काठमाडौँ । कञ्चनपुरको दोधाराचाँदनी नगरपालिका–५ मा एक पुरुष घरभित्रै मृत अवस्थामा फेला परेका छन् । ४५ वर्षीय लीलाराम सुनारको धारिलो हतियार प्रहार गरी हत्या गरिएको प्रारम्भिक अनुसन्धानबाट खुलेको प्रहरीले जनाएको छ ।
जिल्ला प्रहरी कार्यालय कञ्चनपुरका अनुसार सोमबार बिहान मृतककी श्रीमती यशोदा सुनारले श्रीमान् घरभित्र मृत अवस्थामा रहेको जानकारी प्रहरीलाई दिएकी थिइन् । घटनास्थल पुगेर अनुसन्धान गर्दा सुनारको शरीरका विभिन्न भागमा धारिलो हतियारको चोट देखिएको प्रहरीको भनाइ छ ।
घटनाबारे थप अनुसन्धानका लागि प्रहरीले मृतककी ३६ वर्षीया श्रीमतीलाई नियन्त्रणमा लिएर सोधपुछ सुरु गरेको छ । साथै घटनाको वास्तविकता पत्ता लगाउन सुदूरपश्चिम प्रदेश प्रहरी कार्यालय धनगढीबाट तालिमप्राप्त कुकुरसमेत परिचालन गरिएको प्रहरीले जनाएको छ ।
