काठमाडौं । काठमाडौं महानगरपालिकाले आफ्नो भौगोलिक क्षेत्रलाई ‘सडक सहयोगापेक्षी मानवमुक्त’ क्षेत्र घोषणा गरेको छ। सोमबार राष्ट्रिय सभा गृहमा आयोजित एक औपचारिक समारोहबीच ‘जो बेसहारा, महानगरपालिकाको अभिभारा’ भन्ने नारासहित महानगरकी कार्यवाहक प्रमुख सुनिता डंगोलले उक्त घोषणा गरेकी हुन्।
घोषणासँगै यसको प्रभावकारी कार्यान्वयनका लागि काठमाडौं महानगरपालिका, नेपाल प्रहरी, जिल्ला प्रशासन कार्यालय काठमाडौं र मानव सेवा आश्रमबीच सहकार्य सम्झौता पनि सम्पन्न भएको छ।
सडक तथा सार्वजनिक स्थलमा भेटिने सहयोगापेक्षी व्यक्तिहरूको उद्धार, संरक्षण, पुनःस्थापना तथा व्यवस्थापनलाई एकीकृत प्रणालीमार्फत सञ्चालन गर्ने उद्देश्यले गरिएको सम्झौतामा महानगरपालिकाका तर्फबाट कार्यवाहक प्रमुख डंगोल, नेपाल प्रहरीका तर्फबाट प्रहरी महानिरीक्षक दानबहादुर कार्की, जिल्ला प्रशासन कार्यालयका तर्फबाट प्रमुख जिल्ला अधिकारी ईश्वरराज पौडेल तथा मानव सेवा आश्रमका तर्फबाट अध्यक्ष रामजी अधिकारीले हस्ताक्षर गरेका छन्।
सम्झौतासँगै जारी गरिएको संयुक्त प्रतिबद्धतामा ‘बेसहारा, अशक्त, असहाय, अभिभावकविहीन तथा सहयोगापेक्षी सडकआश्रित मानवमुक्त काठमाडौं महानगर क्षेत्र घोषणा–२०८३’ को प्रभावकारी कार्यान्वयनका लागि आवश्यक पूर्वाधार निर्माण, संयन्त्र विकास तथा सम्बन्धित निकाय र सरोकारवालामाझ सूचनाको प्रभावकारी सम्प्रेषणमा प्रतिबद्ध रहने उल्लेख गरिएको छ।
कार्यक्रमलाई सम्बोधन गर्दै कार्यवाहक प्रमुख डंगोलले काठमाडौंलाई सांस्कृतिक सहरका साथै मानवतामूलक सहरका रूपमा स्थापित गर्ने उद्देश्यले सडक सहयोगापेक्षी मानवमुक्त घोषणा गरिएको बताइन्।
उनले महानगरले विगत नौ वर्षदेखि सहयोगापेक्षी व्यक्तिहरूको उद्धार तथा व्यवस्थापनका क्षेत्रमा निरन्तर काम गर्दै आएको उल्लेख गर्दै आगामी दिनमा यस अभियानलाई अझ प्रभावकारी बनाइने बताइन्।
“आजसम्म सहरमा भेटिएका सबै सहयोगापेक्षी व्यक्तिहरूको उद्धार गरेका छौं। आगामी दिनमा पनि सडक वा सार्वजनिक स्थलमा यस्ता व्यक्ति भेटिए तत्काल उद्धार तथा पुनःस्थापनाका लागि सम्बन्धित संयन्त्र परिचालन गरिनेछ,” डंगोलले भनिन्।
समारोहमा पूर्व गृहमन्त्री नारायणकाजी श्रेष्ठले मानवता प्रवर्द्धनका क्षेत्रमा विगतमा हुनुपर्ने काम पर्याप्त रूपमा हुन नसकेको स्वीकार गर्दै अब कुनै कमजोरी हुन नदिन सबै पक्ष जिम्मेवार बन्नुपर्ने धारणा व्यक्त गरे।
उनले विगतका कमीकमजोरीलाई आगामी दिनका सकारात्मक कार्यमार्फत सच्याउनुपर्ने आवश्यकता औंल्याउँदै मानवतामूलक समाज निर्माणमा सबैको साझा प्रयास अपरिहार्य रहेको बताए।
