काठमाडौँ । इङलिश प्रिमियर लिग अन्तर्गत आर्सनलले अर्को जित हासिल गरेको छ ।
गएराती सम्पन्न खेलमा आर्सनलले ब्राइटनलाई २-१ गोल अन्तरले पराजित गरेको हो । आर्सनलको जितमा मार्टिन ओडेगार्डले एक गोल गरेका थिए भने एक गोल ब्राइटनका जर्जिनियो रटरले आत्मघाती गोल गरेका थिए । त्यस्तै ब्राइटनका लागि एक गोल डिएगो गोमेजले गरेका थिए ।
यो जितपछि आर्सनलको १८ खेलमा ४२ अंक भएको छ र लिगमा शिर्ष स्थानमा रहेको छ । त्यस्तै ब्राइटनको १८ खेलमा २४ अंक रहेको छ ।
काठमाडौँ । साउदी प्रो लिग अन्तर्गत अल नासरले अर्को जित हासिल गरेको छ । गएराती सम्पन्न खेलमा अल नासरले अल अखडोउडलाई ३-० गोल अन्तरले पराजित गरेको हो ।
अल नासरका लागि क्रिस्टियानो रोनाल्डोले दुई गोल गरेका थिए । रोनाल्डोको यस सिजनमा साउदी लिगमा योसहित १२ गोल गरेका छन् । आल नासरका लागि तेस्रो गोल जोआओ फेलिक्सले गरेका थिए ।
यो जितपछि अल नासर यस सिजनमा अपराजित रहदै १०औं जित हासिल गरेको छ । यो जितपछि अल नासरको १० खेलमा ३० अंक भएको छ र लिगमा शिर्ष स्थानमा रहेको छ । त्यस्तै यो हारपछि अल अखडोउडको १० खेलमा ५ अंक मात्र रहेको छ ।
काठमाडौँ । इङलिश प्रिमियर लिग अन्तर्गत म्यानचेस्टर सिटीले नोट्टीङघम फरेस्टलाई पराजित गरेको छ । शनिबार राति सम्पन्न खेलमा म्यानचेस्टर सिटीले नोट्टीङघमलाई २-१ गोल अन्तरले पराजित गरेको हो ।
म्यानचेस्टर सिटीको जितमा तिजानी रेजिन्दर्स र रयान चेर्कीले एक एक गोल गरेका थिए । त्यस्तै नोट्टीङघमका लागि ओमारी हचिनसनले एक गोल गरेका थिए ।
यो जितपछि म्यानचेस्टर सिटीको १८ खेलमा ४० अंक भएको छ र लिगमा दोस्रो स्थानमा रहेको छ । त्यसैगरी नोट्टीङघम फरेस्टको १८ खेलमा १८ अंक रहेको छ र लिगमा १७औं स्थानमा रहेको छ ।
काठमाडौँ । जारी बंगलादेश प्रिमियर लिग अन्तर्गत सन्दीप लामिछाने सम्मिलित टिम राजशाही वारियर्सले आफ्नो दोस्रो खेलमा हार बेहोरेको छ ।
शनिबार सम्पन्न खेलमा राजशाही वारियर्स ढाका क्यापिटल्ससँग ५ विकेटले पराजित भएको हो । राजशाहीले दिएको १३३ रनको लक्ष्य पछाएको ढाकाले १८.५ ओभरमा ५ विकेट गुमाउदै लक्ष्य पुरा गरेको थियो ।
यसअघि पहिला ब्याटिंग गरेको राजशाहीले २० ओभरमा ८ विकेट गुमाउदै १३२ रन बनाएको थियो । यस खेलमा सन्दीप लामिछानेले ४ ओभरमा ३५ रन दिएर एक विकेट लिएका थिए ।
यो ढाकाको पहिलो खेल हो भने राजशाहीले २ खेलमा एक जित र एक हार बेहोरेको छ ।
काठमाडौँ । इङल्याण्डले एसेज सिरिज अन्तर्गतको बक्सिङ डे टेस्ट ४ विकेटले जितेको छ । टेस्टको दोस्रो दिन इङल्याण्डले पाएको १७५ रनको लक्ष्य ६ विकेट गुमाउदै पुरा गरेको हो ।
यसअघि पहिलो दिन दुवै टिम अलआउट भएपछि अस्ट्रेलियाले आफ्नो दोस्रो इनिंगमा केवल १३२ रन मात्र बनाएको थियो । टेस्टको पहिलो दिन अस्ट्रेलिया १५२ रनमा अलआउट भएपछि इङल्याण्ड पनि पहिलो इनिंगमा ११० रनमा अल आउट भएको थियो ।
योसँगै इङल्याण्डले पछिल्लो १५ बर्षमा १६ टेस्टमा हार र २ टेस्ट ड्र गरेपछि पहिलो पटक अस्ट्रेलियामा टेस्ट खेल जितेको छ । यस अघि इङल्याण्डले २०११ को जनवरीमा अस्ट्रेलियामा टेस्ट खेल जितेको थियो ।
यो जितपछि जारी एसेज सिरिज ३-१ ले अस्ट्रेलिया अगाडी रहेको छ भने अब सिरिजको अन्तिम खेल जनवरी ४, २०२६ देखि सिड्नीमा हुने छ ।
काठमाडौँ । बंगलादेश प्रिमियर लिगको उद्घाटन खेलमा नेपाली खेलाडी सन्दीप लामिछाने खेलिरहेको टिम राजशाही वारियर्सले विजयी शुरुवात गरेको छ ।
सिलहेट टाइटन्सलाई ८ विकेटले पराजित गर्दै राजशाहीले विजयी शुरुवात गरेको हो । सिलहेटले दिएको १९१ रनको लक्ष्य पछाएको राजशाहीले १९.४ ओभरमा २ विकेट गुमाउदै लक्ष्य पुरा गरेको थियो । राजशाहीको जितमा नाजमूल होसैन शान्तोले अविजित १०१ रनको शतकीय पारी खेलेका थिए भने मुशफिकुर रहिमले अविजित ५१ रन बनाएका थिए ।
यस खेलमा सन्दीपले भने ४ ओभर बलिङ गर्दै ३८ रन दिएर २ विकेट लिएका थिए ।
अब राजशाहीले अर्को खेल भोलि नै ढाका क्यापिटल्ससँग खेल्ने तालिका रहेको छ ।
काठमाडौं । युवा तथा खेलकुदमन्त्री बब्लु गुप्ताले क्रिकेट प्रशिक्षक जगत टमटासहित पाँच जनालाई राष्ट्रिय खेलकुद परिषद् (राखेप) को सदस्यमा नियुक्त गरेका छन् ।
मन्त्री गुप्ताले टमटासहित शान्तकुमार महता, नेपाल तेक्वान्दो संघका केन्द्रीय सदस्य कुमार लामा घिसिङ, राजेश खड्का र प्रयास कार्कीलाई राखेप सदस्यमा नियुक्त गरेका हुन् । नवनियुक्त सदस्यहरुलाई मन्त्री गुप्ताले शुक्रबार पद तथा गोपनियताको शपथ समेत गराएका छन् ।
राखेपका पूर्व सदस्य सचिव टंकलाल घिसिङसहित ६ सदस्यको गत महिना कार्यालय सकिएपछि ती पद रिक्त थिए ।
काठमाडौँ । एसेज सिरिज अन्तर्गतको बक्सिङ डे टेस्टको पहिलो दिन दुवै टिम अलआउट भएका छन् ।
टेस्टको पहिलो दिन अस्ट्रेलिया १५२ रनमा अलआउट भएपछि इङल्याण्ड पनि पहिलो इनिंगमा ११० रनमा अल आउट भएको हो ।
टस हारेर पहिला ब्याटिंग गरेको अस्ट्रेलियाले ४५.२ ओभर खेलेर १५२ रन बनाएको थियो । अस्ट्रेलियाका लागि माइकल नेसेरले सर्बाधिक ३५ रन बनाएका थिए भने उसमान ख्वाजाले २९ रन, एलेक्स केरीले २०, क्यामरुन ग्रीनले १७ रन बनाएका थिए । त्यस्तै इङल्याण्डका बलर जोश टंगले ५ विकेट लिएका थिए भने गस अटकिनसनले २ तथा ब्राइडन कार्स र बेन स्टोक्सले एक एक विकेट लिएका थिए ।
त्यसपछि आफ्नो पहिलो इनिंगको ब्याटिंग शुरु गरेको इङल्याण्डले २९.५ ओभर मात्र खेलेर ११० रन बनाएको हो । इङल्याण्डका लागि ह्यारी ब्रूकले सर्बाधिक ४१ रन बनाए भने गस अटकिनसनले २८ रन बनाएका थिए । त्यस्तै अस्ट्रेलियाका बलर माइकल नेसेरले ४, स्कट बोल्याण्डले ३. मिचेल स्टार्कले २ र क्यामरुन ग्रीनले एक विकेट लिएका थिए ।
काठमाडौँ । बंगलादेश प्रिमियर लिग (बीपीएल) शुरु हुनु अगाडी विवादमा फसेको छ । प्रतियोगिताको १२औं संस्करण सुरु हुनुभन्दा एक दिन अगाडि, फ्रेन्चाइज मालिकले फिर्ता लिने निर्णय गरेपछि बोर्डले नयाँ फ्रेन्चाइजी टोली चट्टोग्राम रोयल्सलाई आफ्नो नियन्त्रणमा लिएको छ ।
ट्राइंगल सर्भिसेज लिमिटेडले बीसीबीबाट फ्रान्चाइज किनेको थियो र गत महिना लिलामीमा पनि भाग लिएको थियो । यद्यपि, उनीहरूले बुधबार बोर्डलाई आफुहरु पछि हट्ने जानकारी गराएको पत्र लेखेका थिए, जुन प्रायोजकको टोलीमा चासोको कमीको कारणले भएको बताइएको छ ।
बोर्डका अध्यक्ष इफ्तेखार रहमानले फ्रेन्चाइजीलाई नियन्त्रणमा लिएको स्वीकार गरेका छन् । क्रिकइन्फोसँग कुरा गर्दै उनले यो एक अप्रत्याशित अवस्था भएको फ्रान्चाइजले पत्रमा प्रायोजकहरू फेला पार्न नसकेकोले फिर्ता भएको जानकारी दिएका छन् ।
२०१२ मा प्रतियोगिता सुरु भएपछिका सुरुवाती संस्करणहरूमा बंगलादेश प्रिमियर लिगमा खेलाडीलाई भुक्तानीका धेरै समस्याहरू आएका थिए । २०१६ देखि २०१९ सम्मको अवधिमा अवस्था राम्रो भएको बताइएको थियो । गत सिजनमा यो मुद्दाले फेरि उठेको थियो । सबैभन्दा खराब तब भयो जब दरबार राजशाहीका खेलाडीहरूले दैनिक भत्ता र होटल बिलहरू सहित विभिन्न श्रेणीका भुक्तानीहरूमा ढिलाइको विरोध गर्दै प्रशिक्षण सत्र र खेल बहिष्कार गरेका थिए । रोयल्स बीपीएलमा चार नयाँ फ्रान्चाइजीहरू मध्ये एक हो ।
बंगलादेश प्रिमियर लिग भोली देखि शुरु हुदैछ । यस सिजनमा नेपालका सन्दीप लामिछाने पनि राजशाही वारियर्सबाट खेलिरहेका छन् ।
काठमाडौँ । उमेरहदका कारण वरिष्ठ कराते प्रशिक्षक हिरासिंह डंगोल, कराते प्रशिक्षक मनोज शाक्य र भारोत्तोलन प्रशिक्षक सन्तोष चौधरी सेवा निवृत भएका छन् ।
सेवा निवृत भएका वरिष्ठ कराते प्रशिक्षक डंगोल, कराते प्रशिक्षक शाक्य र भारोत्तोलन प्रशिक्षक चौधरीलाई राष्ट्रिय खेलकुद परिषद् (राखेप) ले बिदाइ गरेको छ ।
राखेपका सदस्य–सचिव रामचरित्र मेहता, राखेपकी सदस्य नन्दा बस्याललगायतले उनीहरुलाई मायाको चिनो प्रदान गरी एक कार्यक्रमबीच बिदाइ गरेका छन् ।