१ घण्टा अगाडि

सुनकोशीमा बेपत्ता कार र यात्रुको खोजी जारी

काठमाडौं । सुनकोशी नदीमा खसेर बेपत्ता भएको कार र त्यसमा सवार तीन जनाको खोजीका लागि सुरक्षाकर्मीले खोजी अभियानलाई तीव्र बनाएका छन्।

बेपत्ता यात्रु र सवारीसाधनको खोजी गर्न सशस्त्र प्रहरीको विपद् व्यवस्थापन बेस खुर्कोटबाट गोताखोरसहितको टोली परिचालन गरिएको छ। सशस्त्र प्रहरी निरीक्षक निरेन्द्र गुरुङको नेतृत्वमा खटिएको टोलीसँगै नेपाल प्रहरीका सुरक्षाकर्मी पनि खोजी कार्यमा संलग्न छन्।

लगातारको वर्षाका कारण सुनकोशी नदीमा पानीको बहाव बढेकाले गोताखोरलाई खोजी गर्न कठिनाइ भइरहेको सुरक्षाकर्मीले बताएका छन्।

सोमबार दिउँसो सिन्धुलीको फिक्कल गाउँपालिका–२ नवलपुरस्थित मध्यपहाडी लोकमार्गमा बसको ठक्करपछि कार सुनकोशी नदीमा खसेको थियो। दुर्घटनामा प्रदेश ३–०१–०२४ च ९५७३ नम्बरको कारसहित त्यसमा सवार तीन जना बेपत्ता भएका हुन्।

प्रहरीका अनुसार कारमा सिन्धुपाल्चोकको जुगल गाउँपालिका–७ का ३९ वर्षीय दिलकुमार लामा, सिन्धुली तीनपाटन गाउँपालिका–९ का १७ वर्षीय सुरज बलम्पाकी र गोलान्जोर गाउँपालिका–१ का करिब २८ वर्षीय गणेश थापा सवार थिए।

लामा कार चालक रहेको र बलम्पाकी तथा थापा क्रमशः हेल्पर र स्काभेटर चालकका रूपमा कार्यरत रहेको प्रहरीले जनाएको छ।

दुर्घटनापछि बस चालक सिन्धुलीको फिक्कल गाउँपालिका–६ का २६ वर्षीय हेमबहादुर तामाङलाई प्रहरीले नियन्त्रणमा लिएर घटनाबारे अनुसन्धान अघि बढाएको छ।

इलाममा खोलाले बगाएर बालकको मृत्यु, आमाले गरिन् आत्महत्या

काठमाडौं । माईजोगमाई गाउँपालिका–२ मा ११ वर्षीय बालकको खोलाले बगाएर मृत्यु भएको घटनापछि उनकी आमाले आत्महत्या गरेकी छन्।

गुल्मी स्थायी घर भई विगत ८/९ वर्षदेखि माईजोगमाई–२ स्थित माइतीघरमा बस्दै आएका अनिल खत्रीका छोरा आहान खत्री विद्यालयबाट घर फर्कने क्रममा बजुर खोलाले बगाएको थियो। घटनापछि उनको मृत्यु भएको जिल्ला प्रहरी कार्यालय इलामले जनाएको छ।

छोराको मृत्यु भएको केही समयपछि उनकी आमा ३५/३६ वर्षीया अमृता लेप्चा खत्री मृत अवस्थामा फेला परेकी थिइन्। प्रहरीका अनुसार उनले घर नजिकैको क्षेत्रमा आत्महत्या गरेकी हुन्।

जिल्ला प्रहरी कार्यालय इलामले घटनाबारे अनुसन्धान भइरहेको जनाएको छ। घटनापछि परिवार र स्थानीयवासी शोकमा परेका छन्।

रोमानियामा रेल दुर्घटनामा दुई नेपालीको मृत्यु

काठमाडौं । रोमानियामा भएको रेल दुर्घटनामा परी दुई जना नेपाली नागरिकको मृत्यु भएको छ। स्थानीय सञ्चारमाध्यमका अनुसार दुर्घटनामा ज्यान गुमाउने नेपालीहरू २५ र ३६ वर्ष उमेरका रहेका छन्।

मृतकको पहिचान भने अहिलेसम्म सार्वजनिक गरिएको छैन। उनीहरू कसरी रेलको लिकसम्म पुगे र दुर्घटना कुन परिस्थितिमा भयो भन्ने विषयमा स्थानीय प्रहरी तथा रेलवे अधिकारीहरूले अनुसन्धान अघि बढाएका छन्।

रोमानियाको राजधानी बुखारेस्टबाट करिब ३०८ किलोमिटर टाढा रहेको बाकाउ सहरको चिमीई रेल सडक खण्डमा आइतबार बिहान ३ बजेर २१ मिनेटमा दुर्घटना भएको बताइएको छ।

रोमानियामा ठूलो संख्यामा नेपाली नागरिक रोजगारीका लागि बसोबास गर्दै आएका छन्। पछिल्लो तथ्यांकअनुसार त्यहाँ करिब ५० हजार नेपाली कामदार रहेको अनुमान गरिए पनि नेपाल सरकारको आधिकारिक दूतावास वा कूटनीतिक संयन्त्र भने स्थापना भएको छैन।

उद्योगलाई गुणस्तर चिन्ह लिन सरकारको आग्रह

काठमाडौं । उद्योग, वाणिज्य तथा आपूर्ति मन्त्री गौरीकुमारी यादवले स्वदेशी उत्पादनको गुणस्तर सुधार गर्दै उपभोक्ताको विश्वास बढाउन उद्योगी तथा व्यवसायीलाई नेपाल गुणस्तर (एनएस) चिन्ह लिन आग्रह गरेकी छन्।

मन्त्रालयमा नेपाल गुणस्तर तथा नापतौल विभागका महानिर्देशक कुमारी ज्योति जोशीसहित विभागका अधिकारीहरूसँग भएको छलफलमा मन्त्री यादवले नेपाली उत्पादनलाई प्रतिस्पर्धी बनाउन गुणस्तर मापदण्डको पालनालाई प्राथमिकता दिनुपर्ने बताइन्।

उनले नेपालमा उत्पादन हुने वस्तुले विश्वसनीयता हासिल गर्न सके स्वदेशी बजारमा माग बढ्नुका साथै आयातमा निर्भरता घटाउन सहयोग पुग्ने धारणा राखिन्। गुणस्तर चिन्ह प्राप्त गर्ने प्रक्रियालाई सहज बनाउने र उद्योगी व्यवसायीलाई आवश्यक सहयोग उपलब्ध गराउने सरकारको नीति रहेको उनले बताइन्।

मन्त्री यादवका अनुसार एनएस चिन्ह प्राप्त उत्पादनलाई अन्तर्राष्ट्रिय बजारमा पुर्‍याउन पनि सहज हुने भएकाले निर्यात प्रवर्द्धनका लागि मन्त्रालयले आवश्यक सहजीकरण गर्नेछ।

नेपालमा हाल सिमेन्ट, रड, टायरलगायत विभिन्न औद्योगिक उत्पादनले नेपाल गुणस्तर चिन्ह प्राप्त गरिसकेका छन्। पछिल्लो समय स्वदेशमै उत्पादन हुने सेनेटरी प्याडले समेत एनएस चिन्ह पाएको विभागले जनाएको छ।

यद्यपि धेरै उद्योग तथा कम्पनीले अझै गुणस्तर चिन्ह लिन बाँकी रहेकाले आवश्यक मापदण्ड पूरा गरी प्रक्रिया अघि बढाउन मन्त्रालयले व्यवसायीलाई आग्रह गरेको छ।

परराष्ट्र अधिकृतलाई विदेशी भाषा प्रशिक्षण सुरु

काठमाडौं । नेपाल परराष्ट्र सेवाका अधिकृतहरूको भाषिक क्षमता र व्यावसायिक दक्षता अभिवृद्धि गर्ने लक्ष्यसहित परराष्ट्र मामिला अध्ययन प्रतिष्ठान (आईएफए)ले विदेशी भाषा प्रशिक्षण कार्यक्रम सञ्चालनमा ल्याएको छ।

सोमबार त्रिपुरेश्वरस्थित सगरमाथा सभाकक्षमा आयोजित अभिमुखीकरण कार्यक्रममार्फत प्रशिक्षणको औपचारिक शुभारम्भ गरिएको हो। कार्यक्रममा परराष्ट्रमन्त्री शिशिर खनालले प्रशिक्षणको उद्घाटन गर्दै प्रभावकारी कूटनीतिका लागि संवाद र भाषिक दक्षता अपरिहार्य रहेको बताए।

उनले नयाँ भाषा सिक्नु भनेको केवल बोलचालको सीप हासिल गर्नु मात्र नभई फराकिलो विश्वदृष्टि विकास गर्ने माध्यम पनि भएको उल्लेख गरे। विभिन्न मुलुक र समुदायसँग प्रत्यक्ष संवाद गर्न, आपसी सम्बन्ध विस्तार गर्न तथा नेपालको पहिचान अन्तर्राष्ट्रिय समुदायमा प्रभावकारी रूपमा प्रस्तुत गर्न भाषा ज्ञानले महत्वपूर्ण भूमिका खेल्ने उनको भनाइ थियो।

आईएफएका अनुसार यो कार्यक्रममार्फत परराष्ट्र सेवाका अधिकृतलाई अन्तर्राष्ट्रिय मञ्चमा अझ प्रभावकारी रूपमा काम गर्न आवश्यक भाषिक सीप प्रदान गर्ने लक्ष्य राखिएको छ। संस्थाले विदेशी भाषा शिक्षालाई कूटनीतिक प्रशिक्षण प्रणालीको अभिन्न अंगका रूपमा विकास गर्दै लैजाने योजना पनि सार्वजनिक गरेको छ।

कार्यक्रममा आईएफएकी कार्यकारी निर्देशक रोजिना ताम्राकारले भाषा र सांस्कृतिक समझदारीले विश्वास निर्माण, सार्वजनिक कूटनीति प्रवर्द्धन तथा नेपालको ‘सफ्ट पावर’ सुदृढ बनाउन सहयोग पुग्ने बताइन्। उनले प्रशिक्षणलाई दीर्घकालीन रूपमा सफल बनाउन सहभागी अधिकृतको प्रतिबद्धता र परराष्ट्र मन्त्रालयको निरन्तर सहयोग आवश्यक रहने धारणा व्यक्त गरिन्।

अभिमुखीकरण कार्यक्रममा नेपालका लागि चीनका राजदूत चाङ माओमिङले चिनियाँ भाषा सिकाइको महत्व तथा नेपाल–चीन सम्बन्धबारे धारणा राखेका थिए। त्यसैगरी, नेपालका लागि फ्रान्सेली राजदूतावासकी कार्यवाहक राजदूत एल्जा क्यालेले फ्रान्सेली भाषा अध्ययनले दुई देशबीचको सम्बन्धलाई थप मजबुत बनाउन योगदान पुग्ने बताइन्।

प्रशिक्षणको पाठ्यक्रमबारे त्रिभुवन विश्वविद्यालयस्थित कन्फ्युसियस इन्स्टिच्युटका नेपाल निर्देशक डा. बलराम दुवालले चिनियाँ भाषा तथा अलायन्स फ्रान्सेज द काठमाडौंकी पाठ्यक्रम निर्देशक आन–लोर पोटिएले फ्रान्सेली भाषा प्रशिक्षणको संरचना र सिकाइ प्रक्रियाबारे जानकारी दिएका थिए।

आईएफएका अनुसार चिनियाँ भाषा प्रशिक्षण कन्फ्युसियस इन्स्टिच्युटको सहकार्यमा र फ्रान्सेली भाषा प्रशिक्षण अलायन्स फ्रान्सेज द काठमाडौंसँगको सहकार्यमा सञ्चालन हुनेछ। साथै आगामी दुई साताभित्र अरबी भाषा प्रशिक्षण पनि सुरु गरिने तयारी गरिएको छ।

कार्यक्रमअन्तर्गत चिनियाँ भाषा कक्षा सातामा तीन दिन सञ्चालन हुनेछ भने फ्रान्सेली र अरबी भाषा कक्षा सातामा दुई–दुई दिन सञ्चालन गरिनेछ। प्रत्येक कक्षाको अवधि डेढ घण्टा रहनेछ।

ट्राफिक कारबाहीबाट सुर्खेतमा एक वर्षमै १ करोड ३३ लाख राजस्व

काठमाडौं । जिल्ला ट्राफिक प्रहरी कार्यालय सुर्खेतले गत आर्थिक वर्ष २०८२/८३ मा ट्राफिक नियम उल्लङ्घन गर्ने सवारीसाधनमाथि गरिएको कारबाहीबाट १ करोड ३३ लाख ८१ हजार ५०० रुपैयाँ राजस्व संकलन गरेको जनाएको छ।

कार्यालय प्रमुख प्रहरी निरीक्षक रोहितकुमार शाहीका अनुसार मादक पदार्थ सेवन गरी सवारी चलाउने, तीव्र गतिमा सवारी हाँक्ने तथा अन्य ट्राफिक नियम उल्लङ्घन गर्ने चालकलाई कारबाहीको दायरामा ल्याइएकाले उल्लेख्य राजस्व संकलन भएको हो।

यस अवधिमा सवारीसाधनको स्वरूप नियमविपरीत परिवर्तन गर्ने चालकलाई पनि कारबाही गरिएको थियो। त्यस्ता सवारीमाथिको कारबाहीबाट मात्र ५ लाख ७० हजार रुपैयाँ राजस्व उठेको कार्यालयले जनाएको छ।

ट्राफिक व्यवस्थापनसँगै जनचेतना अभिवृद्धिलाई पनि प्राथमिकता दिइएको प्रहरीले जनाएको छ। गत आर्थिक वर्षभर २ लाख ३१ हजार १३७ जनालाई लक्षित गर्दै विभिन्न ट्राफिक सचेतना कार्यक्रम सञ्चालन गरिएको थियो।

यता, सोही अवधिमा सुर्खेत जिल्लामा ९५७ वटा सवारी दुर्घटना भएका छन्। ती दुर्घटनामा ३७ जनाले ज्यान गुमाएको प्रहरीको तथ्यांक छ।

प्रहरीका अनुसार अधिकांश दुर्घटनाको मुख्य कारण तीव्र गति रहेको छ। त्यसबाहेक सवारीसाधनमा आएको प्राविधिक समस्या, पैदलयात्रीको असावधानी, सडक पूर्वाधार, प्रतिकूल मौसम तथा पशुचौपायाका कारण पनि दुर्घटना हुने गरेको जनाएको छ।

प्रतिनिधिसभा र पाँच समितिको बैठक आज

काठमाडौं । संघीय संसद्अन्तर्गत प्रतिनिधिसभाको बैठक आज दिउँसो १ बजे बस्ने भएको छ। बैठकमा वार्षिक प्रतिवेदन, जरुरी सार्वजनिक महत्वको प्रस्ताव तथा अन्य संसदीय कार्यसूचीमाथि छलफल हुनेछ।

बैठकमा प्रधानमन्त्री बालेन साहको तर्फबाट कानुन, न्याय तथा संसदीय मामिलामन्त्री सोविता गौतमले आदिवासी जनजाति आयोगको आर्थिक वर्ष २०८१/८२ को छैटौँ वार्षिक प्रतिवेदन पेश गर्ने कार्यक्रम रहेको छ।

त्यसपछि नेपाली कांग्रेस संसदीय दलका नेता भीष्मराज आङ्देम्बेले वास्तविक भूमिहीन, सुकुमवासी तथा अव्यवस्थित बसोबासीको पहिचान, सुरक्षित आवास, आधारभूत सेवा, उचित क्षतिपूर्ति, स्थायी पुनःस्थापना र वास्तविक भूमिहीनलाई लालपूर्जा वितरण सुनिश्चित गर्न सरकारको ध्यानाकर्षण गराउने उद्देश्यसहित जरुरी सार्वजनिक महत्वको प्रस्ताव प्रस्तुत गर्नेछन्। उक्त प्रस्तावलाई सांसद ऐनबहादुर महर, युवराज दुलाल र आरेन राईले समर्थन गर्नेछन्।

यसैबीच, आज संघीय संसद्अन्तर्गत पाँच वटा संसदीय समितिको बैठक पनि बस्नेछ। संघीय संसद् सचिवालयका अनुसार अर्थ समिति, अन्तरराष्ट्रिय सम्बन्ध तथा पर्यटन समिति, उद्योग तथा वाणिज्य, श्रम तथा उपभोक्ता हित समिति, राज्य व्यवस्था तथा सुशासन समिति तथा सार्वजनिक नीति तथा प्रत्यायोजित विधायन समितिको बैठक तय गरिएको छ।

बिहान १० बजे बस्ने अर्थ समितिले नेपाल राष्ट्र बैंक ऐन, २०५८ संशोधन सम्बन्धी विधेयकमाथिको दफावार छलफललाई निरन्तरता दिनेछ। सोही समयमा अन्तरराष्ट्रिय सम्बन्ध तथा पर्यटन समितिले पर्यटन विधेयक, २०८१ सम्बन्धमा मन्त्रालयसँग सैद्धान्तिक छलफल गर्ने कार्यसूची राखेको छ।

उद्योग तथा वाणिज्य, श्रम तथा उपभोक्ता हित समितिको बैठकमा खाना पकाउने ग्यासको आपूर्ति व्यवस्थापनबारे छलफल हुनेछ।

बिहान ११ बजे बस्ने राज्य व्यवस्था तथा सुशासन समितिले नेपाल विशेष सेवा ऐन, २०४२ को साविक व्यवस्था पुनःस्थापना गर्न प्रस्तावित विधेयक, २०८३ माथि सैद्धान्तिक तथा दफावार छलफल गर्नेछ। साथै कार्यविधि मस्यौदा तर्जुमा उपसमितिको प्रतिवेदनमाथि पनि विचार–विमर्श हुनेछ।

सार्वजनिक नीति तथा प्रत्यायोजित विधायन समितिको बैठकमा समितिका पूर्वसभापति रामनारायण विडारीसँग सरकारी आश्वासन कार्यान्वयनको अवस्थाबारे छलफल गर्ने कार्यसूची रहेको संघीय संसद् सचिवालयले जनाएको छ।

मौसम पूर्वानुमान

देशभर मनसुनी वायुको प्रभाव कायम रहेको छ। हाल मनसुनको न्यून चापीय रेखा सरदर स्थानभन्दा केही उत्तरतर्फ नेपालको तराई भू–भाग नजिक अवस्थित रहेकाले देशभर सामान्यदेखि पूर्ण बदली रहने जल तथा मौसम विज्ञान विभागले जनाएको छ। अधिकांश प्रदेशमा मेघगर्जन, चट्याङसहित वर्षा हुने सम्भावना रहेको छ भने केही स्थानमा भारी वर्षाको जोखिम पनि देखिएको छ।

कोशी प्रदेश

हिमाली र पहाडी भू–भागका धेरै स्थानमा मेघगर्जन तथा चट्याङसहित हल्कादेखि मध्यम वर्षा हुने सम्भावना छ। केही हिमाली तथा पहाडी क्षेत्रमा भारी वर्षा हुन सक्ने भएकाले नदी, खोला र पहिरोको जोखिम भएका क्षेत्रमा विशेष सतर्कता अपनाउनुपर्ने देखिन्छ। रातिको समयमा पनि वर्षाको सम्भावना कायम रहनेछ।

मधेश प्रदेश

प्रदेशका धेरै स्थानमा मेघगर्जन तथा चट्याङसहित हल्कादेखि मध्यम वर्षा हुने सम्भावना रहेको छ। रातिको समयमा पनि अधिकांश क्षेत्रमा वर्षा जारी रहने अनुमान गरिएको छ। प्रदेशका एक–दुई स्थानमा भारी वर्षा हुन सक्ने भएकाले डुबान तथा आकस्मिक बाढीको जोखिमप्रति सजग रहन अनुरोध गरिएको छ।

बागमती प्रदेश

हिमाली तथा पहाडी भू–भागका धेरै स्थानमा मेघगर्जनसहित मध्यम वर्षा हुने सम्भावना रहेको छ। केही स्थानमा भारी वर्षा हुने भएकाले पहिरो, बाढी तथा गेग्रान बहावको जोखिम बढ्न सक्छ। रातिको समयमा पनि मौसम सामान्यदेखि पूर्ण बदली रहनेछ र वर्षाको सम्भावना कायम रहनेछ।

गण्डकी प्रदेश

प्रदेशका हिमाली तथा पहाडी भू–भागमा व्यापक वर्षाको सम्भावना रहेको छ। मेघगर्जन तथा चट्याङसहित मध्यम वर्षाका साथै केही स्थानमा भारी वर्षा हुन सक्ने भएकाले उच्च सतर्कता अपनाउन आवश्यक छ। रातिको समयमा पनि वर्षा जारी रहने सम्भावना रहेको विभागले जनाएको छ।

लुम्बिनी प्रदेश

पहाडी तथा तराई भू–भागका धेरै स्थानमा मेघगर्जनसहित हल्कादेखि मध्यम वर्षा हुने सम्भावना छ। केही स्थानमा भारी वर्षा हुन सक्ने भएकाले नदी किनार, पहिरो प्रभावित क्षेत्र तथा सडक यात्रामा सावधानी अपनाउनुपर्ने देखिन्छ। राति पनि वर्षाको सम्भावना कायम रहनेछ।

कर्णाली प्रदेश

हिमाली भू–भागका थोरै स्थानमा वर्षा तथा हिमपातको सम्भावना रहेको छ भने पहाडी क्षेत्रका केही स्थानमा मेघगर्जन तथा चट्याङसहित मध्यम वर्षा हुन सक्छ। रातिको समयमा पनि मौसम बदली रहने र छिटपुट वर्षाको सम्भावना रहनेछ।

सुदूरपश्चिम प्रदेश

पहाडी तथा तराई भू–भागका केही स्थानमा मेघगर्जन तथा चट्याङसहित हल्कादेखि मध्यम वर्षा हुने सम्भावना रहेको छ। हिमाली क्षेत्रमा वर्षा तथा हिमपातको सम्भावना छ भने केही स्थानमा भारी वर्षा हुन सक्ने भएकाले प्राकृतिक विपद्को जोखिमप्रति सतर्क रहन विभागले आग्रह गरेको छ।

जल तथा मौसम विज्ञान विभागका अनुसार भारी वर्षाको सम्भावना रहेका क्षेत्रमा बाढी, पहिरो, गेग्रान बहाव तथा भू–क्षयको जोखिम बढ्न सक्छ। प्रतिकूल मौसमका कारण दैनिक जनजीवन, कृषि, स्वास्थ्य सेवा, पर्यटन, पर्वतारोहण तथा सडक तथा हवाई यातायात प्रभावित हुन सक्ने भएकाले आवश्यक सतर्कता अपनाउन र विभागका पछिल्ला मौसमसम्बन्धी सूचनाहरू नियमित रूपमा अद्यावधिक गर्दै जान अनुरोध गरिएको छ।

आजको राशिफल

२०८३ साउन १९ गते (४ अगस्ट २०२६), मंगलवार, श्रावण कृष्णपक्ष षष्ठी तिथि, रेवती नक्षत्र, चन्द्रराशि – मीन।

आज ग्रह–नक्षत्रको प्रभावले केही राशिका लागि आर्थिक प्रगति, नयाँ अवसर र प्रतिष्ठा बढ्ने संकेत देखिएको छ भने केही राशिले खर्च, स्वास्थ्य, सम्बन्ध तथा निर्णयमा विशेष सावधानी अपनाउनुपर्ने अवस्था रहनेछ। धैर्य, विवेक र निरन्तर प्रयासले रोकिएका काममा सफलता मिल्नेछ। आफ्नो राशिअनुसारको भविष्यफल पढेर आजको दिनलाई अझ सफल, सकारात्मक र प्रभावकारी बनाउनुहोस्।

♈ मेष (Aries)

चु, चे, चो, ला, लि, लु, ले, लो, अ

मेहनतअनुसारको प्रतिफल तत्काल प्राप्त नहुन सक्छ, त्यसैले धैर्यका साथ अघि बढ्नु उपयुक्त हुनेछ। अरूको आश्वासनमा भर पर्दा आर्थिक क्षति हुन सक्ने भएकाले सावधानी अपनाउनुहोस्। अनियन्त्रित खर्च बढ्न सक्ने भएकाले किनमेल तथा लगानीमा सोचविचार गर्नु आवश्यक हुनेछ। आवश्यक उपकरण मर्मत वा अन्य आकस्मिक खर्च आउन सक्छ। अवसरको खोजीमा केही दौडधुप गर्नुपरे पनि त्यसले भविष्यमा लाभ दिलाउने सम्भावना छ।

♉ वृष (Taurus)

इ, उ, ए, ओ, वा, वि, वु, वे, वो

प्रतीक्षित नतिजाले उत्साह थप्नेछ। नयाँ आम्दानीका स्रोत फेला पर्नेछन् र विगतका प्रयासबाट राम्रो लाभ प्राप्त हुनेछ। व्यापार, कृषि तथा पशुपालनबाट उल्लेखनीय फाइदा हुने सम्भावना छ। रोकिएको रकम हात लाग्ने तथा आर्थिक अवस्था मजबुत बन्ने संकेत देखिएको छ। दीर्घकालीन लाभ हुने योजनाको सुरुवात गर्न आजको दिन अनुकूल रहनेछ।

♊ मिथुन (Gemini)

का, कि, कु, घ, ङ, छ, के, को, हा

आजको मेहनतले भविष्यमा प्रतिष्ठा र सम्मान दिलाउने सम्भावना छ। आफ्नो क्षेत्रमा प्रभाव बढ्नेछ भने साथीभाइको साथ र सहयोगले आत्मविश्वास थपिनेछ। बौद्धिक क्षमता तथा व्यवहारका कारण अरूलाई प्रभावित पार्न सकिनेछ। नयाँ कामका लागि आवश्यक साधन जुट्नेछन् र व्यावसायिक प्रगतिको राम्रो आधार तयार हुनेछ।

♋ कर्कट (Cancer)

हि, हु, हे, हो, डा, डि, डु, डे, डो

रोकिएका काममा पुनः प्रयास गर्दा सफलता मिल्ने सम्भावना बलियो रहेको छ। व्यवसायमा लाभ बढ्नेछ र आफ्नो प्रभाव विस्तार हुनेछ। धार्मिक, सामाजिक तथा परोपकारी कार्यमा सक्रिय हुने अवसर प्राप्त हुन सक्छ। मेहनतले जीवनशैलीमा सकारात्मक परिवर्तन ल्याउनेछ। भविष्यका लागि लाभदायी योजना सुरु गर्न उपयुक्त समय रहेको छ।

♌ सिंह (Leo)

मा, मि, मु, मे, मो, टा, टि, टु, टे

सानातिना चुनौती आए पनि बुद्धिमत्ताले समाधान खोज्न सकिनेछ। तत्काल उपलब्धि नदेखिए पनि दीर्घकालीन लाभ हुने सम्भावना बलियो छ। स्वास्थ्यप्रति विशेष ध्यान दिनु आवश्यक हुनेछ। यात्रा तथा अन्य आवश्यकताले खर्च बढ्न सक्छ। अरूको अत्यधिक विश्वास गर्दा काममा ढिलाइ हुन सक्ने भएकाले आफ्ना निर्णयमा दृढ रहनु उपयुक्त हुनेछ।

♍ कन्या (Virgo)

टो, पा, पि, पु, ष, ण, ठ, पे, पो

साना समस्यालाई सहज रूपमा समाधान गर्दै अघि बढ्ने समय रहेको छ। दिन लाभदायक, उत्साहपूर्ण र मनोरञ्जनमय रहनेछ। व्यापार वा पेशाका क्रममा रमाइलो यात्रा गर्ने अवसर मिल्न सक्छ। प्रियजन तथा आफन्तसँगको भेटघाटले मन प्रसन्न रहनेछ। निरन्तर मेहनतले भविष्यका लागि नयाँ सम्भावना र स्थायित्वको आधार तयार गर्नेछ।

♎ तुला (Libra)

रा, रि, रु, रे, रो, ता, ति, तु, ते

अघिल्लो सफलताले नयाँ उत्साह प्रदान गर्नेछ। विभिन्न अवसर प्राप्त हुनेछन् र मेहनतको उचित प्रतिफल मिल्नेछ। प्रतिस्पर्धी तथा विरोधीहरू पछि पर्नेछन् भने स्वास्थ्यमा सुधार आउने संकेत देखिएको छ। कानुनी वा विवादास्पद विषयमा आफ्नो पक्ष बलियो रहनेछ। दीर्घकालीन लाभ हुने काम सुरु गर्न आजको दिन अनुकूल रहनेछ।

♏ बृश्चिक (Scorpio)

तो, ना, नि, नु, ने, नो, या, यि, यु

पहिलेका उपलब्धिले आत्मविश्वास बढाउनेछ। अध्ययन, बौद्धिक प्रतिस्पर्धा तथा पेशागत क्षेत्रमा राम्रो प्रगति हुनेछ। गुरुजनको सुझाव र सन्तानको सहयोग लाभदायी बन्नेछ। नयाँ काम सुरु गर्ने तथा यात्राको अवसर प्राप्त हुन सक्छ। व्यापार तथा पेशाबाट राम्रो आम्दानी हुने सम्भावना छ र नयाँ आयस्रोत पनि फेला पर्न सक्छ।

♐ धनु (Sagittarius)

ये, यो, भा, भि, भु, धा, फा, ढा, भे

काममा प्रक्रिया नमिल्दा केही ढिलाइ वा पुनः प्रयास गर्नुपर्ने अवस्था आउन सक्छ। सहयोगीहरूको साथ कमजोर रहनाले नयाँ योजना अघि बढाउन कठिनाइ हुन सक्छ। साझेदारी तथा आर्थिक कारोबारमा विशेष सावधानी अपनाउनु उपयुक्त हुनेछ। घरायसी खर्च बढ्ने सम्भावना रहेकाले आर्थिक व्यवस्थापनमा ध्यान दिनु आवश्यक छ। अनावश्यक सम्बन्ध र हतारमा गरिएका प्रतिबद्धताबाट टाढा रहनु राम्रो हुनेछ।

♑ मकर (Capricorn)

भो, जा, जि, जु, जे, जो, ख, खि, खु, खे, खो, गा, गि

सहयोगीहरूको राम्रो साथले योजना सफल हुनेछन्। उद्योग, व्यापार तथा पेशाबाट उल्लेखनीय लाभ प्राप्त हुनेछ। मेहनतको प्रतिफल छोटो समयमै हात लाग्नेछ। विशेष उपहार वा सम्मान प्राप्त हुने सम्भावना छ। कृषि तथा चौपायामा सामान्य चुनौती देखिए पनि आर्थिक पक्ष सुदृढ रहनेछ। प्रतिस्पर्धीहरूलाई सहजै पछि पार्न सकिनेछ।

♒ कुम्भ (Aquarius)

गु, गे, गो, सा, सि, सु, से, सो, द

निर्णय लिएर पनि कार्यान्वयनमा ढिलाइ गर्दा अवसर गुम्न सक्छ। अध्ययन तथा व्यापारमा अपेक्षाअनुसार प्रगति नहुन सक्छ, त्यसैले निरन्तर मेहनत आवश्यक हुनेछ। अरूका विषयमा अत्यधिक चासो राख्दा आफ्नै काम प्रभावित हुन सक्छ। परिस्थितिअनुसार आफूलाई अनुकूल बनाउँदै अघि बढेमा भविष्यमा राम्रो उपलब्धि हासिल गर्न सकिनेछ। आफ्ना कमजोरी सुधार्ने अवसरका रूपमा आजको दिनलाई उपयोग गर्नु उपयुक्त हुनेछ।

♓ मीन (Pisces)

दि, दु, थ, झ, ञ, दे, दो, चा, चि

महत्त्वाकांक्षी योजना अघि बढ्ने संकेत देखिएको छ। रमाइलो भेटघाट तथा सामाजिक कार्यक्रममा सहभागी हुने अवसर प्राप्त हुनेछ। आकर्षक व्यक्तित्वका कारण प्रशंसा बढ्नेछ। तर निर्णयमा ढिलाइ वा अन्योलले केही अवसर गुम्न सक्छ। खानपानमा लापरवाही गर्दा स्वास्थ्य प्रभावित हुन सक्ने भएकाले सावधानी अपनाउनुहोस्। शुभचिन्तकहरूको सुझावलाई आत्मसात् गर्दै अघि बढेमा महत्त्वपूर्ण लक्ष्य हासिल गर्न सहज हुनेछ।