काठमाडौं । राष्ट्रिय स्वतन्त्र पार्टी (रास्वपा) का सांसद खगेन्द्र सुनारले नेपाल प्रहरीका महानिरीक्षक दानबहादुर कार्कीमाथि आर्थिक अनियमिततासम्बन्धी गम्भीर आरोप सार्वजनिक भएको भन्दै तत्काल छानबिन अघि बढाउन सरकारसँग माग गरेका छन्। उनले अनुसन्धान निष्पक्ष बनाउन आवश्यक भए महानिरीक्षक कार्कीलाई जिम्मेवारीबाट हटाउनुपर्ने धारणा पनि राखे।
शुक्रबार प्रतिनिधिसभाको बैठकमा बोल्दै सुनारले सामान्य आरोपकै आधारमा यसअघि तीन जना मन्त्री पदमुक्त भइसकेको प्रसंग उल्लेख गरे। तर प्रहरी संगठनको नेतृत्वमाथि करोडौँ रुपैयाँ भ्रष्टाचार गरेको आरोप उठ्दा पनि सरकारबाट प्रभावकारी कदम नचालिएको भन्दै उनले प्रश्न गरे।
सुनारले महानिरीक्षक कार्कीसहित उनकी श्रीमती र केही उच्च प्रहरी अधिकारीविरुद्ध अख्तियार दुरुपयोग अनुसन्धान आयोग तथा सार्वजनिक लेखा समितिमा उजुरी परेको दाबी गरे। उनले प्रहरीका तल्लो तहका कर्मचारीलाई उपलब्ध गराइने जुत्ता–मोजालगायतका सामग्रीसमेत अनियमिततामा परेको आरोप उठेको बताए।
उनले यस्ता आरोपको सत्यतथ्य बाहिर ल्याउन सरकारले अनुसन्धान प्रक्रिया अघि बढाउनुपर्नेमा जोड दिए। प्रहरी नेतृत्वमाथि गम्भीर प्रकृतिका आरोप लागिसकेपछि पनि कार्कीमाथि छानबिन अघि नबढाउनुको कारण सरकारले जनतालाई स्पष्ट पार्नुपर्ने उनको भनाइ छ।
सांसद सुनारले प्रश्न गरे, “सरकारले उनलाई बर्खास्त किन गरिरहेको छैन? उनीमाथि छानबिन किन भइरहेको छैन? के कारणले उनलाई बचाइराखिएको छ?”
प्रहरी संगठनको सर्वोच्च नेतृत्वमाथि उठेको आरोपलाई सामान्य रूपमा लिन नहुने बताउँदै सुनारले यस विषयमा तत्काल निष्पक्ष अनुसन्धान आवश्यक रहेको धारणा राखे।
