गोल गर्ने दोस्रो खेलाडी बन्ने सम्भावना

मेसीले २००६, २०१४, २०१८ र २०२२ विश्वकपमा गोल गरिसकेका छन् । यदि उनले २०२६ संस्करणमा पनि कम्तीमा एक गोल गरे भने पाँच फरक विश्वकपमा गोल गर्ने विश्वका दोस्रो खेलाडी बन्नेछन् । हाल यो कीर्तिमान केवल क्रिस्टियानो रोनाल्डोको नाममा छ । उनले २००६ देखि २०२२ सम्म लगातार पाँच विश्वकपमा गोल गरेका थिए । मेसीले यो उपलब्धि हासिल गरे दक्षिण अमेरिकाबाट पाँच फरक विश्वकपमा गोल गर्ने पहिलो खेलाडी पनि बन्नेछन् ।

सर्वाधिक निर्णायक असिस्टको कीर्तिमान पनि नजिक

मेसी केवल गोलकर्ता मात्र होइनन्, गोल सिर्जना गर्ने खेलाडीका रूपमा पनि परिचित छन् । उनले विश्वकपमा हालसम्म आठ निर्णायक असिस्ट गरेका छन् ।

यस सूचीमा उनी अर्जेन्टिनाका महान खेलाडी डिएगो म्याराडोनासँग बराबरीमा छन् । यदि २०२६ विश्वकपमा उनले एक निर्णायक असिस्ट थप्न सके अर्जेन्टिनाका लागि विश्वकप इतिहासमा सर्वाधिक निर्णायक पास दिने खेलाडी बन्नेछन् । विश्वकप इतिहासमा सर्वाधिक नौ निर्णायक असिस्ट दिने कीर्तिमान पश्चिम जर्मनीका फ्रिट्ज वाल्टरको नाममा छ । मेसी यो कीर्तिमान बराबरी गर्न एक र तोड्न दुई निर्णायक पास टाढा छन् ।

कप्तानका रूपमा दुई पटक विश्वकप जित्ने पहिलो खेलाडी बन्ने लक्ष्य

मेसीले २०२२ मा अर्जेन्टिनालाई विश्वविजेता बनाएका थिए । यदि उनले २०२६ मा पनि टोलीलाई उपाधि दिलाउन सके विश्व फुटबल इतिहासमा कप्तानका रूपमा दुई पटक विश्वकप जित्ने पहिलो खेलाडी बन्नेछन् । विश्व फुटबलका धेरै महान कप्तानले विश्वकप उचाले पनि कसैले दुई पटक कप्तानका रूपमा यो उपलब्धि हासिल गर्न सकेका छैनन् ।

अर्को ऐतिहासिक उपलब्धिको सम्भावना

मेसीको कप्तानीमा अर्जेन्टिना २०१४ र २०२२ विश्वकपको फाइनलमा पुगिसकेको छ । यदि अर्जेन्टिना २०२६ मा पनि फाइनलमा पुग्यो भने मेसी विश्वकप इतिहासमा आफ्नो टोलीलाई तीन पटक फाइनलसम्म पुर्‍याउने पहिलो कप्तान बन्नेछन् ।

कतार विश्वकप २०२२ जितेपछि धेरैले मेसीको विश्वकप यात्रा समाप्त भएको अनुमान गरेका थिए । तर २०२६ मा उनी फेरि अर्जेन्टिनाको आशा र भरोसाको केन्द्र बनेका छन् । यसपटक उनको लक्ष्य केवल अर्को विश्वकप उपाधि जित्नु मात्र होइन, दशकौँदेखि कायम रहेका ऐतिहासिक कीर्तिमानहरू आफ्नो नाममा लेखाउनु पनि हुनेछ । यदि मेसीले आफ्नो लय कायम राख्न सके, फिफा विश्वकप २०२६ ले उनको महान करियरमा अर्को स्वर्णिम अध्याय थप्न सक्छ ।

Read More

काठमाडौँ । पाकिस्तानले अस्ट्रेलियाविरुद्धको एकदिवसीय सिरिज जितेको छ । गएराती सम्पन्न सिरिजको तेस्रो तथा अन्तिम खेल पाकिस्तानले ४ विकेटले जितेको हो  । 

अस्ट्रेलियाले दिएको केवल १५८ रनको लक्ष्य पछाएको पाकिस्तानले ४१.५ ओभरमा ६ विकेट गुमाउदै लक्ष्य पुरा गरेको थियो  । 

पाकिस्तानको जितमा बाबर आजमले सर्बाधिक ४० रन बनाएका थिए भने अस्ट्रेलियाका बलर माथ्यू कुहनेम्यानले ३ विकेट लिएका थिए  । 

यसअघि टस जितेर पहिला ब्याटिंग गरेको अस्ट्रेलियाले ४२ ओभरमा अल आउट हुदै १५७ रन बनाएको थियो  ।  अस्ट्रेलियाका लागि कप्तान जोश इङलिसले सर्बाधिक ६५ एन बनाएका थिए भने पाकिस्तानका बलर शाहिन शाह अफ्रिदीले ३ विकेट लिएका थिए  । 

योसँगै पाकिस्तानले यो सिरिज २-१ ले जितेको छ । सिरिजको पहिलो खेल पाकिस्तानले जितेको थियो भने दोस्रो खेल अस्ट्रेलियाले जितेको थियो  । 

Read More

काठमाडौँ । नेपाल क्रिकेट संघ (क्यान) ले आज भएको एसीसी महिला प्रिमियर कप अन्तर्गत नेपाल र भुटानबीचको खेलमा भुटानी ब्याटरलाई टाइम आउट दिएको विषयप्रति दुख व्यक्त गर्दै भुटान क्रिकेटसँग माफी मागेको छ ।

क्यानका सचिव पारस खड्काले विज्ञप्ति जारी गर्दै टाइम आउटको घटना क्रिकेटको मूल भावना र मूल्यसँग मेल नखाने भन्दै भुटान क्रिकेट संघ, सम्बन्धित खेलाडी तथा सबै सरोकारवालाप्रति पनि संघले क्षमायाचना गरेका हुन् ।

आज भएको खेलमा ढिलो गरि मैदानमा आएकी भुटानी ब्याटर रित्शी छोडेनविरुद्ध नेपालको अपिलपछि आउट दिइएको थियो ।  

महिला राष्ट्रिय टोलीको उक्त व्यवहारप्रति गहिरो खेद व्यक्त गर्दै सचिव खड्काले नियमअनुसार आउट दिइए पनि खेलको भावना केवल नियममा मात्र सीमित नहुने र स्पोर्ट्सम्यानसिप सधैं केन्द्रमा रहनुपर्ने उल्लेख गरेका छन् ।

विकासोन्मुख क्रिकेट राष्ट्रका रूपमा नेपालले खेल भावना, आपसी सम्मान र निष्पक्ष खेललाई उच्च प्राथमिकतामा राख्ने जनाउदै खड्काले यो घटनाले ती मूल्यहरू पूरा गर्न नसकेको स्वीकार गर्दै यसले पारेको असन्तुष्टिप्रति पनि दुःख व्यक्त गरेका छन् ।

साथै उनले भविष्यमा खेलको मैदानभित्र र बाहिर दुवै ठाउँमा उच्च इमानदारी र क्रिकेटको भावना कायम राख्ने प्रतिबद्धता दोहोर्याएका छन् ।

Read More

काठमाडौँ । नेपालले मलेसियालाई १६७ रनको फराकिलो अन्तरले पराजित गरेको छ  ।

एशियन गेम्स अन्तर्गत क्रिकेटतर्फको छनौट खेलमा नेपालले दिएको २७६ रनको विशाल लक्ष्य पछाएको मलेसियाले २० ओभरमा ९ विकेट गुमाउदै १०८ रन मात्र बनाएको थियो ।

मलेसियाका लागि कप्तान सयेद अजिजले सर्बाधिक ५४ रन बनाएका थिए । त्यस्तै नेपाली बलर शेर मल्लले सर्बाधिक ३ विकेट लिएका थिए ।

यसअघि टस हारेर पहिला ब्याटिंग गरेको नेपालले २० ओभरमा ७ विकेट गुमाउदै २७५ रन बनाएको थियो । नेपालका लागि ओपनर कुशल भुर्तेलले विस्फोटक ब्याटिंग गर्दै ५४ बलमा १२६ रनको शतकीय पारी खेलेका थिए । कुशलको यो टी-२० खेलमा लगातार दोस्रो शतक हो । त्यस्तै आरिफ सेखले पनि आक्रमण ब्याटिंग गर्दै २४ बलमा ६८ रन बनाएका थिए । त्यस्तै कप्तान दिपेन्द्र सिंह ऐरीले ११ बलमा ३१ रन बनाए भने सन्दीप जोराले १५ रन बनाएका थिए ।

त्यस्तै मलेसियाका बलर विरनदीप सिंहले ३ विकेट लिएभने सयेद अजिज र विजय उन्नीले २-२ विकेट लिएका थिए ।

यो जितपछि नेपाल समुह विजेता हुदै सेमिफाइनलमा पुगेको छ । त्यस्तै हारका बाबजुत मलेसिया उपविजेता हुदै सेमिफाइनल खेल्ने छ । नेपाल र मलेसिया दुवै एशियन गेम्समा यसअघि नै छनौट भैसकेका छन् ।

अब नेपालले सेमिफाइनलमा कुन देशसँग खेल्छ भन्ने समुह बि का समुह चरणका खेलपछि टुंगो लाग्ने छ ।

Read More

काठमाडौँ । नेपालले मलेसियालाई २७६ रनको लक्ष्य दिएको छ । एशियन गेम्स अन्तर्गत क्रिकेटतर्फको छनौट खेलमा टस हारेर पहिला ब्याटिंग गरेको नेपालले २० ओभरमा ७ विकेट गुमाउदै २७५ रन बनाएको हो ।

नेपालका लागि ओपनर कुशल भुर्तेलले विस्फोटक ब्याटिंग गर्दै ५४ बलमा १२६ रनको शतकीय पारी खेलेका थिए । कुशलको यो टी-२० खेलमा लगातार दोस्रो शतक हो ।

त्यस्तै आरिफ सेखले पनि आक्रमण ब्याटिंग गर्दै २४ बलमा ६८ रन बनाएका थिए । त्यस्तै कप्तान दिपेन्द्र सिंह ऐरीले ११ बलमा ३१ रन बनाए भने सन्दीप जोराले १५ रन बनाएका थिए ।

त्यस्तै मलेसियाका बलर विरनदीप सिंहले ३ विकेट लिएभने सयेद अजिज र विजय उन्नीले २-२ विकेट लिएका थिए ।

Read More

काठमाडौँ । कुशल भुर्तेलले टी- २० क्रिकेटमा लगातार दोस्रो शतक प्रहार गरेका छन् ।

कुशलले आज जारी मलेसियाविरुद्धको एशियन गेम्स अन्तर्गतको खेलमा शतक प्रहार गरेका हुन् । उनले ४४ बलमा १० चौका र ७ छक्का प्रहार गर्दै शतक प्रहार गरेका हुन् ।

यो कुशलको टी- २० क्रिकेटमा लगातार दोस्रो शतक हो भने कुल तेस्रो शतक हो । उनले यसअघि यसै प्रतियोगिताको पहिलो खेलमा चीनविरुद्ध १२९ रनको शतकीय पारी खेलेका थिए ।

यस खेलमा टस हारेर पहिला ब्याटिंग गरिरहेको नेपालले १४.२ ओभरमा २ विकेट गुमाएर १९६ रन बनाएको छ ।

Read More

काठमाडौं । एशियन गेम्सको क्रिकेटतर्फको छनौट खेल अन्तर्गत नेपालले आज मलेसियासँग खेल्दैछ । यस खेलमा नेपालले टस हारेर पहिला ब्याटिंग गर्ने भएको छ ।

नेपाल र मलेसिया दुवै एशियन गेम्समा छनौट भएका छन् भने यस खेलको नतिजाबाट समुह विजेता र उपविजेताको टुंगो लाग्ने छ ।

आजको खेलमा  दिपेन्द्र सिंह ऐरी (कप्तान), कुशल भुर्तेल, आसिफ सेख, रोहित पौडेल, सन्दीप जोरा, कुशल मल्ल, शेर मल्ल, लोकेश बम, सन्दीप लामिछाने, करण केसी, सोमपाल कामी खेल्दै छन् ।

Read More

काठमाडौँ । नेपालले मलेसियामा जारी एसीसी महिला प्रिमियर कपमा लगातार दोस्रो जित हासिल गरको छ । विहिबार सम्पन्न खेलमा नेपालले भुटानलाई ५१ रनले पराजित गरेको हो ।

नेपालले दिएको ११४ रनको लक्ष्य पछाएको भुटानले २० ओभरमा ८ विकेट गुमाउदै ६२ रन मात्र बनाएको थियो । 

यसअघि नेपालले पहिला ब्याटिंग गर्दै २० ओभरमा अल आउट हुदै ११३ रन बनाएको थियो । नेपालले यसअघि बुधबार कतारलाई पराजित गरेको थियो ।

समुह डी मा रहेको नेपालले लगातार दोस्रो जित हासिल गरेको छ । त्यस्तै भुटानले भने लगातार दोस्रो हार बेहोरेको छ । 

अब नेपालले अर्को खेल शनिबार हङकङसँग खेल्ने तालिका रहेको छ । 

Read More

काठमाडौँ । स्पेनका युवा स्टार लामिन यमलको फिटनेसलाई लिएर विश्वकप अघि ठूलो अनिश्चितता देखिएको छ । विश्व फुटबलमा सबैभन्दा चम्किला प्रतिभामध्ये एक मानिने यमल चोटका कारण प्रतियोगिताबाट बाहिरिन सक्ने खतरा बढेको छ ।

१८ वर्षे यमलले युरो २०२४ मा शानदार प्रदर्शन गर्दै सबैको ध्यान तानेका थिए । त्यसपछि बार्सिलोनाका लागि पनि उनी लगातार प्रभावशाली बनेका थिए । तर पछिल्लो सिजनको अन्त्यतिर उनलाई पछाडिको तिघ्रा मांसपेशीमा चोट लागेपछि अवस्था जटिल बनेको हो ।

अप्रिल २२ मा सेल्टा भिगोविरुद्धको खेलमा पेनाल्टीबाट निर्णायक गोल गरेपछि उनी मैदानमै ढलेका थिए । त्यसपछि उनी अझै मैदान फर्किन सकेका छैनन् । प्रारम्भमा चोट सामान्य देखिए पनि पछि यो गम्भीर भएको पुष्टि भएको थियो । चिकित्सकहरूले करिब दुई महिनासम्म आराम आवश्यक पर्न सक्ने बताएका थिए ।

यसैबीच बार्सिलोना र स्पेनिस फुटबल संघबीच उनको उपचार र तयारीलाई लिएर निरन्तर समन्वय भइरहेको छ । बार्सिलोनाले भने यमल विश्वकपका लागि उपलब्ध हुने विश्वास व्यक्त गरेको छ । स्पेनका मुख्य प्रशिक्षक लुइस दे ला फुएन्तेले उनलाई २६ सदस्यीय टोलीमा समावेश गरेका छन् । तर उनी सुरुदेखि नै खेल्न सक्ने अवस्थामा हुने कि नहुने भन्ने अझै स्पष्ट छैन । रिपोर्ट अनुसार यमलले समूह चरणका पहिलो दुई खेल गुमाउन सक्ने सम्भावना छ । स्पेनले समूह चरणमा केप भर्डे र साउदी अरेबियासँग खेल्नेछ भने उरुग्वेसँग अन्तिम खेल हुनेछ ।

प्रशिक्षक दे ला फुएन्तेले भने टोलीमा गहिरो विकल्प भएकाले तत्काल ठूलो समस्या नहुने बताएका छन् । उनले यमल पूर्ण रूपमा फिट नभए पनि पछि महत्वपूर्ण समयमा मैदानमा उतार्न सकिने संकेत दिएका छन् ।

स्पेनसँग यमलको अनुपस्थितिमा पनि आक्रमणमा विकल्प छन् । येरमी पिनो र भिक्टर मुनोज जस्ता खेलाडीले उनको स्थान सम्हाल्न सक्ने सम्भावना छ । यस्तै निको विलियम्स पनि चोटबाट फर्किने तयारीमा छन् । तर स्पेनका लागि मुख्य चिन्ता नकआउट चरणमा यमल पूर्ण रूपमा फिट नभएमा के गर्ने भन्ने हो । किनभने युरोपेली विजेता स्पेनले अन्तिम ३२ मा अस्ट्रिया वा अल्जेरिया जस्ता बलिया टोलीसँग सामना गर्नुपर्ने सम्भावना छ ।

यसअघि यमलले युरो २०२४ मा अन्तिम चरणका खेलहरूमा निर्णायक भूमिका खेलेका थिए । त्यसैले उनलाई स्पेनको भविष्यको प्रमुख खेलाडीका रूपमा हेरिएको छ ।

विश्वकप नजिकिँदै गर्दा यमलको फिटनेसलाई लिएर सबैको ध्यान केन्द्रित भएको छ । यदि उनी समयमै फर्किन सके भने स्पेनका लागि उपाधि यात्रामा ठूलो शक्ति बन्न सक्छन्, तर ढिलाइ भएमा प्रतियोगिताको चमक नै प्रभावित हुन सक्ने विश्लेषण गरिएको छ ।

विश्वकपमा समुह एचमा रहेको स्पेनले पहिलो खेल जुन १५ मा केप भेर्ड़ेसँग खेल्ने छ भने दोस्रो खेल जुन २१ मा साउदी अरेबियासँग र तेस्रो खेल जुन २६ मा उरुग्वेसँग खेल्ने तालिका छ । त्यसअघि स्पेनले जुन ४ मा आफ्नै मैदान आ कोरुनामा इराकसँग मैत्रीपूर्ण खेल खेल्नेछ भने जुन ८ मा मेक्सिकोको पुएब्लामा पेरुसँग अर्को अभ्यास खेल खेल्ने तालिका छ ।

Read More