काठमाडौं । मेडिकल व्यवसायी तथा राष्ट्र, राष्ट्रियता, धर्म तथा संस्कृति बचाउ महाअभियानका केन्द्रीय संयोजक दुर्गा प्रसाईंलाई प्रहरीले पक्राउ गरी हिरासतमा राखेको छ।
प्रहरीले प्रसाईंलाई आइतबार राति नियन्त्रणमा लिएको हो। काठमाडौं उपत्यका अपराध अनुसन्धान कार्यालयका एसएसपी सन्तोष खड्का नेतृत्वको टोली र जिल्ला प्रहरी परिसर भक्तपुरका एसपी सूर्यबहादुर खड्काको टोलीले उनलाई राति १०ः२२ बजे भक्तपुरको निकोसेरास्थित निवासबाट नियन्त्रणमा लिएको प्रहरीले जनाएको छ।
प्रहरीका अनुसार प्रसाईंलाई सार्वजनिक शान्ति सुरक्षासम्बन्धी कसुरमा नियन्त्रणमा लिइएको हो। उनलाई जिल्ला प्रहरी परिसर भक्तपुरमा राखिएको छ।
प्रसाईंले आइतबार दिउँसो पत्रकार सम्मेलन गर्दै आन्दोलन गर्ने घोषणा गरेका थिए। प्रहरीले आज अदालतबाट म्याद थप गरी थप अनुसन्धान अघि बढाउने तयारी गरेको जनाएको छ।
