काठमाडौँ । कर्णाली प्रदेश योजना बैंकमा विभिन्न मन्त्रालयमार्फत आयोजना प्रविष्ट गर्ने क्रम तीव्र बनेको छ। प्रदेश योजना आयोगका अनुसार हालसम्म प्रदेश सरकारका सबै मन्त्रालयबाट ११ हजार २६२ वटा आयोजना योजना बैंकमा प्रविष्ट भएका छन् भने ९३० वटा आयोजना प्रक्रिया अगाडि बढिसकेका छन्।
प्रविष्ट गरिएका आयोजनामध्ये भौतिक पूर्वाधार तथा सहरी विकास मन्त्रालयअन्तर्गतका २ हजार ६२ वटा आयोजना रहेका छन्। आगामी आर्थिक वर्षका लागि स्थानीय तह हुँदै प्रदेशका विषयगत मन्त्रालयमार्फत प्रदेश योजना आयोगमा यी आयोजनाहरू प्रस्ताव गरिएका हुन्।
प्रदेश सरकारको नीतिअनुसार कर्णालीका १० जिल्ला र ७९ स्थानीय तहबाट प्राप्त योजना प्रदेश योजना आयोगको योजना बैंकमा प्रविष्ट भएपछि मात्र कार्यान्वयन प्रक्रियामा प्रवेश गर्ने व्यवस्था छ।
आर्थिक मामिला तथा योजना मन्त्रालयले बजेट सार्वजनिक गर्नुअघि सम्बन्धित मन्त्रालयहरूले योजना आयोगमा प्रस्ताव गरेका आयोजनाको विवरण सार्वजनिक गर्ने अभ्यास रहँदै आएको छ।
कर्णाली प्रदेशमा सबैभन्दा बढी बजेट प्राप्त गर्ने तथा कार्यान्वयन गर्ने मन्त्रालयमध्ये भौतिक पूर्वाधार तथा सहरी विकास मन्त्रालय प्रमुख मानिन्छ। मन्त्रालयले पूर्वाधार क्षेत्रसँग सम्बन्धित २ हजार ६२ वटा आयोजना योजना बैंकमा प्रविष्ट गरी सार्वजनिक गरेको जनाएको छ।
प्रदेश योजना आयोगका उपाध्यक्ष अशोकनाथ योगीले योजना बैंकमा दर्ता भएका आयोजनामध्ये १० हजार ३३२ वटा आयोजना आगामी दिनमा कार्यान्वयनका लागि अघि बढ्ने जानकारी दिए।
मुख्यमन्त्री यामलाल कँडेलले बजेट निर्माण प्रक्रियालाई व्यवस्थित र प्रभावकारी बनाउन योजना बैंकमा आयोजना प्रविष्ट गरी प्राथमिकताका आधारमा छनोट गर्ने कार्य भइरहेको बताए। उनले विकास निर्माणका कार्यक्रम सफल बनाउन संघ, प्रदेश र स्थानीय तहका सरकारबीच साझा समझदारी, समन्वय तथा सहकार्य अपरिहार्य रहेको उल्लेख गरे।
