काठमाडौं। बेलायतका प्रधानमन्त्री किअर स्टार्मरले पदबाट राजीनामा दिने घोषणा गरेका छन्। आफ्नै लेबर पार्टीभित्रका सांसद तथा मन्त्रिपरिषद् सदस्यहरूबाट निरन्तर दबाब बढेपछि उनले नेतृत्व छाड्ने निर्णय लिएका हुन्।
ऐतिहासिक चुनावी विजय हासिल गरेको दुई वर्ष पनि नपुग्दै स्टार्मरमाथि पार्टीभित्रै असन्तुष्टि बढ्दै गएको थियो। आगामी आमनिर्वाचनअघि रिफर्म पार्टीका नेता निगेल फराजबाट चुनौती बढ्ने चिन्तासहित धेरै सांसदहरूले उनको नेतृत्व शैली र केही निर्णयलाई लिएर आलोचना गर्दै आएका थिए।
शुक्रबारसम्म नेतृत्व प्रतिस्पर्धामा सहभागी हुने संकेत दिएका स्टार्मरले सप्ताहन्त चेकर्समा परिवारसँग समय बिताएपछि राजीनामा गर्ने निष्कर्षमा पुगेको बताइएको छ। बेलायती सञ्चारमाध्यम द गार्डियन का अनुसार मन्त्रिपरिषद्का आधा दर्जनभन्दा बढी सदस्यहरूले उनलाई व्यक्तिगत रूपमा भेटेर पदत्याग गर्न सुझाव दिएका थिए।
स्टार्मरको राजीनामासँगै लेबर पार्टीभित्र नयाँ नेतृत्व चयन प्रक्रिया सुरु हुने भएको छ। सम्भावित दाबेदारका रूपमा एन्डी बर्नहम र स्वास्थ्य मन्त्री वेस स्ट्रिटिङलाई अगाडि हेरिएको छ।
नयाँ नेतृत्व चयन प्रक्रिया पूरा नहुँदासम्म स्टार्मरले नै प्रधानमन्त्रीका रूपमा काम जारी राख्नेछन्।
