काठमाडौँ । इटहरीमा कोशी प्रदेशकै हालसम्मकै सबैभन्दा ठूलो सम्मेलन केन्द्र निर्माण हुने भएको छ। चार हजार जनासम्म अट्ने क्षमताको एबी हस्पिटालिटी–विन्धम रिसोर्ट एण्ड कन्भेन्सन सेन्टर निर्माणका लागि आवश्यक वित्तीय व्यवस्थापन (फाइनान्सियल क्लोजर) बुधबार सम्पन्न गरिएको हो।
उक्त परियोजनाको वित्तीय समापन एभरेष्ट बैंक लिमिटेड र मुक्तिनाथ विकास बैंक लिमिटेडको सहकार्यमा सम्पन्न भएको हो।
एबी इन्भेष्टमेन्ट होल्डिङका अध्यक्ष देशबन्धु बस्नेतको नेतृत्वमा अघि बढाइएको यो परियोजना पूर्वी नेपालको पर्यटन तथा आतिथ्य क्षेत्रको महत्वपूर्ण पूर्वाधारका रूपमा हेरिएको छ।
इटहरीमा निर्माण हुने यो सम्मेलन केन्द्रमा राष्ट्रिय तथा अन्तर्राष्ट्रिय सम्मेलन, प्रदर्शनी, व्यावसायिक कार्यक्रम तथा गन्तव्य विवाह (डेस्टिनेसन वेडिङ) आयोजना गर्न सकिनेछ। परियोजनाले इटहरीसँगै कोशी प्रदेश तथा भारतसहित छिमेकी मुलुकका आयोजकलाई समेत आकर्षित गर्ने अपेक्षा गरिएको छ।
बस्नेतका अनुसार परियोजनाले पूर्वी नेपाललाई पर्यटन र व्यावसायिक गतिविधिको प्रमुख केन्द्रका रूपमा स्थापित गर्न महत्वपूर्ण योगदान पुर्याउनेछ। सञ्चालनमा आएपछि हजारौं प्रत्यक्ष तथा अप्रत्यक्ष रोजगारी सिर्जना हुने तथा स्थानीय व्यवसाय, कृषि, सेवा र पर्यटन क्षेत्रमा उल्लेखनीय प्रभाव पर्ने विश्वास गरिएको छ।
परियोजनाका परिकल्पनाकार तथा व्यवस्थापक प्रभात कार्कीले सम्मेलन केन्द्र पूर्वी नेपालको दीर्घकालीन आवश्यकता भएको उल्लेख गर्दै यसले नेपाल–भारत–भुटान–बंगलादेशलाई जोड्ने क्षेत्रीय पर्यटन तथा व्यावसायिक केन्द्रका रूपमा इटहरीको पहिचान थप सुदृढ गर्ने बताए।
