काठमाडौं । विराटनगर महानगरपालिकाले ० देखि ५९ महिनासम्मका सबै लक्षित बालबालिकालाई पूर्णखोपको पहुँचमा पुर्याउँदै पूर्णखोप सुनिश्चितताको लक्ष्य सफलतापूर्वक हासिल गरेको छ।
महानगरपालिकाको खोप शाखाका अनुसार ‘पूर्णखोप सुनिश्चितता तथा दिगोपना कार्यक्रम’ प्रभावकारी रूपमा कार्यान्वयन गर्दै कुल ११ हजार ६३० जना बालबालिकालाई आवश्यक सबै खोप प्रदान गरिएको हो।
विवरणअनुसार पूर्णखोप प्राप्त गर्ने बालबालिकामध्ये ० देखि ११ महिनाका २ हजार १३९ जना, १२ देखि १५ महिनाका ९७७ जना, १६ देखि २३ महिनाका १ हजार ५४८ जना तथा २४ देखि ५९ महिनाका ६ हजार ९६६ जना रहेका छन्।
यस उपलब्धिसँगै विराटनगर महानगरपालिकाले खोपबाट रोकथाम गर्न सकिने रोगविरुद्ध बालबालिकालाई सुरक्षित बनाउने अभियानलाई थप संस्थागत तथा दिगो बनाएको महानगरपालिकाका वरिष्ठ जनस्वास्थ्य अधिकृत रमेश कार्कीले बताए।
उनका अनुसार खोप अभियानले बालमृत्युदर घटाउन, विभिन्न रोगको जोखिम न्यूनीकरण गर्न तथा समग्रमा स्वस्थ समाज निर्माणमा महत्वपूर्ण योगदान पुर्याउँदै आएको छ।
यस्तै खोप संयोजक सुशील साहले पूर्णखोप कार्यक्रमले दादुरा, रुबेला, पोलियो, क्षयरोग, डिप्थेरिया, कालीखोकी र टिटानसजस्ता रोगहरूबाट बालबालिकालाई जोगाउन प्रभावकारी भूमिका खेल्दै आएको उल्लेख गरे।
स्वास्थ्य महाशाखा प्रमुख डा. दिलीपकुमार यादवले पूर्णखोप सुनिश्चितताको उपलब्धिलाई स्वास्थ्य क्षेत्रको महत्वपूर्ण सफलताका रूपमा लिँदै यसको दिगोपनालाई अझ सुदृढ बनाइने प्रतिबद्धता व्यक्त गरे।
