काठमाडौं। फिफा विश्वकप फुटबल प्रतियोगितामा इंग्ल्याण्डले क्रोएसियालाई ४–२ गोलले पराजित गर्दै महत्वपूर्ण जित हासिल गरेको छ। अमेरिकाको डालासस्थित रंगशालामा सम्पन्न प्रतिस्पर्धात्मक खेलमा ह्यारी केनले दुई गोल गर्दै इंग्ल्याण्डको जितमा प्रमुख भूमिका निर्वाह गरे।
इंग्ल्याण्डले खेलको १२औँ मिनेटमै पेनाल्टीमार्फत अग्रता लिएको थियो। कप्तान ह्यारी केनले अवसरलाई सदुपयोग गर्दै टोलीलाई सुरुआती बढत दिलाए। तर ३६औँ मिनेटमा मार्टिन बुटुरिनाले गोल गर्दै क्रोएसियालाई खेलमा फर्काए।
पहिलो हाफ सकिनुअघि केनले ४२औँ मिनेटमा व्यक्तिगत दोस्रो गोल गर्दै इंग्ल्याण्डलाई पुनः अग्रता दिलाए। यद्यपि, अतिरिक्त समयमा पिटर मुसाले गोल गरेपछि क्रोएसियाले खेल २–२ को बराबरीमा पुर्याएको थियो।
दोस्रो हाफको सुरुमै जुड बेलिङ्हमले ४७औँ मिनेटमा गोल गर्दै इंग्ल्याण्डलाई फेरि अघि बढाए। त्यसपछि ८५औँ मिनेटमा मार्कस र्यासफोर्डले अर्को गोल थपेपछि इंग्ल्याण्डले जित सुनिश्चित गर्यो।
निर्धारित समयमा थप गोल हुन नसकेपछि खेल ४–२ को नतिजासहित इंग्ल्याण्डको पक्षमा टुंगियो।
प्रतियोगिताअन्तर्गत हाल घाना र पानामाबीच प्रतिस्पर्धा भइरहेको छ। यस्तै, आज बिहान ७ः४५ बजे उज्बेकिस्तान र कोलम्बियाबीचको खेल हुने तालिका रहेको छ।
