काठमाडौं । प्रख्यात औद्योगिक घराना देवेनरा मुन्दडा समूहको विराटनगरस्थित निवासमा प्रहरीले छापा मारेको छ।
मोरङ प्रहरी प्रमुख एसपी कविक कटवालका अनुसार प्राप्त सूचनाका आधारमा आज बिहानदेखि विराटनगर महानगरपालिका–७ स्थित मुन्दडा निवासमा छापा मारिएको हो। प्रहरीले बिहान ५ बजेदेखि सुरु गरेको खोज तथा अनुसन्धानको काम जारी रहेको जनाएको छ।
मुन्दडा नेपाल उद्योग परिसंघ कोशीका वरिष्ठ उपाध्यक्ष तथा मोरङ उद्योग व्यापार संघका पूर्वअध्यक्षसमेत हुन्।
देवेनरा समूह उद्योगपति देवकिसन मुन्दडा, वेणुगोपाल मुन्दडा, नरेन्द्र मुन्दडा र राजेन्द्र मुन्दडाको संयुक्त लगानीमा सञ्चालन हुँदै आएको औद्योगिक समूह हो। चारै जना दाजुभाइ हुन्।
समूहले तेल, साबुन, अगरबत्ती, चप्पललगायत विभिन्न उत्पादनमूलक उद्योग सञ्चालन गर्दै आएको छ। देवेनरा समूह नेपालको ठूलो चाँदी उद्योग सञ्चालकमध्ये एक रहेको बताइएको छ।
मुन्दडा समूहअन्तर्गत जेजे ज्वेलर्स, बाबा आयल रिफाइनरी, हाइलाइफ चप्पललगायत उद्योग सञ्चालनमा रहेका छन्। प्रहरीले छापाको विषयमा थप विवरण सार्वजनिक गरेको छैन।
