काठमाडौं । प्रतिनिधिसभामा पछिल्ला छलफलका क्रममा सरकारका मन्त्रीहरूका अभिव्यक्तिहरूलाई लिएर सत्तापक्ष र प्रतिपक्षबीच चर्को बहस देखिएको छ। विशेषगरी अर्थमन्त्री डा. स्वर्णिम वाग्ले र परराष्ट्रमन्त्री शिशिर खनालका भनाइहरूलाई लिएर नेकपा एमालेले कडा आपत्ति जनाएको छ।

परराष्ट्रमन्त्री खनालले भारत भ्रमणका क्रममा दिएको भनिएको “इतिहासको बोझ अब बोक्न सक्दैनौँ” भन्ने टिप्पणीबारे स्पष्टिकरण माग गर्दै एमालेले उक्त अभिव्यक्तिको अर्थ र सन्दर्भबारे सरकारको जवाफ आवश्यक रहेको बताएको छ। सो भनाइले कूटनीतिक सन्देशबारे प्रश्न उठाएको एमालेको तर्क छ।

त्यसैगरी, अर्थमन्त्री वाग्लेको संसदमा व्यक्त भनाइ पनि विवादको केन्द्रमा परेको छ। सांसदहरूले कर संरचना हेरफेर र सूचना चुहावटमा उनको संलग्नता हुनसक्ने आशंका गर्दै संसदीय छानबिन समिति गठनको माग उठाएपछि वाग्लेले आफूविरुद्धका आरोप अस्वीकार गरेका थिए। उनले गम्भीर आर्थिक अनियमितता प्रमाणित भएमा पद त्याग गर्न तयार रहेको दाबी गर्दै, विपक्षी नेताहरूका विषयमा पनि सरकारसँग जानकारी रहेको संकेत गरेका थिए।

उनको यही अभिव्यक्तिलाई लिएर संसदभित्र असन्तुष्टि चुलिएको हो।

नेकपा एमालेकी सचिव तथा संसदीय दलकी उपनेता पद्मा अर्यालले संसदमा सांसदहरूलाई “फाइल खोल्ने” शैलीमा धम्की दिनु लोकतान्त्रिक मूल्य र संसदीय मर्यादाविपरीत भएको टिप्पणी गरिन्। उनले सरकारलाई यस्तो चेतावनीपूर्ण भाषा प्रयोग नगर्न आग्रह गर्दै, उठाइएका प्रश्नहरूको स्पष्ट जवाफ दिनुपर्नेमा जोड दिइन्।

अर्यालले प्रधानमन्त्रीसँग सम्बन्धित केही विषय संसदको अभिलेखबाट हटाउनुपर्ने माग पनि लामो समयदेखि उठ्दै आएको उल्लेख गरिन्। संसदभित्र प्रश्नहरूको जवाफ दिनुको सट्टा धम्कीपूर्ण अभिव्यक्ति आउनु उचित नहुने उनको भनाइ थियो।

Read More

काठमाडौँ । भौतिक पूर्वाधार तथा यातायात मन्त्री सुनील लम्सालले निर्माणाधीन नागढुङ्गा–मुग्लिन सडक आयोजनाको स्थलगत अनुगमन गर्दै निर्माण कार्यमा कुनै पनि प्रकारको ढिलाइ नगर्न सम्बन्धित निकायलाई स्पष्ट निर्देशन दिएका छन्।

आइतबार आयोजना क्षेत्रमा गरिएको निरीक्षणका क्रममा मन्त्री लम्सालले वर्षायामलाई ध्यानमा राख्दै जोखिम न्यूनीकरणका उपाय अपनाएर भए पनि काम निरन्तर अघि बढाउन निर्माण कम्पनीलाई आग्रह गरे। उनले आयोजना समयमै सम्पन्न गर्नु सरकारको प्राथमिकता भएको उल्लेख गर्दै लापरबाही वा काममा सुस्तता कुनै पनि हालतमा स्वीकार्य नहुने चेतावनी दिए।

अनुगमनका क्रममा मन्त्री लम्सालले कामको गति र गुणस्तरप्रति असन्तुष्टि जनाउँदै कडा शब्दमा निर्देशन दिएका थिए। उनका अभिव्यक्तिहरू सामाजिक सञ्जालमा सार्वजनिक भएपछि चर्चा र मिश्रित प्रतिक्रिया देखिएको छ। केहीले यसलाई निर्माण कार्यमा देखिएको ढिलासुस्तीप्रति कठोर असन्तुष्टिका रूपमा व्याख्या गरेका छन् भने केहीले सार्वजनिक पदधारीबाट प्रयोग भएको भाषा उपयुक्त नभएको टिप्पणी गरेका छन्।

मन्त्री लम्सालले आयोजनामा देखिएका समस्या र अवरोधहरू समाधान गर्न मन्त्रालय आवश्यक समन्वय र सहजीकरण गर्न तयार रहेको स्पष्ट पारे। राष्ट्रिय महत्त्व बोकेको उक्त सडक आयोजना समयमै सम्पन्न गर्न सरकार, निर्माण व्यवसायी र सम्बन्धित निकायबीच प्रभावकारी सहकार्य अपरिहार्य रहेको उनको भनाइ थियो।

यसअघि बिटुमिन आपूर्तिमा देखिएको अभाव तथा केही प्राविधिक चुनौतीका कारण प्रभावित बनेको नागढुङ्गा–मुग्लिन सडक आयोजनाको काम पछिल्ला दिनहरूमा पुनः तीव्र गतिमा अघि बढिरहेको छ। बिटुमिन आपूर्ति सहज भएसँगै विभिन्न खण्डहरूमा कालोपत्रे कार्यसमेत तीव्र रूपमा भइरहेको आयोजनाले जनाएको छ।

Read More

काठमाडौं । सेयर कारोबार साताको पहिलो दिन सोमबार प्रि-ओपन सेसनमा नेप्से परिसूचक सामान्य अंकले घट्दै बन्द भएको छ।

यस अवधिमा नेप्से परिसूचक ३.६० अंकले घटेर २,७२०.४३ विन्दुमा कायम भएको छ।

प्रि-ओपन सेसनमा ५८ वटा कम्पनीका कुल ३३ हजार ९७ कित्ता सेयर २१ करोड ७ लाख ७८ हजार ३१३ रुपैयाँ बराबरमा कारोबार भएका छन्।

रोबार भएका स्टकहरूमध्ये २३ वटाको मूल्य बढेको छ भने ३१ वटाको घटेको छ। बाँकी ४ वटा स्टकको मूल्य स्थिर रहेको नेप्सेले जनाएको छ।

Read More

काठमाडौं : फिफा विश्वकप २०२६ अन्तर्गत समूह ‘एफ’ को दोस्रो खेलमा स्विडेन ले ट्युनिसिया लाई ५–१ गोलले पराजित गर्दै सानदार जित दर्ता गरेको छ। मेक्सिकोस्थित मोन्टेरी स्टेडियममा भएको खेलमा स्विडेनले पहिलो हाफमा २–१ को अग्रता लिँदै दोस्रो हाफमा थप तीन गोल गरेको हो।

स्विडेनका यासिन अयारीले दुई गोल गर्दै उत्कृष्ट प्रदर्शन गरे। उनले खेलको सुरुवातमा नै टोलीलाई अग्रता दिलाए भने अतिरिक्त समयको अन्तिम मिनेटमा अर्को गोल थपे।

अलेक्जेन्डर इसाकले ३०औं मिनेटमा दोस्रो गोल गरे भने भिक्टर ग्योकेरेसले ५९औं मिनेटमा तेस्रो गोल गरे। माटियास स्वानबर्गले मैदान प्रवेश गरेको केही सेकेन्डमै चौथो गोल थपे। पछि उक्त गोललाई भिडियो सहायक रेफ्री (भिएआर) ले ८६औं मिनेटमा आधिकारिक रूपमा मान्यता दिएको थियो।

ट्युनिसियाका लागि ओमर रेकिकले ४३औं मिनेटमा एक मात्र गोल फर्काए।

यसअघि समूह ‘एफ’ कै खेलमा जापान र नेदरल्यान्ड्स ले २–२ को बराबरी खेलेका थिए। सो नतिजापछि स्विडेन समूहको शीर्ष स्थानमा पुगेको छ।

Read More

काठमाडौँ । २०२६ फिफा विश्वकप अन्तर्गत समूह ‘ई’ को दोस्रो खेलमा आइभरी कोस्टले इक्वेडरलाई १–० ले पराजित गरेको छ। फिलाडेल्फियामा सम्पन्न यो खेल निकै प्रतिस्पर्धात्मक रह्यो, जहाँ अन्तिम समयसम्म पनि दुवै टोलीले गोल गर्ने अवसर पाए तर सफल हुन सकेनन्।

खेलको ११ औँ मिनेटमै इक्वेडरले अग्रता लिने राम्रो अवसर पाए पनि त्यसलाई सदुपयोग गर्न सकेन। १४ औँ मिनेटमा स्ट्राइकरले प्रहार गरेको बल पोस्टमाथिबाट बाहिरियो। त्यसपछि १७ औँ मिनेटमा आइभरी कोस्टको प्रयास पनि गोलमा परिणत हुन सकेन।

३० औँ मिनेटमा इक्वेडरले अर्को सुनौलो अवसर गुमायो, जहाँ प्रहार बारमा लागेर रिबाउन्ड भएको थियो। पहिलो हाफभरि दुवै टोलीले केही अवसर सिर्जना गरे पनि कुनै पनि टोलीले गोल गर्न सकेनन्।

दोस्रो हाफमा आइभरी कोस्टले खेलमा बढी दबाब बनाउँदै आक्रामक प्रदर्शन गर्‍यो। निरन्तर आक्रमण गरेको आइभरी कोस्टले अन्ततः नियमित ९० मिनेटको खेलको अन्तिम मिनेटमा निर्णायक गोल गर्‍यो। वैकल्पिक खेलाडीका रूपमा मैदान प्रवेश गरेका अमाद डियालोले उत्कृष्ट फिनिस गर्दै टोलीलाई महत्वपूर्ण ३ अंक दिलाए।

यसअघि समूह ‘ई’ को पहिलो खेलमा जर्मनीले कुराकाओलाई ७–१ ले पराजित गरेको थियो। त्यस्तै आजै भएको पहिलो खेलमा जापान र नेदरल्यान्ड्सबीचको खेल २–२ को बराबरीमा सकिएको थियो।

Read More

काठमाडौं । काठमाडौँ उपत्यकामा पछिल्लो २४ घण्टाको अवधिमा सवारी नियम उल्लंघन गर्ने दुई हजार २५ जना चालक कारबाहीमा परेका छन्। उक्त कारबाहीबाट राज्यकोषमा १० लाख ४८ हजार पाँच सय रुपैयाँ राजस्व संकलन भएको काठमाडौँ उपत्यका ट्राफिक प्रहरी कार्यालयले जनाएको छ।

कार्यालयका प्रवक्ता तथा प्रहरी उपरीक्षक नरेशराज सुवेदीका अनुसार मादक पदार्थ सेवन गरेर सवारी चलाउने १०० जना, नियमविपरीत ‘राइड सेयरिङ’ गर्ने १०७ जना, ट्राफिक संकेत बत्ती उल्लंघन गर्ने १३६ जना तथा तीव्र गतिमा सवारी चलाउने १६५ जनामाथि कारबाही गरिएको छ।

त्यसैगरी, लेन अनुशासन पालना नगर्ने ५८ जना, निषेधित क्षेत्रमा हर्न बजाउने १०९ जना, सडक पेटीमा सवारी पार्किङ गर्ने १०५ जना तथा एकतर्फी सडकमा सवारी चलाउने ११७ जना चालकलाई पनि कारबाही गरिएको प्रहरीले जनाएको छ।

प्रवक्ता सुवेदीका अनुसार विभिन्न अन्य सवारी नियम उल्लंघन गर्ने एक हजार १२८ जनासहित कुल दुई हजार २५ जना चालक कारबाहीको दायरामा परेका हुन्। ट्राफिक प्रहरीले सवारी नियमको प्रभावकारी कार्यान्वयन तथा सडक सुरक्षालाई थप सुदृढ बनाउन नियमित अनुगमन र कारबाहीलाई निरन्तरता दिएको जनाएको छ।

Read More

काठमाडौं । सोमबार परेको औँसी अर्थात् सोमबारे औँसीका अवसरमा देशभरका वैदिक सनातन धर्मावलम्बीहरूले बिहान मौन रहँदै स्नान गरी पर्व मनाएका छन्। परम्पराअनुसार यस दिन सूर्योदयअघि बोल्नुअघि स्नान गर्ने चलन रहिआएको छ।

धर्मशास्त्रीय मान्यताअनुसार सोमबार परेको औँसीमा मौन स्नान गरे मनोकामना पूरा हुने विश्वास छ। नेपाल पञ्चाङ्ग निर्णायक समितिका पूर्व सदस्य तथा धर्मशास्त्रविद् प्रा. डा. देवमणि भट्टराईका अनुसार यस्तो संयोग वर्षमा सामान्यतया दुईदेखि तीनपटकसम्म पर्न सक्छ।

उनले विभिन्न धार्मिक ग्रन्थहरूमा सोमबारे औँसीका दिन गरिने स्नानलाई दाम्पत्य सुख, पुण्य प्राप्ति तथा आध्यात्मिक कल्याणसँग जोडेर व्याख्या गरिएको उल्लेख गरे। औँसी तिथि श्राद्ध, तर्पण र पितृस्मरणका लागि पनि विशेष महत्व राख्ने मानिन्छ।

धार्मिक मान्यताअनुसार माता–पिता जीवित भएका वा नभएका सबैले यस दिन स्नान गर्नु शुभ मानिन्छ। माता–पिता दिवंगत भइसकेकाहरूले श्राद्ध, तर्पण तथा दानपुण्यका कार्यक्रममार्फत औँसी पर्व मनाउने परम्परा रहेको बताइएको छ।

पर्वका अवसरमा देशका विभिन्न तीर्थस्थलमा स्नान र पूजा–आराधना गर्ने श्रद्धालुको उल्लेखनीय उपस्थिति देखिएको छ। विशेषगरी काठमाडौँको दक्षिणपश्चिम क्षेत्रमा रहेको मत्स्यनारायण मन्दिर तथा धादिङको त्रिपुरासुन्दरी गाउँपालिकास्थित नृसिंहधाममा भक्तजनको चहलपहल बढेको छ।

यसैबीच, जेठ ३ गतेदेखि प्रारम्भ भएको अधिकमास (पुरुषोत्तममास) पनि आजबाट सम्पन्न भएको स्वीकृत पात्रोहरूमा उल्लेख गरिएको छ। अधिकमास समापनको अवसरसँगै सम्बन्धित धार्मिक मेला तथा अनुष्ठानहरू पनि अन्तिम चरणमा पुगेका छन्।

Read More