काठमाडौं । करिब डेढ महिनादेखि नेतृत्वविहीन रहेको नेपाल स्टक एक्सचेञ्ज (नेप्से) ले नयाँ अध्यक्ष पाएको छ। सरकारले अर्थ मन्त्रालयका सहसचिव अमृत लम्साललाई नेप्सेको अध्यक्ष नियुक्त गर्दै रिक्त रहेको पदमा नयाँ नेतृत्व ल्याएको हो।
वैशाख १५ गते तत्कालीन अध्यक्षको राजीनामापछि खाली रहेको अध्यक्ष पदमा लम्सालको नियुक्तिसँगै नेप्सेले स्थायी नेतृत्व प्राप्त गरेको छ। अर्थ मन्त्रालयको निर्णयअनुसार उनले नेप्से सञ्चालक समितिको अध्यक्षका रूपमा जिम्मेवारी सम्हाल्नेछन्।
अध्यक्ष पद लामो समय रिक्त रहँदा पूँजीबजारसँग सम्बन्धित विभिन्न नीतिगत निर्णय, संस्थागत व्यवस्थापन तथा सुधारका पहलहरू प्रभावित भएका थिए। नयाँ नेतृत्व आएपछि ती विषयहरूमा आवश्यक निर्णय प्रक्रिया अघि बढ्ने अपेक्षा गरिएको छ।
लम्साल हाल अर्थ मन्त्रालयमा कार्यरत छन्। वित्तीय प्रशासन तथा सार्वजनिक संस्थान व्यवस्थापनमा अनुभव हासिल गरेका उनले यसअघि विभिन्न सरकारी तथा वित्तीय संस्थाहरूमा सञ्चालकको जिम्मेवारीसमेत निर्वाह गरिसकेका छन्।
नयाँ अध्यक्षको आगमनसँगै नेप्सेमा रोकिएका सुधार कार्यक्रम, बजार पूर्वाधार विकास तथा प्रविधिमा आधारित सेवाको विस्तारले गति लिने विश्वास गरिएको छ। साथै, धितोपत्र बजारको पारदर्शिता अभिवृद्धि, लगानीकर्ताको विश्वास सुदृढीकरण र सम्बन्धित निकायबीचको समन्वयलाई प्रभावकारी बनाउने दिशामा पनि नेतृत्वको भूमिका महत्वपूर्ण रहने अपेक्षा गरिएको छ।
पूँजीबजारका सरोकारवाला पक्षहरूले लम्सालको नेतृत्वमा बजार आधुनिकीकरण, संस्थागत सुधार र दीर्घकालीन विकासका कार्यक्रमलाई प्राथमिकताका साथ अघि बढाइने विश्वास व्यक्त गरेका छन्।
