काठमाडौँ । बागमती प्रदेश सरकारले आगामी आर्थिक वर्षमा अतिविपन्न परिवारको सुरक्षित आवासदेखि पूर्वाधार विकास र युवा स्वरोजगार कार्यक्रमलाई प्राथमिकतामा राख्दै बजेट विनियोजन गरेको छ।
आर्थिक मामिला तथा योजनामन्त्री प्रभात तामाङले सोमबार प्रदेशसभामा प्रस्तुत गरेको आर्थिक वर्ष २०८३/८४ को बजेटअनुसार कम्तीमा एक हजार अतिविपन्न परिवारका लागि सुरक्षित आवास निर्माण गरिनेछ। यसका लागि रु २० करोड विनियोजन गरिएको छ।
सरकारले प्रशासनिक संरचना पुनर्संयोजनमार्फत मन्त्रालय तथा निकायहरूको संख्या घटाइएको उल्लेख गर्दै चालु खर्चमा करिब ११ प्रतिशत बचत हुने अनुमान गरेको छ।
पूर्वाधारतर्फ एकीकृत प्रशासनिक भवन, प्रदेशसभा भवन तथा आवास निर्माणका लागि रु ५६ करोड ५० लाख छुट्याइएको छ।
युवा लक्षित कार्यक्रमअन्तर्गत मुख्यमन्त्री नवप्रवर्तन कार्यक्रममार्फत युवा स्वरोजगार, उद्यमशीलता, प्रादेशिक STEM/IT विद्यालय, विद्यार्थी ह्याकाथन तथा स्मार्ट शिक्षा–आईटी स्किल फेलोसिपका लागि रु २० करोड विनियोजन गरिएको छ।
त्यसैगरी वैदेशिक रोजगारीबाट फर्किएका तथा घरेलु र आईटी उद्यममा संलग्न युवालाई लक्षित गर्दै युवा स्वरोजगार ब्याज अनुदान कार्यक्रमका लागि रु २० करोड छुट्याइएको छ।
बजेटमा प्रदेश गौरवका आयोजनाका रूपमा हेटौँडामा प्रदेश राजधानी चक्रपथ, गौरीटार रंगशाला, आरोग्य केन्द्र र एकीकृत प्रदेश प्रशासनिक भवनलाई अघि बढाइने उल्लेख गरिएको छ।
