काठमाडौँ । राष्ट्रिय महिला आयोगले अब नारायणहिटी दरबारस्थित साविक राहदानी विभागको भवनबाट सेवा सञ्चालन गर्ने तयारी गरेको छ । आयोगका अनुसार प्रशासनिक काम नयाँ भवनबाट सुरु भइसकेको छ भने एक साताभित्र सम्पूर्ण सेवा त्यहीँबाट सञ्चालन गरिनेछ ।
आयोगकी सदस्य तथा प्रवक्ता कृष्णकुमारी पौडेल खतिवडाले हाल भद्रकालीस्थित कार्यालयबाट सञ्चालन भइरहेको ११४५ हेल्पलाइन र उजुरीसम्बन्धी सेवा पनि केही दिनमै नारायणहिटीमा सारिने जानकारी दिइन् ।
स्थापनाकालदेखि आयोग भाडाको भवनमा सञ्चालन हुँदै आएको थियो । पछिल्लो समय आयोगले मासिक चार लाख रुपैयाँसम्म भाडा तिर्दै आएको जनाएको छ । नयाँ भवनमा सरेपछि भाडा खर्च बचत हुनुका साथै संवैधानिक आयोगको गरिमा र सेवाग्राहीको सुविधा दुवै बढ्ने आयोगको विश्वास छ ।
सरकारले २०८० सालमै आयोगलाई नारायणहिटीस्थित भवनमा सार्ने निर्णय गरे पनि प्रशासनिक प्रक्रियाका कारण ढिलाइ भएको थियो । प्रधानमन्त्री तथा मन्त्रिपरिषद्को कार्यालयको सहजीकरणपछि भवन व्यवस्थापन गरेर आयोगलाई हस्तान्तरण गरिएको हो ।
महिला तथा बालबालिकामाथि हुने हिंसा र विभेदसम्बन्धी उजुरी हेर्दै आएको आयोगमा दैनिक दर्जनौँ सेवाग्राही प्रत्यक्ष पुग्ने गरेका छन् भने हेल्पलाइनमार्फत देश–विदेशबाट समेत सेवा लिने क्रम जारी छ ।
