काठमाडौं । कालीमाटी र बल्खु क्षेत्रमा यात्रुहरूलाई जबर्जस्ती सवारीमा चढाउने, तानातान गर्ने तथा भाडादरमा मोलमोलाइ गर्दै बढी रकम असुल्ने गतिविधिमा संलग्न ३५ जनालाई प्रहरीले पक्राउ गरेको छ।
उपत्यका ट्राफिक प्रहरी कार्यालयले बुधबार बिहान सञ्चालन गरेको विशेष अभियानका क्रममा उनीहरूलाई नियन्त्रणमा लिइएको हो। काउन्टर तथा आसपास क्षेत्रमा यात्रुहरूलाई अनावश्यक दबाब दिने, सवारी साधनमा जबर्जस्ती चढाउने र तोकिएकोभन्दा बढी भाडा असुल्ने प्रयास गर्ने गतिविधि बढेपछि निगरानी कडा पारिएको प्रहरीले जनाएको छ।
उपत्यका ट्राफिक प्रहरी कार्यालयका प्रहरी उपरीक्षक नरेश सुवेदीका अनुसार यात्रुहरूलाई लक्षित गरी हुने यस्ता अवाञ्छित क्रियाकलाप नियन्त्रण गर्न विशेष कारबाही गरिएको हो। उनका अनुसार पक्राउ परेकाहरूमाथि सार्वजनिक हितविरुद्धको कसुरअन्तर्गत अनुसन्धान प्रक्रिया अघि बढाइनेछ।
प्रहरीले उनीहरूलाई आवश्यक कानुनी कारबाहीका लागि जिल्ला प्रहरी परिसर काठमाडौंमा बुझाउने तयारी गरेको छ।
