काठमाडौं । चान्द्रमासअनुसार श्रावणको तेस्रो सोमबार आज बिहानैदेखि पशुपतिनाथसहित देशभरका शिवालयमा भक्तजनको घुइँचो लागेको छ।
दर्शनार्थीको सहजताका लागि पशुपतिनाथ मन्दिरका चारवटै ढोका खोलिएको पशुपति क्षेत्र विकास कोषले जनाएको छ। बोल बम यात्रुका लागि पनि विशेष व्यवस्था गरिएको छ भने मन्दिर प्रवेशका लागि चार वटा लामको व्यवस्था गरिएको छ।
पशुपतिनाथ मन्दिरसँगै काठमाडौं उपत्यकाका अन्य प्रमुख शिवालयहरूमा पनि भक्तजनको भीड बढेको छ। गोकर्णेश्वर, नागेश्वर, डोलेश्वर तथा वसन्तपुर दरबार क्षेत्रस्थित ‘सानो पशुपतिनाथ’ भनेर चिनिने मक्खन महादेव मन्दिरलगायत विभिन्न शिवालयमा दर्शनार्थीको लाम लागेको जनाइएको छ।
श्रावण महिनाका सोमबार भगवान् शिवको पूजा, आराधना र दर्शनका लागि विशेष दिन मानिने भएकाले देशभरका शिवालयमा भक्तजनको विशेष उपस्थिति रहने गर्दछ।
