काठमाडौँ । सडक दुर्घटनाबाट हुने मानवीय क्षति कम गर्न हेल्मेट प्रयोगसम्बन्धी कानुनलाई थप प्रभावकारी बनाउनुपर्नेमा सरोकारवालाहरूले जोड दिएका छन् । ‘हेड्सअप’ अभियान अन्तर्गत आयोजित नीति संवाद कार्यक्रममा सहभागीहरूले चालक मात्र होइन, पछाडि बस्ने यात्रुले समेत अनिवार्य रूपमा हेल्मेट लगाउने व्यवस्था कडाइका साथ लागू गर्नुपर्ने बताएका हुन् ।
अन्तरराष्ट्रिय अटोमोबाइल फेडेरेसन (एफआईए) र एआइपी फाउण्डेसनको सहयोगमा आयोजित कार्यक्रममा सरकारी निकाय, स्वास्थ्यकर्मी, सडक सुरक्षा विज्ञ, युवा तथा विभिन्न संस्थाका प्रतिनिधिको सहभागिता रहेको थियो ।
कार्यक्रममा अर्थोपेडिक सर्जन डा. सतिशप्रसाद वर्नवालले दुई पाङ्ग्रे सवारी दुर्घटनामा टाउकोमा गम्भीर चोट लाग्ने जोखिम अत्यधिक हुने भन्दै गुणस्तरीय हेल्मेट प्रयोगले ज्यान जोगाउन ठूलो भूमिका खेल्ने बताए ।
नेपाल प्रहरीका वरिष्ठ उपरीक्षक भुवनेश्वर तिवारीले सडक सुरक्षासम्बन्धी विद्यमान कानुनी व्यवस्था र कार्यान्वयनबारे जानकारी गराएका थिए । सडक सुरक्षा विज्ञ भगवती सेडाईंले राष्ट्रिय हेल्मेट मापदण्ड कडाइका साथ लागू गर्नुपर्ने आवश्यकता औँल्याइन् ।
नासा नेपालका कार्यकारी निर्देशक गोविन्द भट्टराईले सडक सुरक्षा र डबल हेल्मेट प्रयोगलाई सरकारले पर्याप्त प्राथमिकता नदिएको टिप्पणी गर्दै प्रभावकारी नीति आवश्यक रहेको बताए । कार्यक्रममा बालबालिकालाई ‘चाइल्ड हेल्मेट’ समेत वितरण गरिएको थियो ।
