काठमाडौं । आज जेठ १५ गते, गणतन्त्र दिवसका अवसरमा Kathmandu स्थित सैनिकमञ्च टुँडिखेल मा ‘गणतन्त्र दिवस २०८३’ भव्य समारोहकाबीच मनाइएको छ। सरकारले २०६५ सालदेखि प्रत्येक वर्ष जेठ १५ लाई गणतन्त्र दिवसका रूपमा औपचारिक रूपमा मनाउँदै आएको छ।
गणतन्त्र दिवसको मूल समारोह प्रधानमन्त्रीको अध्यक्षतामा गठन हुने मूल समारोह समितिको संयोजनमा आयोजना गरिन्छ। गृह मन्त्रालयसँगको समन्वयमा प्रधानमन्त्री तथा मन्त्रिपरिषद्को कार्यालयले कार्यक्रमको व्यवस्थापन गर्दै आएको छ। हाल गृह मन्त्रालयको जिम्मेवारी पनि प्रधानमन्त्री बालेन शाह ले सम्हालेका छन्।
समारोहमा पूर्वप्रधानमन्त्रीहरूलाई अनिवार्य रूपमा निमन्त्रणा गर्ने प्रचलन रहँदै आएको छ। गृह मन्त्रालयले पूर्वप्रधानमन्त्रीदेखि अन्य विशिष्ट अतिथिहरूलाई औपचारिक निमन्त्रणा पठाउने गरेको भए पनि यस वर्ष कुनै पनि पूर्वप्रधानमन्त्री समारोहमा उपस्थित भएनन्।
पूर्वप्रधानमन्त्री डा. बाबुराम भट्टराई हरेक वर्षजस्तै यस पटक पनि अनुपस्थित रहे। उनी विदेशमा रहेका पूर्वप्रधानमन्त्री शेरबहादुर देउवा, साथै नेपालमै रहेका पूर्वप्रधानमन्त्रीहरू केपी शर्मा ओली, पुष्पकमल दाहाल प्रचण्ड, माधवकुमार नेपाल र झलनाथ खनाल पनि समारोहमा देखिएनन्।
यस विषयमा प्रतिक्रिया दिँदै गृह मन्त्रालयका उपसचिव सन्तोष पौडेलले सबै पूर्वप्रधानमन्त्रीहरूलाई नियमित रूपमा निमन्त्रणा पठाइने गरिएको बताए। यद्यपि, केही पूर्वप्रधानमन्त्रीका सचिवालयहरूले औपचारिक निमन्त्रणा प्राप्त नभएको दाबी गरेका छन्।
प्रचण्डको सचिवालयका अनुसार उनलाई पूर्वप्रधानमन्त्रीको हैसियतमा नभई सांसदका रूपमा निमन्त्रणा गरिएको थियो। उता केपी शर्मा ओलीको सचिवालय प्रमुख निरुदेवी पालले पनि सरकारबाट औपचारिक निमन्त्रणा नआएको जानकारी दिएकी छन्।
समारोहमा राष्ट्रपति रामचन्द्र पौडेल ले सम्बोधन गरेका थिए। प्रधानमन्त्री बालेन शाह भने कार्यक्रममा उपस्थित भए पनि सम्बोधन नगरी औपचारिक उपस्थिति मात्र जनाएका थिए।
