काठमाडौँ : नेपाली बजारमा आज सुनचाँदीको मूल्य घटेको छ । नेपाल सुनचाँदी व्यवसायी महासंघका अनुसार आज सुनको मूल्य तोलामा १ हजार ४ सय रुपैयाँले घट्दै २ लाख ८२ हजार ४ सय रुपैयाँमा कारोबार भइरहेको छ ।
आइतबार सुन तोलामा २ लाख ८३ हजार ८ सय रुपैयाँमा कारोबार भएको थियो ।
यसैगरी, चाँदीको मूल्य पनि घटेको छ । आज चाँदी तोलामा १५ रुपैयाँले घटेर ४ हजार ३१० रुपैयाँमा कारोबार भइरहेको महासंघले जनाएको छ । आइतबार चाँदी ४ हजार ३२५ रुपैयाँमा कारोबार भएको थियो ।
काठमाडौँ : साताको पहिलो दिन सोमबार सेयर बजारको प्रि–ओपन सेसनमा नेप्से परिसूचकमा गिरावट देखिएको छ । यस अवधिमा परिसूचक ५.६९ अंकले घट्दै २६४३.८१ विन्दुमा पुगेको छ ।
उक्त सेसनमा कुल ४० कम्पनीका सेयर कारोबार भएका थिए । जम्मा २९ हजार ८९८ कित्ता सेयर १ करोड २६ लाख ९४ हजार ६९५ रुपैयाँ बराबरमा किनबेच भएको बजार तथ्यांकले देखाएको छ ।
कारोबार भएका स्टकहरूमध्ये ११ कम्पनीको सेयर मूल्य बढेको छ भने २६ कम्पनीको मूल्य घटेको छ । बाँकी ३ कम्पनीको मूल्य भने स्थिर रहेको देखिएको छ ।
काठमाडौँ : अर्थमन्त्री डा. स्वर्णिम वाग्लेले नेपाल धितोपत्र बोर्डका नवनियुक्त अध्यक्ष डा. गोपालप्रसाद भट्टलाई लगानीकर्ताको हित र लगानी सुरक्षालाई प्राथमिकतामा राखेर काम गर्न निर्देशन दिएका छन् । शपथ ग्रहणपछि आयोजित कार्यक्रममा अर्थमन्त्री वाग्लेले कुनै पनि प्रकारका लोभ, प्रभाव वा दबाबबाट टाढा रहेर निष्पक्ष रूपमा काम गर्न आग्रह गरे ।
उनले पुँजी बजारप्रति लगानीकर्ताको विश्वास कायम राख्नु सरकारको प्रमुख उद्देश्य भएको उल्लेख गर्दै नियमनलाई प्रभावकारी बनाउँदै पुँजी परिचालनमार्फत आर्थिक वृद्धिमा योगदान पुर्याउने वातावरण बनाउनुपर्ने बताए ।
अर्थमन्त्री वाग्लेले बजार सुधारका कामलाई योजनाबद्ध रूपमा अघि बढाउन निर्देशन दिँदै दैनिक, साप्ताहिक, मासिक, छ महिनादेखि वार्षिक लक्ष्यसहित स्पष्ट कार्ययोजना पेस गर्न पनि अध्यक्ष भट्टलाई आग्रह गरे । बजारमा फैलिने अनावश्यक हल्लाले साना लगानीकर्तामा त्रास सिर्जना गर्ने भएकाले त्यसलाई रोक्नुपर्नेमा उनले जोड दिए ।
‘पुँजी बजार सुधारका काम समयसीमासहित कार्यान्वयन हुनुपर्छ, नियमन प्रभावकारी हुनुपर्छ र लगानीकर्ताको विश्वास मजबुत बनाउनुपर्छ,’ अर्थमन्त्रीले भने, ‘मन्त्रालयबाट अनावश्यक हस्तक्षेप हुँदैन, तर नतिजामुखी काम अपेक्षित छ ।’ उनले बजारबारे नियमित प्रगति विवरण उपलब्ध गराउन पनि निर्देशन दिए ।
कार्यक्रममा नवनियुक्त अध्यक्ष भट्टले सरकारको नीतिअनुसार पुँजी बजार विकास र सुधारमा इमानदारीपूर्वक काम गर्ने प्रतिबद्धता जनाए । उनले विगतका अध्ययन र सिफारिसहरूलाई कार्यान्वयन गर्दै बजारलाई थप व्यवस्थित र सुदृढ बनाउने बताए ।
मन्त्रिपरिषद्को असार ५ गतेको निर्णयअनुसार भट्टलाई नेपाल धितोपत्र बोर्डको अध्यक्षमा नियुक्त गरिएको हो ।
काठमाडौँ । मुलुकको सर्वोच्च नीतिनिर्माण तह संसद् र त्यहाँ प्रतिनिधित्व गर्ने जनप्रतिनिधिहरूको भूमिकामाथि जनस्तरबाटै प्रश्न उठिरहेका बेला प्रतिनिधिसभाका सभामुख डोलप्रसाद अर्यालले सांसदहरूलाई आत्मसमीक्षा र आचरण सुधारका लागि कडा आग्रह गरेका छन् । लाखौँ मतदाताको विश्वास र भरोसा जितेर संसद्को रोस्टमसम्म पुगेका सांसदहरूले जनअपेक्षाअनुरूप आफूलाई जिम्मेवार र उत्तरदायी बनाउनुपर्नेमा सभामुखले जोड दिएका छन् ।
सङ्घीय संसद् सचिवालयद्वारा सिंहदरबारमा आयोजित सांसदहरूका लागि दुईदिने विशेष अभिमुखीकरण कार्यक्रमको उद्घाटन गर्दै सभामुख अर्यालले संसद्को गरिमा बढाउन जनप्रतिनिधिहरूको व्यवहार अनुकरणीय हुनुपर्ने स्पष्ट पारे ।
‘तपाईंहरूका हरेक गतिविधिलाई जनताले नजिकबाट नियालिरहेका छन् र मूल्याङ्कन गरिरहेका छन्,’ सभामुख अर्यालले सचेत गराउँदै भने, ‘त्यसैले जनविश्वास कायम राख्ने गरी मात्र काम गर्नुहोस् ।’
मुलुकको पछिल्लो राजनीतिक समीकरण र परिवर्तनसँगै संसद्मा नयाँ अनुहारहरूको बाहुल्यता छ । यसै यथार्थलाई स्वीकार गर्दै सभामुख अर्यालले नयाँ हुनु आफैँमा कमजोरी नभए पनि विधि र प्रक्रिया सिक्न अनिवार्य रहेको औंल्याए । उनका अनुसार, “हामीमध्ये धेरै सांसद नयाँ छौँ । नयाँ हुनु भनेको देश, कानुन वा विधि नबुझेको भन्ने होइन तर सङ्घीय संसद्को कार्यप्रणाली र प्रक्रियामा अझ अभ्यस्त हुन बाँकी छ ।”
उनले अभिमुखीकरणबाट प्राप्त ज्ञानलाई संसद्को कार्यकक्षमा प्रभावकारी ढंगले लागू गर्नसमेत निर्देशन दिए । सांसदहरूको मूल्याङ्कन उनीहरूको भाषणले मात्र नभएर समयपालन, अनुशासन र जिम्मेवार व्यवहारबाट हुने सभामुखको भनाइ थियो । संसद्को प्रभावकारिता र मर्यादा बढाउन सांसदहरू स्वयं अनुशासित हुनुपर्नेमा उनले जोड दिए ।
तर सांसदहरूलाई संसदीय प्रक्रिया सिकाउने उद्देश्यले आयोजना गरिएको उक्त अभिमुखीकरण कार्यक्रममै धेरैजसो सांसदहरू अनुपस्थित देखिएपछि सभामुख अर्यालले सार्वजनिक रूपमै असन्तुष्टि व्यक्त गरेका छन् ।
काठमाडौँ । अमेरिका र इरानबीच एकअर्कामाथि आक्रमण नगर्ने सहमति भएको छ र मध्यपूर्वमा जारी तनाव अन्त्य गर्ने उद्देश्यले वार्ता निरन्तर अघि बढाइने एक अमेरिकी अधिकारीले आइतबार राति जानकारी दिएका छन् ।
जुन १७ मा भएको संवेदनशील समझदारीपत्रका बाबजुद पछिल्ला दिनमा दुवै देशका सेनाबीच फेरि आक्रमणहरू भएका थिए । फेब्रुअरीको अन्त्यतिर सुरु भएको यो द्वन्द्वले रणनीतिक रूपमा महत्वपूर्ण हर्मुज जलडमरुमा ढुवानी प्रभावित गरेको थियो ।
उक्त समझदारीअनुसार तेहरानले व्यावसायिक जहाजहरूलाई जलडमरुबाट सुरक्षित आवतजावत गर्न दिने प्रतिबद्धता जनाएको थियो भने वाशिङटनले इरानी बन्दरगाहमाथिको नाकाबन्दी हटाउने सहमति गरेको थियो ।
एक अमेरिकी अधिकारीका अनुसार “समझदारीका सबै विषयमा प्राविधिक वार्ता जारी रहनेछ, दुवै पक्षले अहिलेका लागि आक्रमण रोक्ने सहमति गरेका छन् र जहाजहरू स्वतन्त्र रूपमा आवतजावत गर्न सक्नेछन् ।”
वार्ता कहिले र कहाँ हुने भन्ने औपचारिक विवरण भने सार्वजनिक गरिएको छैन । तर अमेरिकी सञ्चारमाध्यम एक्सिओसका अनुसार दुई अमेरिकी अधिकारी र एक जानकार स्रोतले वार्ता मंगलबार कतारमा पुनः सुरु हुने बताएका छन् । सीएनएनले पनि ट्रम्प प्रशासनका एक अधिकारीलाई उद्धृत गर्दै यस्तै विवरण रिपोर्ट गरेको छ, जसअनुसार मंगलबार दोहामा थप वार्ता हुने अपेक्षा गरिएको छ ।
यसैबीच, अमेरिकी राष्ट्रपति डोनाल्ड ट्रम्पले इरानले आक्रमण जारी राखेमा सैन्य कारबाही गर्ने आफ्नो पुरानो चेतावनी दोहोर्याएका छन् । उनले शनिबार अमेरिका युद्धमा फर्किन बाध्य भए इरान “अस्तित्वमै नरहने” चेतावनी दिएका थिए ।
पाकिस्तानको मध्यस्थतामा युद्ध अन्त्य गर्ने समझदारी भएपछि पनि दुवै पक्षले एकअर्कालाई युद्धविराम उल्लङ्घन गरेको आरोप लगाउँदै बदलामा आक्रमण गरेका थिए ।
आइतबार बिहानको पछिल्लो झडपमा अमेरिकी सेनाले इरानका १० सैन्य लक्ष्यमा आक्रमण गरेको दाबी गरेको थियो, जसलाई उसले व्यावसायिक जहाजमाथि इरानी आक्रमणको जवाफ भनेको छ । त्यसैगरी इरानले कुवेत र बहराइनस्थित अमेरिकी सैन्य शिविरहरूमा आक्रमण गरेको जनाएको छ ।
काठमाडौं । राष्ट्रियसभाको बैठक आज सोमबार अपराह्न १२ः१५ बजे सिंहदरबारस्थित संघीय संसद् भवनमा बस्ने भएको छ।
बैठकको कार्यसूचीअनुसार अर्थमन्त्री डा. स्वर्णिम वाग्लेले राष्ट्रियसभा नियमावली, २०७५ को नियम १३३क को उपनियम (२) बमोजिम ‘विनियोजन विधेयक, २०८३’ सभासमक्ष प्रस्तुत गर्नेछन्।
काठमाडौं । फिफा विश्वकप फुटबल २०२६ मा क्यानडाले ऐतिहासिक सफलता हात पारेको छ। दक्षिण अफ्रिकामाथि १–० को कठिन जित निकाल्दै क्यानडा पहिलोपटक विश्वकपको अन्तिम १६ अर्थात् प्रिक्वार्टरफाइनलमा पुगेको हो।
अमेरिकाको लस एन्जलसमा सम्पन्न पहिलो नकआउट खेलमा निर्धारित ९० मिनेट गोलरहित बराबरी भएपछि खेलको दोस्रो हाफको अतिरिक्त समयमा स्टेफेन युस्टाकियोले गरेको गोल नै क्यानडाको जितको आधार बन्यो।
तेस्रोपटक विश्वकपमा सहभागी भएको क्यानडाले यसअघि कहिल्यै समूह चरण पार गर्न सकेको थिएन। यसपटक भने समूह ‘बी’ को उपविजेताका रूपमा नकआउट चरणमा पुगेको टोलीले दक्षिण अफ्रिकालाई पराजित गर्दै नयाँ इतिहास रचेको हो।
दक्षिण अफ्रिका भने समूह ‘ए’ को उपविजेता बनेर नकआउट चरणमा पुगेको थियो। तर अन्तिम समयमा गोल खाएपछि उसको विश्वकप यात्रा अन्तिम १६ प्रवेशअघि नै टुंगिएको छ।
काठमाडौं । आज देशभर राष्ट्रिय धान दिवस मनाइँदै छ। प्रत्येक वर्ष असार १५ गते मनाइने यस दिवसमा किसानहरू खेतमा धान रोप्दै दही–चिउरा खाएर पर्व मनाउने परम्परा रहेको छ। कृषि कार्यको व्यस्त मौसमसँग जोडिएको यो दिन नेपाली समाजमा सांस्कृतिक तथा कृषिजन्य महत्त्व बोकेको पर्वका रूपमा स्थापित भएको छ।
नेपालमा राष्ट्रिय धान दिवस मनाउने परम्परा विसं २०६२ असार १५ गतेदेखि सुरु भएको हो। यसअघि विसं २०६१ मङ्सिर २९ गतेको मन्त्रीस्तरीय निर्णयबाट यो दिवस मनाउने व्यवस्था गरिएको थियो। कृषिप्रधान देश नेपालमा अधिकांश नागरिकको जीविकोपार्जन खेतीपातीमा निर्भर भएकाले धान दिवसलाई विशेष महत्त्वका साथ मनाइन्छ।
असार महिना धान रोपाइँको मुख्य समय भएकाले किसानहरू खेतमा व्यस्त रहने गर्छन्। रोपाइँका क्रममा असारे भाका गाउने, हिलोमा रमाउने र सामूहिक रूपमा धान रोप्ने परम्पराले यस दिनलाई अझ उत्साहपूर्ण बनाउने गरेको छ। कतिपय स्थानमा हिलो खेल्ने चलनसमेत रहेको छ, जसलाई कृषि संस्कृतिको अभिन्न अंश मानिन्छ।
असार १५ लाई दही–चिउरा खाने पर्वका रूपमा पनि चिनिन्छ। किसानहरूले खेतमा काम गर्दा शरीरलाई शीतलता र ऊर्जा मिल्ने विश्वासका साथ दही–चिउरा खाने गर्छन्। खेतीपातीमा संलग्न नभएका व्यक्तिहरूले पनि आजको दिन दही–चिउरा खाएर पर्व मनाउने परम्परा कायमै छ।
नेपाली संस्कृतिमा दहीलाई शुभताको प्रतीक मानिन्छ। घरबाट शुभकार्यका लागि निस्कँदा, यात्रा वा विदेश प्रस्थानअघि दही खुवाउने तथा दही–अक्षता लगाउने चलन अझै प्रचलित छ। दही खाएर यात्रा सुरु गर्दा शुभ हुने जनविश्वास पनि रहिआएको छ।
स्वास्थ्यका दृष्टिले पनि दही लाभदायक मानिन्छ। यसले पाचन प्रणालीलाई सुदृढ बनाउन सहयोग गर्ने विश्वास गरिन्छ भने आयुर्वेदमा भोजनपछि मोही सेवन गर्नु स्वास्थ्यका लागि हितकर मानिएको उल्लेख छ। पखालाजस्ता समस्यामा पनि दही–चिउरा उपयोगी हुने विश्वासले यसको महत्त्व अझ बढाएको छ।
यद्यपि यस वर्ष असारको मध्यसम्म पनि देशका सबै क्षेत्रमा पर्याप्त वर्षा नभएकाले अपेक्षाअनुसार धान रोपाइँ हुन सकेको छैन। केही स्थानमा रासायनिक मलको अभाव भएको भन्दै किसानहरूले गुनासो गरेका छन्। भने कृषि, वन तथा वातावरण मन्त्रालयले आवश्यक परिमाणमा रासायनिक मल मौज्दात रहेको जनाएको छ।
काठमाडौं । देशका अधिकांश क्षेत्रमा मनसुनी गतिविधि सक्रिय रहेको छ। जल तथा मौसम विज्ञान विभागका अनुसार हाल कोशी, मधेस र बागमती प्रदेशका सम्पूर्ण भू–भाग, गण्डकी प्रदेशका केही स्थान तथा लुम्बिनी प्रदेशको पूर्वी क्षेत्रमा मनसुनी वायुको प्रभाव कायम छ। अन्य क्षेत्रमा भने पश्चिमी तथा स्थानीय वायुको आंशिक प्रभाव देखिएको छ।
विभागले आगामी २–३ दिनभित्र गण्डकी र लुम्बिनी प्रदेशका बाँकी क्षेत्रसहित कर्णाली र सुदूरपश्चिम प्रदेशमा पनि मनसुन विस्तार हुने सम्भावना रहेको जनाएको छ।
हाल देशभर सामान्यदेखि पूर्ण बदलीको अवस्था रहेको छ। कोशी, बागमती र लुम्बिनी प्रदेशका केही स्थान तथा गण्डकी, कर्णाली र सुदूरपश्चिम प्रदेशका एक–दुई स्थानमा हल्कादेखि मध्यम वर्षा भइरहेको छ।
आज दिउँसो देशभर सामान्यदेखि पूर्ण बदली रहने अनुमान गरिएको छ। कोशी, बागमती र गण्डकी प्रदेशका पहाडी तथा हिमाली क्षेत्रका धेरै स्थानमा तथा लुम्बिनी, कर्णाली र सुदूरपश्चिमका पहाडी तथा हिमाली क्षेत्रका केही स्थानमा मेघगर्जन–चट्याङसहित मध्यम वर्षाको सम्भावना रहेको छ। हिमाली क्षेत्रमा हल्का हिमपातको पनि सम्भावना छ। तराईका केही क्षेत्रमा पनि मेघगर्जन–चट्याङसहित वर्षा हुन सक्नेछ।
विशेषगरी कोशी प्रदेशका पहाडी तथा तराईका एक–दुई स्थानमा भारी वर्षा हुन सक्ने अनुमान गरिएको छ। साथै कोशी प्रदेशको तराई र मधेस प्रदेशका केही स्थानमा हावाहुरी चल्न सक्ने भएकाले आवश्यक सतर्कता अपनाउन विभागले आग्रह गरेको छ।
आज राति पनि देशभर सामान्यदेखि पूर्ण बदली रहनेछ। कोशी, बागमती र गण्डकी प्रदेशका पहाडी तथा हिमाली क्षेत्रका धेरै स्थानमा, लुम्बिनी प्रदेशका पहाडी क्षेत्रका केही स्थानमा तथा कर्णाली र सुदूरपश्चिमका केही पहाडी तथा हिमाली क्षेत्रमा मेघगर्जन–चट्याङसहित मध्यम वर्षा तथा हिमपातको सम्भावना रहेको छ।
ज्येष्ठ शुक्लपक्षको पूर्णिमा तिथि रहेको छ। आज दिनभरि मूल नक्षत्रको प्रभाव रहनेछ। चन्द्रमा धनु राशिमा सञ्चार गरिरहेकाले उत्साह, ज्ञानप्रतिको रुचि, आध्यात्मिक सोच, यात्राप्रतिको आकर्षण तथा नयाँ अवसरको खोजी गर्ने प्रवृत्ति बलियो रहने संकेत देखिन्छ। आजको ग्रह–नक्षत्रको अवस्थाले केही राशिका व्यक्तिहरूलाई करियर, प्रतिष्ठा, आर्थिक प्रगति तथा नयाँ अवसरमा उल्लेखनीय सफलता दिलाउने सम्भावना रहेको छ भने केही राशिले स्वास्थ्य, खर्च व्यवस्थापन, पारिवारिक सम्बन्ध तथा निर्णय प्रक्रियामा विशेष सावधानी अपनाउनुपर्ने देखिन्छ। धैर्य, विवेक र निरन्तर परिश्रमका साथ अघि बढ्न सके चुनौतीलाई अवसरमा रूपान्तरण गर्दै अपेक्षित उपलब्धि हासिल गर्न सकिने दिन रहनेछ।
चु, चे, चो, ला, लि, लु, ले, लो, अ
आज तपाईंको मेहनतको उचित मूल्यांकन हुने सम्भावना देखिन्छ। शुभचिन्तक तथा सहयोगीहरूको साथले रोकिएका कार्य सहज रूपमा अघि बढ्नेछन्। कार्यक्षेत्रमा जिम्मेवारी वृद्धि हुने तथा पद प्रतिष्ठामा सकारात्मक प्रगति हुने संकेत छन्। टाढिएका साथीभाइसँग पुनः भेटघाट हुने सम्भावना रहेको छ। भाग्यले नयाँ अवसर प्रदान गर्नेछ भने आध्यात्मिक तथा सामाजिक सेवामूलक कार्यप्रति आकर्षण बढ्नेछ। सम्मान, पुरस्कार तथा आर्थिक लाभ प्राप्त हुने दिन रहनेछ।
इ, उ, ए, ओ, वा, वि, वु, वे, वो
स्वास्थ्यमा सामान्य कमजोरी महसुस हुन सक्ने भएकाले खानपान तथा दैनिक जीवनशैलीमा विशेष ध्यान दिनु उपयुक्त हुनेछ। केही पुराना समस्या दोहोरिनाले कार्यसम्पादनमा ढिलाइ हुन सक्छ। परिस्थितिअनुसार योजना अघि बढाउन समय लागे पनि निरन्तर मेहनतले सकारात्मक परिणाम दिलाउनेछ। चुनौतीपूर्ण जिम्मेवारी बहन गर्नुपर्ने अवस्था आउन सक्छ, तर धैर्य र विवेकले परिस्थितिलाई आफ्नो पक्षमा बनाउन सकिनेछ। भविष्यमा लाभदायी हुने नयाँ कामको सुरुवात गर्ने अवसर प्राप्त हुनेछ।
का, कि, कु, घ, ङ, छ, के, को, हा
मानसम्मान प्राप्त भए पनि सामाजिक तथा पारिवारिक दायित्वका कारण खर्च बढ्न सक्छ। आर्थिक व्यवस्थापनमा केही दबाब महसुस हुन सक्छ। पारिवारिक सम्बन्धमा सामान्य दूरी वा असमझदारी देखिन सक्ने भएकाले संयमित व्यवहार अपनाउनु उचित हुनेछ। यात्रा तथा अन्य आवश्यक कार्यले अतिरिक्त खर्च गराउन सक्छ। यद्यपि, निरन्तर प्रयासले विगतका कमजोरी सुधार्ने तथा नयाँ अनुभव हासिल गर्ने अवसर प्राप्त हुनेछ।
हि, हु, हे, हो, डा, डि, डु, डे, डो
आज चुनौतीपूर्ण परिस्थितिमा पनि आत्मविश्वास र साहसले सफलता दिलाउनेछ। प्रतिस्पर्धी तथा ईर्ष्यालु व्यक्तिहरू पछि पर्नेछन्। मेहनतको उचित प्रतिफल प्राप्त हुने तथा अधिकार स्थापित गर्ने अवसर मिल्नेछ। दीर्घकालीन लाभ हुने कार्य प्रारम्भ गर्न अनुकूल समय रहेको छ। स्वास्थ्यमा सुधार आउनेछ भने प्रतिस्पर्धात्मक क्षेत्रमा पनि उल्लेखनीय सफलता हासिल गर्न सकिनेछ।
मा, मि, मु, मे, मो, टा, टि, टु, टे
शुभचिन्तकहरूको साथ तथा सकारात्मक समाचारले दिन उत्साहपूर्ण रहनेछ। अध्ययन, लेखन तथा बौद्धिक क्षेत्रमा उल्लेखनीय प्रगति हुने सम्भावना छ। प्रतिष्ठित कार्य गर्ने अवसर प्राप्त हुनेछ। व्यापार, कृषि तथा पशुपालनबाट राम्रो लाभ मिल्ने संकेत देखिन्छ। रोकिएका योजनाहरू पुनः अघि बढ्नेछन् भने नयाँ कार्य प्रारम्भ गर्न पनि समय अनुकूल रहनेछ।
टो, पा, पि, पु, ष, ण, ठ, पे, पो
स्वास्थ्यमा विशेष गरी छातीसम्बन्धी समस्याप्रति सजग रहनु आवश्यक हुनेछ। हतारमा गरिएको निर्णयले अप्ठ्यारो निम्त्याउन सक्ने भएकाले सोचविचार गरेर अघि बढ्नु उपयुक्त हुनेछ। समय व्यवस्थापनमा कमजोरी हुँदा केही योजना प्रभावित हुन सक्छन्। अरूका लागि बढी जिम्मेवारी वहन गर्दा आफ्नै काममा ढिलाइ हुन सक्ने देखिन्छ। पारिवारिक सम्बन्धमा सामान्य असमझदारी आउन सक्ने भएकाले संयमित व्यवहार गर्नु लाभदायी हुनेछ। रोकिएका कार्य पूरा गर्न दोहोर्याएर प्रयास गर्नुपर्ने अवस्था आउन सक्छ।
रा, रि, रु, रे, रो, ता, ति, तु, ते
परिश्रम र कर्मयोगले आज नयाँ अवसर तथा सफलता दिलाउने सम्भावना बलियो देखिन्छ। व्यापार तथा उद्योगमा उल्लेखनीय लाभ हुनेछ। प्रतिस्पर्धीहरू पछि हट्नेछन् भने सहयोगी तथा अग्रज व्यक्तिहरूको साथ प्राप्त हुनेछ। मेहनतको उचित मूल्यांकन भई सम्मान, आर्थिक लाभ तथा पुरस्कार प्राप्त हुन सक्ने संकेत छन्। दीर्घकालीन योजनालाई कार्यान्वयन गर्ने उपयुक्त समय रहेको छ।
तो, ना, नि, नु, ने, नो, या, यि, यु
बौद्धिक क्षमता तथा तार्किक सोचको प्रभाव बढ्नेछ। बोली र विचारले अरूको प्रशंसा प्राप्त हुनेछ। अध्ययन, अनुसन्धान तथा ज्ञानमूलक क्षेत्रमा उल्लेखनीय सफलता मिल्ने सम्भावना छ। सानो प्रयासबाट पनि ठूलो उपलब्धि हासिल गर्न सकिनेछ। सहयोगीहरूको साथले रोकिएका कार्य सम्पन्न हुनेछन्। प्रतिष्ठा, आर्थिक लाभ तथा सम्मान प्राप्त गर्ने अवसर बलियो देखिन्छ।
ये, यो, भा, भि, भु, धा, फा, ढा, भे
आजको दिन उत्साह, सिर्जनात्मकता तथा नयाँ सुरुवातका लागि अनुकूल रहनेछ। सहयोगीहरूको साथ तथा विगतको सफलताले नयाँ कार्यप्रति आत्मविश्वास बढाउनेछ। टाढिएका परिवारजनसँग पुनः भेटघाट हुने सम्भावना छ। जीवनशैलीमा सकारात्मक परिवर्तन ल्याउने तथा पुराना कमजोरी सुधार्ने अवसर प्राप्त हुनेछ। नयाँ कामको प्रस्ताव आउने सम्भावना रहेको छ, यद्यपि त्यससँग केही चुनौती पनि जोडिन सक्छन्।
भो, जा, जि, जु, जे, जो, ख, खि, खु, खे, खो, गा, गि
आकस्मिक खर्च बढ्न सक्ने भएकाले आर्थिक व्यवस्थापनमा विशेष ध्यान दिनु आवश्यक हुनेछ। आम्दानीका स्रोत केही कमजोर देखिन सक्छन् भने भविष्यका लागि थप लगानी गर्नुपर्ने अवस्था आउन सक्छ। यात्रामा खर्च तथा असुविधा बढ्न सक्ने सम्भावना छ। छिमेकी वा आफन्तसँग सामान्य असमझदारी उत्पन्न हुन सक्ने भएकाले व्यवहारमा संयम अपनाउनु उचित हुनेछ। अपेक्षित परिणाम प्राप्त गर्न केही समय प्रतीक्षा गर्नुपर्ने देखिन्छ।
गु, गे, गो, सा, सि, सु, से, सो, द
प्रतीक्षित नतिजाले उत्साह बढाउनेछ। आम्दानीका नयाँ स्रोत फेला पर्ने तथा विगतको मेहनतबाट राम्रो लाभ प्राप्त हुने सम्भावना छ। कृषि, पशुपालन, व्यापार तथा लगानीका क्षेत्रमा उल्लेखनीय सफलता मिल्नेछ। उठ्न बाँकी रकम प्राप्त हुने तथा चल–अचल सम्पत्तिबाट लाभ उठाउन सकिनेछ। भविष्यसम्म लाभ दिने योजना कार्यान्वयन गर्ने अवसर प्राप्त हुनेछ।
दि, दु, थ, झ, ञ, दे, दो, चा, चि
नयाँ कार्यले प्रतिष्ठा, सम्मान तथा आर्थिक लाभ दिलाउने सम्भावना बलियो देखिन्छ। कार्यक्षेत्रमा गरेको मेहनतको सकारात्मक प्रतिफल प्राप्त हुनेछ। लक्ष्य प्राप्त गर्न सहज हुने तथा विभिन्न अवसरहरू प्राप्त हुने संकेत छन्। दीर्घकालीन योजनाको बलियो आधार तयार हुनेछ। प्रभावशाली तथा पदासीन व्यक्तिहरूसँग सम्बन्ध विस्तार हुने सम्भावना रहेको छ। व्यवसाय तथा पेशागत क्षेत्रमा पनि उल्लेखनीय सफलता हासिल गर्न सकिने दिन रहनेछ।