काठमाडौँ । वीर अस्पतालले २४ घण्टा लगातार ड्युटी गरेका आवासीय चिकित्सकलाई बिहानको वार्ड राउन्ड सकिएपछि अनिवार्य रूपमा छुट्टी दिनुपर्ने व्यवस्था गर्दै परिपत्र जारी गरेको छ।
अस्पताल प्रशासनले आज जारी गरेको परिपत्रमार्फत रेजिडेन्ट चिकित्सकहरूको कार्य समयलाई व्यवस्थित गर्दै बिहानको वार्ड राउन्डपछि उनीहरूलाई अनिवार्य विश्राम दिन निर्देशन दिएको हो।
यसअघि प्रशिक्षार्थी चिकित्सक (इन्टर्न तथा आवासीय चिकित्सक)हरूले नेपालको श्रम ऐन, २०७४ अनुसार दैनिक अधिकतम १२ घण्टा र हप्तामा ७२ घण्टाभन्दा बढी काम गराउन नपाइने तथा हप्तामा एक दिन अनिवार्य बिदा दिनुपर्ने माग गर्दै आन्दोलन गर्दै आएका थिए।
उनीहरूले हप्तामा ४८ घण्टाभन्दा बढी काम गराइएमा श्रम ऐनअनुसार अतिरिक्त समय (ओभरटाइम) भत्ता उपलब्ध गराइनुपर्ने मागसमेत राख्दै आएका छन्।
