काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले आफूविरुद्ध राज्यका तीनै अंगको दुरुपयोग गरी राजनीतिक प्रतिशोध साधिएको आरोप लगाएका छन्।
रास्वपाको प्रथम राष्ट्रिय महाधिवेशनलाई सम्बोधन गर्दै उनले सहकारी प्रकरणलाई आधार बनाएर आफू र पार्टीमाथि योजनाबद्ध राजनीतिक आक्रमण गरिएको दाबी गरे। नेपाली कांग्रेस नेतृत्वको सरकार बनेपछि रास्वपाविरुद्ध खुला प्रतिशोध सुरु भएको उनको भनाइ थियो।
लामिछानेका अनुसार संसदीय छानबिन समितिको निष्कर्ष विपरीत सहकारी ठगी, संगठित अपराध र सम्पत्ति शुद्धीकरणजस्ता आरोप लगाइएका छन्। उनले मुद्दा थपिँदै जानु, अभियोजन विस्तार हुनु र रातारात जेल स्थानान्तरण गर्नुजस्ता घटनालाई राजनीतिक प्रतिशोधको प्रमाणका रूपमा प्रस्तुत गरे।
उनले व्यवस्थापिका, कार्यपालिका र न्यायपालिकासमेत प्रयोग गरेर आफूलाई लक्षित गरिएको आरोप लगाउँदै यो संगठित राजनीतिक अपराध भएको टिप्पणी गरे। साथै, यस घटनामा संलग्न धेरै राजनीतिक पात्रहरू अहिले संसदमा नरहेको दाबी पनि गरे।
