काठमाडौँ । पूर्वप्रधानमन्त्री डा. बाबुराम भट्टराईले नेपालको अर्थतन्त्र गम्भीर संरचनात्मक संकटबाट गुज्रिरहेको भन्दै नयाँ पुस्ताका नेतृत्वलाई दीर्घकालीन समाधान खोज्न आग्रह गरेका छन्। उनले वर्तमान सरकार र युवा नेतृत्वले अब राजनीतिक बहसभन्दा आर्थिक रूपान्तरणमा ध्यान दिनुपर्ने बताएका हुन्।
आइतबार सामाजिक सञ्जालमार्फत आफ्नो धारणा सार्वजनिक गर्दै भट्टराईले नेपाली चिया निर्यातमा भारतले सिर्जना गरेको अवरोध र उद्योग दर्तामा आएको गिरावटलाई अर्थतन्त्रका गम्भीर संकेतका रूपमा व्याख्या गरेका छन्। उनका अनुसार ८३ चिया उद्योग बन्द हुने अवस्थाले मुलुकको उत्पादनमूलक क्षेत्र संकटमा परेको स्पष्ट देखाएको छ।
पूर्वअर्थमन्त्रीसमेत रहेका भट्टराईले नेपालको औद्योगिक आधार कमजोर रहेको उल्लेख गर्दै आर्थिक राष्ट्रियताप्रति पर्याप्त संवेदनशीलता नदेखिएकोमा चिन्ता व्यक्त गरेका छन्। उनले राष्ट्रियताको राजनीतिक पक्षमा नेपाली समाज सचेत भए पनि आर्थिक राष्ट्रियताको विषयमा अझै गम्भीर बहस हुन नसकेको बताएका छन्।
आफ्नो चार दशकअघिको विद्यावारिधि अनुसन्धान स्मरण गर्दै उनले नेपालको अल्पविकास र परनिर्भरताको समस्या पुरानै रहेको उल्लेख गरे। राजनीतिक परिवर्तनका लागि आफ्नो पुस्ताले लामो संघर्ष गरेको भन्दै अब आर्थिक संरचनाको सुधार गर्ने जिम्मेवारी नयाँ पुस्ताको काँधमा आएको उनको भनाइ छ।
“नयाँ जोस र ऊर्जा लिएर सत्तामा पुगेका नेतृत्वले अब देशको ऐतिहासिक आर्थिक रोगको दिगो उपचार खोज्नुपर्छ,” उनले सन्देश दिएका छन्।
पछिल्लो समय निर्यात, उद्योग र लगानी क्षेत्रमा देखिएको सुस्तताबीच पूर्वप्रधानमन्त्री भट्टराईको यो धारणालाई आर्थिक नीतिमाथिको गम्भीर चेतावनीका रूपमा हेरिएको छ।
