काठमाडौँ । रोकिएको गौतमबुद्ध क्रिकेट रंगशाला को निर्माण कार्य पुनः सुरु भएको छ। बागमती प्रदेश सरकारबाट बजेट निकासामा ढिलाइ भएपछि भुक्तानी रोकिएको र त्यसकै कारण निर्माण कार्य करिब एक महिनासम्म ठप्प भएको थियो।
बजेट निकासा भएपछि निर्माण कम्पनीले पुनः काम सुरु गरेको भरतपुर महानगरपालिकाका इञ्जिनियर आदर्श पोखरेलले जानकारी दिएका छन्। उनका अनुसार प्रदेश सरकारबाट करिब रु ९ करोड रकम निकासा भएपछि निर्माण कार्यले पुनः गति लिएको हो।
महानगरपालिकाका डिभिजन इञ्जिनियर सन्तोष आचार्यले निर्माण कम्पनीलाई सम्झौता अनुसारको बिल भुक्तानी गरिसकिएको बताए। रंगशालाको निर्माण कार्य हिमालयन कालिञ्चोक बिबिआर जेभीले गरिरहेको छ।
सम्झौता अनुसार परियोजनाको म्याद आगामी पुस २२ गतेसम्म रहेको छ। हालसम्म करिब ५५ प्रतिशत निर्माण कार्य सम्पन्न भएको जनाइएको छ।
विसं २०८१ असारमा भरतपुर महानगरपालिका र निर्माण कम्पनीबीच कुल रु ७५ करोड ५० लाख ९१ हजार १८९ लागतमा २०८३ पुस २२ गतेसम्म निर्माण सम्पन्न गर्ने गरी सम्झौता भएको थियो।
यसअघि धुर्मस–सुन्तली फाउन्डेशनले परियोजना अघि बढाउन नसकेपछि महानगरपालिकाले नयाँ बोलपत्रमार्फत निर्माण कार्य अघि बढाएको हो।
